މި އަހަރު އެމެރިކާ، ކެނެޑާ އަދި މެކްސިކޯގައި ބޭއްވުމަށް ހަމަޖެހިފައިވާ ވޯލްޑް ކަޕް ފުޓްބޯޅަ މުބާރާތުގައި ބައިވެރިވާ ޓީމުތަކަށް ދޭ އިނާމު ފައިސާ 50 އިންސައްތަ އިތުރުކުރުމަށް ފީފާއިން ނިންމައިފިއެވެ.
މި ނިންމުން އިއުލާނުކޮށްފައިވަނީ މުބާރާތުގެ ޓިކެޓް އަގުބޮޑުވުމާ ގުޅިގެން ގިނަ ފާޑުކިޔުންތަކެއް އަމާޒުވެފައިވާ ދަނޑިވަޅެއްގައެވެ.
ފީފާ ކައުންސިލުން ފާސްކޮށްފައިވާ މި ނިންމުމުގެ ދަށުން، މުބާރާތުގެ މާލީ ބަހާލުމުގެ ގޮތުގައި ރެކޯޑް އަދަދެއް ކަމަށްވާ 727 މިލިއަން ޑޮލަރު ކަނޑައަޅާފައިވެއެވެ. މީގެ ތެރެއިން މުބާރާތް ކާމިޔާބުކުރާ ޓީމަކަށް 50 މިލިއަން ޑޮލަރު ލިބޭއިރު، ދެވަނައަށްދާ ޓީމަކަށް ލިބޭނީ 33 މިލިއަން ޑޮލަރެވެ. އަދި ގްރޫޕް ސްޓޭޖުން ކަޓާ ޓީމުތަކަށްވެސް 9 މިލިއަން ޑޮލަރު ލިބޭނެއެވެ.
މީގެ އިތުރުން، މުބާރާތަށް ކޮލިފައިވާ ކޮންމެ ޓީމަކަށް ތައްޔާރުވުމުގެ ޚަރަދުގެ ގޮތުގައި 1.5 މިލިއަން ޑޮލަރު ދިނުމަށް ވަނީ ނިންމާފައެވެ. އެހެންކަމުން، މުބާރާތުގައި ބައިވެރިވާ ކޮންމެ ގައުމަކަށް މަދުވެގެން 10.5 މިލިއަން ޑޮލަރު ކަށަވަރުވާނެއެވެ. ފީފާގެ ރައީސް ޖިއާނީ އިންފަންޓީނޯ ވިދާޅުވީ، މިއީ ދުނިޔޭގެ ފުޓްބޯޅަ އާއިލާއަށް މާލީ ގޮތުން ބޮޑު އެހީތެރިކަމެއް ލިބިގެންދާނެ ތާރީޚީ ނިންމުމެއް ކަމަށެވެ.
ޓިކެޓް އަގުތަކާ ގުޅިގެން އާންމުންގެ ޝަކުވާ ބޮޑުވުމާ ގުޅިގެން، ފީފާއިން ވަނީ 45 ޕައުންޑުގެ އަގުހެޔޮ ޓިކެޓްތަކެއްވެސް ތައާރަފްކޮށްފައެވެ. ނަމަވެސް ފުޓްބޯޅަ ސަޕޯޓަރުންގެ ޖަމިއްޔާތަކުން ބުނަމުންދަނީ މިއީ އެކަށީގެންވާ މިންވަރެއް ނޫން ކަމަށާއި، ވޯލްޑް ކަޕަކީ އާންމު ސަޕޯޓަރުންނަށް އަތްފޯރާ ފަށުގައި ބޭއްވޭ މުބާރާތަކަށް ހަދަންޖެހޭ ކަމަށެވެ. އިނގިރޭސި ބޮޑުވަޒީރު ސަރ ކިއަރ ސްޓާމަރ ވެސް ވަނީ ޓިކެޓް އަގުތައް އިތުރަށް ހެޔޮކުރުމަށް ފީފާއަށް ބާރުއަޅުއްވާފައެވެ.
ނިއުޔޯކް ސިޓީގެ މޭޔަރުކަމަށް އިންތިޚާބުވެވަޑައިގެންފައިވާ ޒޯހްރާން މަމްދާނީ ވިދާޅުވީ، “އެންމެ 1.6 އިންސައްތަ ގޮނޑިއަށް 60 ޑޮލަރުގެ ޓިކެޓެއް ދިނުމަކުން ނުފުދޭ” ކަމަށެވެ. އޭނާ ވަނީ ރީސޭލް އަގުތައް ކޮންޓްރޯލްކޮށް، ލޯކަލް ސަޕޯޓަރުންނަށް 15 އިންސައްތަ ޓިކެޓް ޚާއްޞަކުރުމަށް ގޮވާލާފައެވެ.
މީގެ އިތުރުން، ހަނގުރާމަވެރި ސަރަހައްދުތަކުގައި ފުޓްބޯޅަ ކުރިއަރުވައި، އެއްބައިވަންތަކަން ގާއިމުކުރުމަށްޓަކައި ‘ޕޯސްޓް-ކޮންފްލިކްޓް ރިކަވަރީ ފަންޑް’ އެއް އުފެއްދުމަށްވެސް ފީފާ ކައުންސިލުން ވަނީ ފާސްކޮށްފައެވެ. މިއީ 2025 ވަނަ އަހަރުގެ ސަމިޓެއްގައި އިންފަންޓީނޯ ވެވަޑައިގެންނެވި ވައުދެއްގެ ދަށުން ކުރިއަށްގެންދާ މަޝްރޫއެކެވެ.
