މިނިސްޓްރީ އޮފް ޔޫތު އެމްޕަވާމަންޓް، އިންފޮމޭޝަން އެންޑް އާޓްސްއިން އިންތިޒާމުކޮށްގެން ބާއްވާ “އޯޕަން ޑޭ 2026” ފަށައިފިއެވެ. ދެ ދުވަހުގެ މުއްދަތަށް ކުރިއަށް ގެންދާ މި ހަރަކާތް އިއްޔެ ފަށާފައިވާއިރު، މިއަދަކީ މި ހަރަކާތުގެ ފަހު ދުވަހެވެ. މިއަދުގެ ހަރަކާތްތައް ކުރިއަށްދާނީ ހަވީރު 4:00 އިން ފެށިގެން ރޭގަނޑު 11:00 އާ ހަމައަށެވެ.
ޒުވާނުންނަށް ހާއްސަކޮށްގެން ބާއްވާ މި އިވެންޓުގެ މައިގަނޑު މަގުސަދަކީ، މިނިސްޓްރީގެ ދަށުން ހިންގާ އޮފީސްތަކާއި ޑިޕާޓްމަންޓްތަކުގެ މަސައްކަތްތައް ރައްޔިތުންނަށް ދައްކާލައި، އެތަންތަނުން ލިބެން ހުރި ވަޒީފާގެ ފުރުސަތުތަކާއި ހިދުމަތްތަކުގެ މައުލޫމާތު ފޯރުކޮށްދިނުމެވެ. މި އިވެންޓުގައި ނެޝަނަލް ލައިބްރަރީ، ގައުމީ އަރުޝީފް، އެންސީބީ، އަދި ނެޝަނަލް ސެންޓަރ ފޯ ދަ އާޓްސް (އެންސީއޭ) ގެ ސްޓޯލްތައް ވަނީ ހުޅުވާފައެވެ.
އޯޕަން ޑޭގައި ކުރިއަށްދާ ހާއްސަ ކަންތައްތަކުގެ ތެރޭގައި:
އެންސީއޭ ސްޓޯލް: ލައިވް ކަރޯކޭ ކިޔުމާއި، ކުރެހުމާއި، މިއުޒިކް ކުޅުމުގެ ފުރުސަތު ލިބިގެންދާނެއެވެ. އަދި އާޓިސްޓިކް ޑައިރެކްޓަރީގައި ރަޖިސްޓްރީވުމުގެ ފުރުސަތު ވެސް އޮންނާނެއެވެ.
ނެޝަނަލް ލައިބްރަރީ ސްޓޯލް: ވަޒީފާގެ ފުރުސަތުތަކުގެ މައުލޫމާތާއި، ލައިބްރަރީގެ ހިދުމަތްތައް ތަޖުރިބާކޮށްލުމުގެ އިތުރުން ތަފާތު ގޭމްތައް ކުޅެވޭނެއެވެ.
ޔޫތު ހެލްތު އެންޑް ވެލްބީއިން: މި ސްޓޯލުން ހިލޭ ހެލްތު ސްކްރީނިންގ ހަދައިދިނުމަށް ވަނީ ހަމަޖެހިފައެވެ.
ވަޒީފާގެ މައުލޫމާތު: ޔޫތު ޑިޕާޓްމަންޓްގެ ސްޓޯލުން، އެކި ޑިޕާޓްމަންޓްތަކުގައި ހުރި ހުސް ވަޒީފާތަކާ ގުޅޭ މައުލޫމާތު ލިބިގެންދާނެއެވެ.
މި ހަރަކާތަށް ޒިޔާރަތްކުރާ ފަރާތްތަކަށް ހާއްސަ އިނާމުތަކާއި “ސަޕްރައިޒް” ތައް ލިބުމުގެ ފުރުސަތު އޮތްއިރު، މިއުޒިކީ ފަންނާނުންގެ ލައިވް ޕަފޯމަންސްތައް ވެސް މިރޭ ފެނިގެންދާނެއެވެ.
