ދިވެހި ފުލުހުންގެ ޚިދުމަތުން މިހާރު ހިންގަމުން ގެންދާ، ގެދޮރުވެރިޔާ އަދި ބިންވެރިޔާ ސްކީމާގުޅޭ މައްސަލައިގެ ތަހުގީގުގަށް މައުލޫމާތު އެއްކުރުމަށް ގާއިމްކުރި ޕޯޓަލްއަށް މިހާތަނަށް ޖުމުލް 16 ފަރާތަކުން މައުލޫމާތު ހުށަހަޅާފައިވާ ކަމަށް ފުލުހުން ވިދާޅުވެއްޖެއެވެ.
ފުލުހުން ގެ މުއައްސަސާއިން ވިދާޅުވީ ޕްރޮސެކިއުޓާ ޖެނެރަލް އައްބާސް ޝަރީފްގެ އަމުރަކަށް ގެދޮރުވެރިޔާ ސްކީމާއި ބިންވެރިޔާ ސްކީމާ ގުޅޭ ހާއްސަ ތަހުގީގެއް ފުލުހުންނާއި އޭސީސީން ފަށާފައިވާތީ، ހެކި ހޯދަން ފުލުހުން ގާއިމްކުރި ޕޯޓަލަށް މިދިޔަ 10 ވަރަކަށް ދުވަހުގެ ތެރޭގައި 16 މީހަކު ތަހުގީގަށް ބޭނުންވާ މައުލޫމާތު ދީފައިވާއިރު، އޭގެ ތެރެއިން ހަތަރު މީހަކު ވަނީ މައްސަލަތަކާ ގުޅުން ހުރި ލިޔުންތައް ޕޯޓަލް މެދުވެރިކޮށް ހުށަހަޅާފައި ކަމަށެވެ.
ފުލުހުންގެ މި ހާއްސަ ޕޯޓަލް މެދުވެރިކޮށް ތަހުގީގަށް މައުލޫމާތު ދޭން ހުޅުވާލީ މި މަހުގެ 21 ވަނަ ދުވަހުގެ ރޭގައެވެ.
އަދި މިހާރު ވެސް މި ޕޯޓަލް މެދުވެރިކޮށް މައުލޫމާތު ހިއްސާ ކުރުމުގެ ފުރުސަތު ހުޅުވިފައިވާ ކަމަށާއި ޕޯޓަލް މެދުވެރިކޮށް ހުށަހަޅާ މައުލޫމާތުތަކުގެ ސިއްރުކަން ހިފަހައްޓާނެ ކަމުގެ ޔަގީންކަން ދޭ ކަމަށް ފުލުހުން ވިދާޅުވެއެވެ.
ޕޯޓަލަށް މައުލޫމާތާއި ހެކި ހިއްސާކުރައްވާއިރު އަމިއްލަ މައުލޫމާތު ހާމަނުކޮށް ވެސް ހުށަހެޅިދާނެކަމަށާއި، ނުވަތަ ތަހުގީގު ކުރާ ފަރާތްތަކުން ގުޅަން ބޭނުންވެއްޖެ ހާލަތުގައި ގުޅޭނެ މައުލޫމާތާއެކު ވެސް ހިއްސާކުރެވޭނެ ކަަމަށް ފުލުހުން ވިދާޅުވެއެވެ.
ބިންވެރިޔާ/ގެދޮރުވެރިޔާ ސްކީމާ ގުޅޭ ޖިނާއީ ތަހުގީގެއް ހިންގަން ފުލުހުންނާއި އޭސީސީ އަށް ޕީޖީ އަމުރު ކުރެއްވީ މި މަހުގެ 19 ވަނަ ދުވަހު އެވެ. ޕީޖީ އޮފީހުން ބުނެފައި ވަނީ ގެދޮރުވެރިޔާގެ ސްކީމްގެ ފޯމު ބަލައިގަތުމާއި ގޯއްޗާއި ފްލެޓް ލިބޭ މީހުން ކަނޑައެޅުމުގައި އަދި ގޯއްޗާއި ފްލެޓް ދޫކުރުމުގައި ކަނޑައެޅިފައިވާ އުސޫލުތަކާއި ގަވާއިދުތަކާ ހިލާފަށް އަމަލު ކޮށްފައިވާ ކަމުގެ ޝަކުވާތައް ލިބިފައިވާ ކަމަށެވެ.
