ބޮލީވުޑްގެ ތަރި ޕަރިނީތީ ޗޯޕްޅާ އަލަތު ދަރިފުޅަށް ބަލިވެއިންކަން އިއުލާން ކޮށްފިއެވެ.
އިންސްޓަގްރާމް ޕޯސްޓެއްގައި ޕަރިނީތީ ކޭކެއްގެ ފޮޓޯ ހިއްސާ ކުރިއިރު އޭގައި ކުޑަކުއްޖެއްގެ ފައިތިލަޔާ އެކު ލިޔެފައިވަނީ 1+1 =3 އެވެ. ދެވަނަ ސްލައިޑްގައި ފެންނަނީ ފިރިމީހާ ރަގަވް ޗައްދާ އާއި އެކު އަތުގުޅުވާލައިގެން ޕާކެއްގެ ތެރޭގައި ހިނގާފައި ދަނިކޮށް ފުރަގަހުން ނަގާފައިވާ ވީޑިއޯއެކެވެ. އަދި އޭގެ ކެޕްށަންގައި ‘އަވާ ލިޓްލް ޔުނިވާރސް އޮންއިޓްސްވޭ’ މިހެން ލިޔެފައިވެއެވެ.
ޕަރިނީތީ ބަލިވެއިންކަން ހާމަކުރިއިރު ބަނޑަށްވީ ކިތައް މަސްކަމެއް އަދި ވިހާނެ ތާރީހެއްވެސް ބުނެފައި ނުވެއެވެ.
ޕަރިނީތީ އާއި ރަގަވް ރައްޓެހިވެގެން އުޅޭކަން މީޑިޔާގެ ސަމާލުކަމަށް އައީ މާރޗް 2023 ގައެވެ. ހަމަ އެއަހަރު ސެޕްޓެމްބަރ މަހު މިދެމީހުން ކުލަގަދަ ހަފްލާ އަކާއެކު ކައިވެނިކުރިއެވެ.
ޕަރިނީތީ ކައިވެންޏަށްފަހު އެންމެ ފަހުން ފެނިގެންދިޔައީ ނެޓްފްލިކްސް އިން ދެއްކި ފިލްމެއް ކަމަށްވާ ‘އަމަރސިންގ ޗަމްކިލާ’ އިންނެވެ.
