އައްޑޫ ސިޓީގައި ހިތުގެ ބަލިތަކަށް ދެވޭ ފަރުވާ އިތުރަށް ފުޅާކުރުމުގެ ގޮތުން އައްޑޫ އިކުއަޓޯރިއަލް ހޮސްޕިޓަލުގައި ގާއިމްކުރި ކެތެޓަރައިޒޭޝަން ލެބޯޓަރީ (ކެތު ލެބު) ގެ ހިދުމަތް އިއްޔެ ފަށައިފިއެވެ.
މާލެއިން ބޭރުގައި ގާއިމުކުރި ފުރަތަމަ ކެތު ލެބުގެ ހިދުމަތް ފެށުމާއި ގުޅިގެން މާލެ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހީމް އަބްދުއްރައްޒާގް ހަލީމް ވިދާޅުވީ، ކެތު ލެބުގެ ހިދުމަތް ފެށުމަށްޓަކައި ގިނަ މަސައްކަތްތަކެއް ކޮށްފައިވާ ކަމަށެވެ. އައްޑޫ ސިޓީގައި ކެތު ލެބުގެ ހިދުމަތް ފެށިގެން މިދިޔައީ ސަކޭތަ އިންސައްތަ ދިވެހިންނާ އެކުގައި ކަން ފާހަގަކޮށް އަބްދުއްރައްޒާގް ވިދާޅުވީ ބޭނުންވަނީ ދިވެހިންގެ އަތްމަތީގައި ބާއްވައިގެން ސިއްހީ ހިދުމަތްތައް ފުޅާކުރުން ކަމަށެވެ. މީގެ އިތުރުން އޭނާ ވިދާޅުވީ މި ހިދުމަތް ފެށުމަކީ ސަރުކާރުން އަތޮޅު ތެރޭގެ ސިއްހީ ހިދުމަތް ފުޅާކުރުމަށް ކުރިޔަށްގެންދާ މަސައްކަތްތަކަށް ލިބުނު ބޮޑު ކުރިއެރުމެއް ކަމުގެވެ.
އައްޑޫ އިކުއެޓޯރިއަލް ހޮސްޕިޓަލުގެ ސީއީއޯ އިބްރާހިމް ޔާސިރު ވިދާޅުވީ، އައްޑޫގައި ކެތު ލެބު ގާއިމްކުރީ 2023 ގައި ނަމަވެސް ހިދުމަތް ނުފެށި ގިނަ ދުވަސްތަކެއް ވެފައިވާ ކަމަށެވެ. މި ސަރުކާރުން ކުރެއްވި މަސައްކަތުން ކެތު ލެބުގެ މަސައްކަތް ފެށުމަކީ، މުޅި ދެކުނުގެ އަތޮޅުތަކަށްވެސް ލިބުނު ކުރިއެރުމެއްކަން ފާހަގަކުރައްވަމުން ޔާސިރު ވިދާޅުވީ އައިޖީއެމްއެޗާއެކު މި މަސައްކަތް ފެށުމަކީވެސް ލިބުނު ކުރިއެރުމެއް ކަމަށެވެ. އަދި ދެ ހޮސްޕިޓަލް ގުޅިގެން އަދިވެސް ގިނަ މަސައްކަތްތަކެއް ކުރަން އެބަހުރި ކަމަށް ޔާސިރު ވިދާޅުވިއެވެ.
އައިޖީއެމްއެޗް އިން ބުނީ ދެ ހޮސްޕިޓަލް ދެމެދުގައި ވެވުނު އެއްބަސްވުމުގެ ދަށުން އައިޖީއެމްއެޗްގެ ހިތުގެ ބަލިތަކާ އިންޓަވެންޝަނަލް ކާޑިއޮލޮޖީ ގެ ޓީމެއް ކޮންމެ ދެ ހަފްތާއިން އެއްފަހަރު އައްޑޫ އަށް ޒިޔާރަތްކުރާނެ ކަމަށެވެ. މި ޓީމުގައި އިންޓަވެންޝަނަލް ކާޑިއޮލޮޖިސްޓުންނާ، ކެތު ލެބު ޓެކްނީޝަނުންގެ އިތުރުން ތަޖުރިބާކާރު ނަރުހުން ހިމެނޭކަމަށް އެ ހޮސްޕިޓަލުން ވަނީ ބުނެފައެވެ.
އިތުރަށް އައިޖީއެމްއެޗް އިން ބުނީ އައްޑޫގައި މި ހިދުމަތް ތައާރަފުކުރެވުމާއެކު މިހާތަނަށް، 6 ބަލި މީހަކަށް ފަރުވާދެވިފައިވާ ކަމަށެވެ. މިއީ މުޅި ދެކުނުގެ ރައްޔިތުން ހިތުގެ ބަލީގެ ފަރުވާ ހޯދުމަށް މާލެއަށް ބަރޯސާވާންޖެހޭ މިންވަރު ކުޑަކޮށްދީ އަމިއްލަ ރަށުގައި ތިބެގެން ފެންވަރު ރަނގަޅު ހިދުމަތް ހޯދުމަށް ފަހިވެގެންދިޔަ ފުރުސަތެއް ކަމަށެވެ.
