މެދުއިރުމަތީގައި މިހާރު ހިނގަމުންދާ ހަނގުރާމައާއި ހަމަނުޖެހުންތަކުގެ ސަބަބުން ރާއްޖެއަށް ތެލާއި ކާބޯތަކެތީގެ އެއްވެސް ދަތިކަމެއް ކުރިމަތިނުވާނެ ކަމުގެ ފުރިހަމަ ޔަގީންކަން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ދެއްވައިފިއެވެ. މިއަދު ހެނދުނު ނޫސްވެރިންނާ ބައްދަލުކުރައްވައި ވާހަކަފުޅު ދައްކަވަމުން ރައީސް ވިދާޅުވީ، މެދުއިރުމަތީގެ މަސްރަހާ ގުޅިގެން ސަރުކާރުން ހާއްސަ ފިޔަވަޅުތަކެއް އަޅަމުންދާ ކަމަށެވެ.
މި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ރައީސް ވިދާޅުވީ، ތެލާއި ކާބޯތަކެތި ލިބުމުގައި އެއްވެސް ދަތިކަމެއް ކުރިމަތިނުވާނެ ގޮތަށް ކަންކަން ހަމަޖެހިފައިވާ ކަމަށެވެ. އެގޮތުން ތެލަށް އެއްވެސް ކަންބޮޑުވުމެއް ދިމާނުވާނެ ކަމަށާއި، ތެޔޮ ނުލިބިދާނެ ކަމަށް ރައްޔިތުން ކަންބޮޑުވާން ޖެހޭނެ އެއްވެސް ކަމެއް ނެތް ކަމަށް އެމަނިކުފާނު ވިދާޅުވިއެވެ. އަދި ހަމައެއާއެކު، ކާބޯތަކެތީގެ ސަޕްލައިއަށް ވެސް އެއްވެސް މައްސަލައެއް ދިމާނުވާނެ ކަމުގެ ޔަގީންކަން އެމަނިކުފާނު ދެއްވިއެވެ.
މެދުއިރުމަތީގެ ހާލަތާ ގުޅިގެން ދަތުރުފަތުރަށާއި ފަތުރުވެރިކަމުގެ ސިނާއަތަށް ދިމާވެދާނެ ގޮންޖެހުންތަކުން އަރައިގަތުމަށް ސަރުކާރުން ދަނީ ވަރަށް ބޮޑަށް ތައްޔާރުވަމުންނެވެ. ރައީސް މުއިއްޒު ވިދާޅުވި ގޮތުގައި މިކަމަށް ހާއްސަކޮށްގެން އެކުލަވާލާފައިވާ ކޮމިޓީއަކުން ދަނީ ގިނަ މަސައްކަތްތަކެއް ކުރަމުންނެވެ. އަދި ދަތުރުފަތުރަށް ދިމާވަމުންދާ ދަތިތަކަށް ހައްލު ހޯދުމަށް އެހެން ގައުމުތަކާ ގުޅިގެން ސަރުކާރުން އަންނަނީ މަސައްކަތް ކުރަމުން ކަމަށާއި، މި ހިނގަމުންދާ ކަންކަމުގެ ތެރެއިން ރާއްޖޭގެ މަސްލަހަތު ހިމާޔަތް ކުރުމަށް ސަރުކާރުން އިސްކަންދޭނެ ކަމަށް ވިދާޅުވިއެވެ.
މިއަދުގެ ނޫސްވެރިންގެ ބައްދަލުވުމުގައި ރައީސް ވަނީ މުހިންމު ނިންމެވުމެއްވެސް އިއުލާނު ކުރައްވާފައެވެ. އެމަނިކުފާނު ވިދާޅުވީ، ރާއްޖެއިން ބޭރުގެ ދަތުރުފުޅެއް ނުވަތަ ހާއްސަ އެހެން ބައްދަލުވުމެއް ނެތް ނަމަ، ދެން ކޮންމެ ހަފްތާއެއްގެ ހޯމަ ދުވަހެއްގެ ހެނދުނު ދިހައަކުން އެގާރައަށް ނޫސްވެރިންނާ ބައްދަލުކުރައްވައި މައުލޫމާތު ހިއްސާކުރައްވަމުން ގެންދަވާނެ ކަމަށެވެ.
