ޖަލު ހުކުމް ފިޔަވައި އެހެން އަދަބުތައް ތަންފީޒުކުރުމާއި، މުޖުތަމައުގެ މައްޗަށް ބިނާކޮށް ހުކުމް އިއްވުމާއި ރިހެބިލިޓޭޝަންގެ ސްޓްރަކްޗަރޑް މަގުތައް ހަރުދަނާކުރުމަށް މޯލްޑިވްސް ކަރެކްޝަނަލް ސާވިސް (އެމްސީއެސް) އިން ހުވަދުއަތޮޅު ދެކުނުބުރީ އަތޮޅު ކައުންސިލާ އެކު އެއްބަސްވުމެއްގައި ސޮއިކޮށްފިއެވެ.
މިއެއްބަސްވުމުގައި މޯލްޑިވްސް ކަރެކްޝަނަލް ސަރވިސްގެ ފަރާތުން ކޮމިޝަނަރ އޮފް ޕްރިޒަންސް ޙަސަން ޒަރީރު ސޮއިކުރައްވާފައިވާ އިރު، ހުވަދުއަތޮޅު ދެކުނުބުރީ އަތޮޅު ކައުންސިލްގެ ފަރާތުން ސޮއިކުރެއްވީ ކައުންސިލްގެ ރައީސް އަލްފާޟިލް ޙަސަން ފައިހަތު ޤުދުރަތުﷲ އެވެ.
އެއްބަސްވުމުގެ ތެރެއިން ކޯޓު އަމުރެއްގެ ދަށުން ވަކި ތައުލީމީ ނުވަތަ ރިހެބިލިޓޭޝަން ޕްރޮގްރާމްތަކުގައި ބައިވެރިވުމަށް ހަވާލުކުރެވޭ ގައިދީންނަށް ކައުންސިލުން އެހީތެރިވެދެވޭނެއެވެ. އަދި ހުވަދުއަތޮޅު ދެކުނުބުރީ އަތޮޅު ކައުންސިލުން ސަރުކާރުގެ އިދާރާތަކާއި އަމިއްލަ ކުންފުނިތަކާ ގުޅިގެން ހުނަރު ތަރައްގީކުރުމާއި ތައުލީމާއި ސުލޫކީ މިންގަނޑުތައް އިސްލާހު ކުރުމަށް އަމާޒުކޮށްގެން ފާސްކޮށްފައިވާ ޕްރޮގްރާމްތަކުގައި ގައިދީން ބައިވެރިވުމަށް މަގުފަހިކޮށްދިނުމަށް އެމްސީއެސްއަށް އެހީތެރިވެދޭނެއެވެ.
މީގެ އިތުރުން ކޮމިއުނިޓީ ސާވިސްއާއި ގުޅުންހުރި އަމުރުތަކަށް އެހީތެރިވުމަށްޓަކައި، ލޯކަލް އެންޖީއޯތަކާއި އެހެނިހެން ސަރަހައްދީ އިދާރާތަކާ ކޯޑިނޭޓްކޮށްގެން އެ ސަރަހައްދުގައި ހިންގާ ކޮމިއުނިޓީ ހަރަކާތްތަކުގެ މައުލޫމާތު ކައުންސިލުން ހިއްސާކުރާނެއެވެ. މީގެ ތެރޭގައި އާންމުންނަށް ފައިދާހުރި މާނަހުރި ހިދުމަތުގެ ފުރުސަތުތައް ދެނެގަތުމުގައި އެމްސީއެސްއަށް ލޮޖިސްޓިކަލް އަދި އިދާރީ އެހީތެރިކަން ފޯރުކޮށްދިނުން ހިމެނެއެވެ.
އަދި ރިހެބިލިޓޭޝަންގައި މުޖުތަމައު ބައިވެރިވުމުގެ މުހިންމުކަމާ މެދު އާންމުން ހޭލުންތެރިކުރުވުމުގައި ކައުންސިލުން އަދާކުރާ ދައުރު ވެސް މި އެއްބަސްވުމުގައި އަލިއަޅުވާލާފައިވެއެވެ. ކުށްވެރިން ބަލައިގަތުމާއި މުޖުތަމައުގެ ތެރެއަށް އަލުން ވަނުމަށް މުޖުތަމައުގެ ތާއީދު ހަރުދަނާ ކުރުމަށް ފަރުމާކޮށްފައިވާ އާންމު ތައުލީމީ ހަރަކާތްތައް ހިންގުމުގައި ހުވަދުއަތޮޅު ދެކުނުބުރީ އަތޮޅު ކައުންސިލުން އެމްސީއެސްއަށް އެހީތެރިވެދޭނެއެވެ.
