އުރީދޫ މޯލްޑިވްސްއިން މިއަހަރަށް ހާއްސަކޮށްގެން ތައްޔާރުކުރި ކަލަންޑަރު ނެރެފިއެވެ. “ޓީ ވިތު އުރީދޫ” ގެ ތީމަށް ނެރުނު މި ކަލަންޑަރަކީ ދިވެހިންގެ މެދުގައި މަގުބޫލު ބުއިމެއް ކަމަށްވާ ސައިގެ އެކި ރަހަތައް ތަޖުރިބާކޮށްލެވޭ ގޮތަށް ފަރުމާކޮށްފައިވާ ތަފާތު ކަލަންޑަރެކެވެ.
މި ކަލަންޑަރު ލޯންޗުކޮށްފައިވަނީ އެކަމަށްޓަކައި އުރީދޫގެ މައި އޮފީހުގައި ބޭއްވި ހާއްސަ ރަސްމިއްޔާތެއްގައެވެ. މި ރަސްމިއްޔާތުގައި އުރީދޫގެ މެނޭޖިން ޑިރެކްޓަރު އަދި ސީއީއޯ ހާލިދު އަލް ހަމާދީ ވިދާޅުވީ، އުރީދޫގެ ކަލަންޑަރަކީ އަބަދުވެސް ދިވެހިންގެ އާދަކާދަތަކާ ގުޅުވައިގެން ތައްޔާރުކުރާ އެއްޗެއް ކަމަށެވެ. އެގޮތުން ސައި ބުއިމަކީ ދިވެހިންގެ ސަގާފަތުގެ ތެރޭގައި ހިމެނޭ މުހިންމު ކަމަކަށް ވާތީ، މިއަހަރުގެ ކަލަންޑަރު ހާއްސަކުރީ އެކަމަށް ކަމަށް އޭނާ ފާހަގަކުރެއްވިއެވެ.
މި ކަލަންޑަރުގެ އެންމެ ހާއްސަ ސިފައަކީ، ކަލަންޑަރާއެކު ލިބޭ ލަކުޑި ފޮއްޓެވެ. މި ފޮށީގައި އެކި ރަހަތަކުގެ ސައިފަތް ބަންދުކޮށްފައި ހުރެއެވެ. ކަލަންޑަރުގެ ކޮންމެ މަހެއް ހާއްސަކޮށްފައިވަނީ ސައި ތައްޔާރުކުރުމަށް އިންފިއުޒް ކުރާ ވަކި މޭވާއެއް، މަލެއް ނުވަތަ ހާބަކަށެވެ. އަދި އެ އެއްޗެއްގެ ނަން ދިވެހި ބަހުންނާއި އިނގިރޭސި ބަހުން ހިމަނައި، އެއިން ލިބޭ ރަހަތަކާ ގުޅޭ މައުލޫމާތު ވެސް ކަލަންޑަރުގައި ހިމަނާފައިވެއެވެ.
މިއަހަރުގެ ކަލަންޑަރު ތިން ވައްތަރަކަށް ނެރެފައިވެއެވެ. އެއީ އާންމުކޮށް ގޭގޭގައި ހަރުކުރާ ވޯލް ކަލަންޑަރާއި، އޮފީސް މޭޒުމަތީގައި ބަހައްޓާ ޑެސްކް ކަލަންޑަރުގެ އިތުރުން ޑިޖިޓަލް ކަލަންޑަރެވެ. މީގެ ތެރެއިން ޑިޖިޓަލް ކަލަންޑަރު ފަރުމާކޮށްފައިވަނީ ޒަމާނީ ޓެކްނޮލޮޖީގެ އެހީގައި، އޭއައި ނުވަތަ އާޓިފިޝަލް އިންޓެލިޖެންސް ބޭނުންކޮށްގެން ހަދާފައިވާ ވީޑިއޯތަކެއް ހިމެނޭ ގޮތަށެވެ.
އުރީދޫއިން ކޮންމެ އަހަރަކު ވެސް ނެރޭ ކަލަންޑަރަކީ އާންމުންގެ މެދުގައި ބޮޑު ތަރުހީބެއް ލިބޭ އެއްޗެކެވެ. މިއަހަރުގެ ކަލަންޑަރު މެދުވެރިކޮށް ދިވެހި ސަގާފަތާއި ޒަމާނީ ޓެކްނޮލޮޖީ ގުޅުވާލައި، ކަސްޓަމަރުންނަށް ތަފާތު ތަޖުރިބާއެއް ގެނެސްދީފައިވާކަން ފާހަގަކޮށްލެވެއެވެ.
