މިފެށޭ އަހަރަކީ އިސްލާމީ ކަންތައްތަކާބެހޭ ވުޒާރާއިން އައު ގިނަ ކަންތައްތަކެއް ފަށާނެ އަހަރަކަށް ވާނެކަމަށް އިސްލާމީ ކަންތައްތަކާބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު ވިދާޅުވެއްޖެއެވެ.
އިސްލާމީ ކަންތައްތަކާ ބެހޭ ވުޒާރާގެ 2025 ވަނަ އަހަރުގެ އެކްޝަން ޕްލޭނާއި، އެކްޓިވިޓީ ކަލަންޑަރާއި، ރިސާލަތު ޕްރޮގްރާމް 2025، އަދި ނަމާދު މަތިވެރިކުރުމުގެ ޕްރޮގްރާމް ލޯންޗު ކުރުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން ވަޒީރު ވިދާޅުވީ 2025 ވަނަ އަހަރު ވާނީ އިސްލާމީ ކަންތައްތަކާ ބެހޭ ވުޒާރާއިން މުހިއްމު މަސައްކަތްތަކެއް ކުރައްވާނެ އަހަރެއްކަމަށެވެ. އަދި ރައީސް ޑރ. މުޙައްމަދު މުޢިއްޒުގެ މެނިފެސްޓޯގައިވާ އިސްލާމީ ނޫރު ދިވެހި ރާއްޖެއަށް ފެތުރުމުގެ މުހިންމު މަސްއޫލިއްޔަތު އެ ވުޒާރާއިން ކުރިއަށް ގެންދަނީ ވަރަށް ވެސް މަތިވެރި އަޒުމާއި އިޚްލާސްތެރިކަމާ އެކު ދިވެހި އުންމަތުގެ ތެރޭގައި އިސްލާމްދީނުގެ ހިދާޔަތުގެ ނޫރު ފެތުރުމަށްޓަކައި ކަމަށް ވަޒީރު ވިދާޅުވިއެވެ.
2025 ވަނަ އަހަރުގެ އެކްޝަން ޕްލޭނާއި ގުޅޭގޮތުން ވާހަކަފުޅު ދައްކަވަމުން ވަޒީރު ވިދާޅުވީ މި އަހަރު ވަޤުފް އިމާރާތްތައް އާރާސްތުކޮށް ރާއްޖޭގައި ޒަކާތު ހައުސްގެ އިމާރާތެއް އެޅުމުގެ މަސައްކަތް ފަށާނެ އަހަރަކަށް ވާނެކަމަށެވެ.
ވަޒީރު ވިދާޅުވީ މި އަހަރު ކުރިއަށްގެންދިޔުމަށް އެކުލަވާލާފައިވާ ކަންކަމަކީ ވަރަށް މުހިއްމު މަސައްކަތްތަކުގެތެރެއިން ކުރިއަށް ގެންދާނެ މަޝްރޫޢުތަކެއްކަމަށެވެ. މިގޮތުން ފެށުމަށް ހަމަޖެހިފައިވާ “ނަމާދު” މަޝްރޫޢުއަށް އަލިއަޅުވާލައްވަމުން ވަޒީރު ވިދާޅުވީ މިފަދަ މަޝްރޫޢުއެއް ކުރިއަށްގެންދިޔުމުގެ ބޭނުންމަކީ ރައްޔިތުންނަށް ނަމާދު ކުރުމުގެ މުހިއްމުކަން އަންގައިދީ އެކަން ހަނދާންކޮށްދިނުންކަމަށެވެ. މި މަޝްރޫއުގެ ދަށުން އެކި ޕްރޮގްރާމްތައް ގެނެސްދިނުމާއި ގެތަކަށް އިލްމުވެރިން ޒިޔާރަތްކޮށް ހޭލުންތެރިކުރުވުން ހިމެނޭކަމަށް ވަޒީރު ވިދާޅުވިއެވެ.
ރިސާލާތު ޕްރޮގްރާމްއާ ގުޅޭގޮތުން ވަޒީރު ވިދާޅުވީ 2024 ވަނަ އަހަރު އެ ޕްރޮގްރާމް “އިސްލާމް ދީނުގެ އަޤީދާ”ގެ މައްޗަށް ކުރިއަށްގެންދިޔަ ނަމަވެސް މިފަހަރުގެ ޕްރޮގްރާމް ކުރިއަށްގެންދާނީ އައު މަޢުލޫމާތުތައް ހިމަނައިގެން ކަމަށެވެ. އެގޮތުން މިފަހަރުގެ ރިސާލާތު ޕްރޮގްރާމް ކަނޑައަޅާފައިވަނީ އިސްލާމީ އަޚްލާގު ރާއްޖޭގައި ފެތުރުމުގެ މައްޗަށްކަން ވަޒީރު ފާހަގަކުރެއްވިއެވެ. އަދި މި ޕްރޮގްރާމް ފަރުމާކޮށްފައިވަނީ އިސްލާމްދީނުގެ އެންމެ މަތިވެރި 5 މަޤްޞަދުގެ އަލީގަކަންވެސް ވަޒީރު ފާހަގަކުރެއްވިއެވެ.
