އިސްލާމްދީނުގެ ހަމަތަކާއި އުޞޫލުތަކުގެ ބޭރުން ސަގާފީ ހަރަކާތްތައް ކުރިއަށްގެންދިއުމަކީ މި ސަރުކާރުގެ ސިޔާސަތެއް ނޫންކަމަށް ދިވެހިބަހާއި ސަގާފަތާއި ތަރިކައާބެހޭ ވަޒީރު އާދަމް ނަޞީރު އިބްރާހިމް ވިދާޅުވެއްޖެއެވެ.
ވަޒީރު މިހެން ވިދާޅުވީ މި އަހަރުގެ ފިޠުރު ޢީދު ފާހަގަކުރުމަށް ދިވެހިބަހާ ބެހޭ ވުޒާރާއިން ކުރިއަށްގެންދިޔަ ހިއްޗަށް ވަޑައިގަތުމުގެ ހަރަކާތާ ގުޅޭގޮތުން ބައެއް ފަރާތްތަކުން ފާޑުކިޔުމާ ގުޅިގެންނެވެ.
ހިއްޗަށް ވަޑައިގަތުމުގެ ހަރަކާތް ކުރިއަށްގެންދިޔައިރު، އިހުގައި ހަރަކާތް ކުރިއަށްގެންދިޔަ ގޮތާއި ތަފާތުކޮށް އެ ހަރަކާތް ކުރިއަށްގެންދިޔަކަން ފާޑުކީ ފަރާތްތަކުން ފާހަގަކުރުމާއި ގުޅިގެން ވަޒީރު ވިދާޅުވީ ފިތުރު އީދާ ގުޅުވައިގެން މާލޭގެ މަގުމަތީގައި ބޭއްވި “ހިއްޗަށް ވަޑައިގަތުމުގެ ދަރުބާރު” ތަމްސީލު ގެނެސްދިނީ އޭގެ އަސްލު ނުގެއްލޭ ގޮތަށް ކަމަށާއި ދީނާ ފުށުއަރާ ގޮތަށް ކުރީ ޒަމާނުގައި ކުރި ބައެއް ކަންތައް ތަމްސީލުން އުނިކުރެވިފައިވާ ކަމަށެވެ.
ވަޒީރު ވިދާޅުވީ މި ހަރަކާތް އިންތިޒާމުކޮށްފައިވަނީ ވުޒާރާއިން އެކުލަވާލި ޚާއްޞަ ކޮމިޓީއަކުން ކަމަށެވެ. މި ކޮމިޓީގައި ހިމެނެނީ ހިއްޗަށް ވަޑައިގަތުމުގެ ރަސްމިއްޔާތު ދުށް މީހުންނާއި ތާރީޚު ޢިލްމުވެރިންނެވެ. ޒަމާނަށް ފެތޭގޮތަށް ބައެއް ބަދަލުތައް ގެނެސްފައިވާ ކަމަށާއި، އޭގެ ތެރޭގައި ކުރީގައި ލޮންސި ވެރިން ތިބެނީ މަތި ހަށި ހުސްކޮށް ނަމަވެސް، މިފަހަރު އެ މީހުން ބައިވެރިވެފައިވަނީ ފޮތި ލިބާސް ލައިގެން ކަމަށް ވަޒީރު ފާހަގަކުރެއްވިއެވެ.
ވަޒީރު ވިދާޅުވީ ހިއްޗަށް ވަޑައިގަތުމުގެ ހަރަކާތުގެ ތަމްސީލު ހުށައަޅާއިރު، ޒަމާނަށް ފެއްތުމުގެ ގޮތުން ބައެއް ބަދަލުތައް ގެނައުމަށް ކޮމިޓީން ނިންމެވި ކަމަށެވެ. އަދި އެ ހަރަކާތުގައި އިސްލާމް ދީނަށް ފުށުއަރާ ގޮތަށް އެ ޒަމާނުގައި ކުރި ބައެއް ކަންކަންވެސް ތަމްސީލުން އުނިކުރެއްވިކަމަށް ވަޒީރު ވިދާޅުވިއެވެ.
ހިއްޗަށް ވަޑައިގަތުމުގެ ރަސްމިއްޔާތަކީ ދިވެހި ރަސްރަސްކަލުން ރޯދަމަހުގެ ތެރޭގައި ބާއްވަވާފައިވާ ހައިބަވަންތަ ރަސްމިއްޔާތެކެވެ.
