English Edition
Dhivehi Edition
ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާ ބެހޭ ވަޒީރު އާދަމް ޝަރީފް
މިނިސްޓްރީ އޮފް ސިޓީސް، ލޯކަލް ގަވަމަންޓް އެންޑް ޕަބްލިކް ވޯކްސްއިން ކުރިއަށް ގެންދާ އެއްވެސް ކަމެއް ދައުލަތުގެ މާލިއްޔަތު ގާނޫނާ ހިލާފަށް ނުކުރާނެ ކަމުގެ ޔަގީންކަން އެ މިނިސްޓްރީގެ މިނިސްޓަރު އާދަމް ޝަރީފް އުމަރު ދެއްވައިފިއެވެ.
މިނިސްޓަރު މިކަމުގެ ޔަގީންކަން ދެއްވީ، މި ފެށުނު 2026 ވަނަ އަހަރުގެ މުނާސަބަތުގައި މިއަދު އެ މިނިސްޓްރީގެ މުވައްޒަފުންނާ ބައްދަލުކުރައްވައި ވާހަކަދައްކަވަމުންނެވެ.

މި ބައްދަލުވުމުގައި މިނިސްޓަރު ވިދާޅުވީ މަޝްރޫއުތަކުގެ ފައިނޭންސިންއާ ގުޅޭ މަސައްކަތްތައް ކުރިއަށް ގެންދަނީ ސަރުކާރުން ކަނޑައަޅާފައިވާ އުސޫލުތަކާ އެއްގޮތަށް ކަމަށެވެ. އަދި މަސައްކަތުގެ މާހައުލުގައި ކަރަޕްޝަނަށް މަގުފަހިވެދާނެ ފަދަ އެއްވެސް އަމަލެއް ނުހިންގުމަށާއި، ކޮންމެ މުވައްޒަފަކު ވެސް ނަޒާހަތްތެރިކަން އިސްކޮށްގެން މަސައްކަތް ކުރުމަށް މިނިސްޓަރު ވަނީ ހުރިހާ މުވައްޒަފުންނަށް އިލްތިމާސްކުރައްވާފައެވެ.

މީގެ އިތުރުން، މުވައްޒަފުންނާ ހަވާލުކުރެވޭ މަސައްކަތްތައް ހާމަކަން ބޮޑު ގޮތެއްގައި ކުރުމަށް މިނިސްޓަރު ގޮވާލެއްވިއެވެ. މިއަދުގެ ބައްދަލުވުމުގައި މިނިސްޓަރު ވަނީ މިހާރު ކުރިއަށްދާ މަޝްރޫއުތަކާއި މިއަހަރަށް ރާވާފައިވާ ކަންކަމުގެ މައުލޫމާތު މުވައްޒަފުންނާ ހިއްސާކުރައްވާފައެވެ.