ރޭ މެންދަމުގެ ވަގުތެއްގައި ގ. އުފުރިޔާގައި ހިނގި އަލިފާނުގެ ހާދިސާއާއި ގުޅިގެން އެކަކަށް ނެޝަނަލް ޑިޒާސްޓާ މެނޭޖްމެންޓް އޮތޯރިޓީ (އެމްޑީއެމްއޭ)އިން އެހީތެރިކަން ފޯރުކޮށްދީފިއެވެ.
އެމްއެންޑީއެފް ފަޔަރ އެންޑް ރެސްކިޔު ސަރވިސްއަށް މި ހާދިސާގެ މައުލޫމާތު ރޭ 23:23 ހާއިރު ލިބުމާ އެކު ފަޔަރފައިޓަރުން ވަނީ އެ ސަރަހައްދަށް ގޮސް އަލިފާން ނިއްވުމުގެ މަސައްކަތް ކޮށްފައެވެ. މިގޮތުން ފަޔަރފައިޓަރުން ކުރި މަސައްކަތުން އަލިފާންގަނޑު އެއްކޮށް ނިއްވާލާފައިވަނީ 00:10 ހާއިރުކަމަށް އެމްއެންޑީއެފް އިން ވަނީ ބުނެފައެވެ.
މި ހާދިސާގައި އަލިފާން ރޯވި އެޕާޓްމެންޓްގެ އެއް ކޮޓަރި ވަނީ ބޭނުން ނުކުރެވޭވަރަށް އަނދާފައެވެ. އަދި އިމާރާތުގެ ހުރިހާ ފުލޯއަކުން މީހުން ހުސްކޮށް ވަނީ އިވެކުއޭޓް ކޮށްފައެވެ. އަލިފާން ރޯވެފައި ވަނީ ހަވަނަ ފަންގިފިލާގެ އެޕާޓްމެންޓް ބީގައި ނަމަވެސް އަލިފާން އިތުރު އެހެން ދިމާލަކަށް ފެތުރިފައެއް ނުވެއެވެ.
މި ހާދިސާގައި އެއްވެސް މީހަކަށް އަނިޔާއެއް ލިބިފައެއް ނުވެއެވެ. ނަމަވެސް ދުމުގެ އަސަރުކޮށްގެން އުމުރުން ދުވަސްވީ މީހަކު ވަނީ ހޮސްޕިޓަލަށް ގެންގޮސްފައެވެ.
