ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ގެ މެނޭޖިން ޑިރެކްޓަރުކަމުގެ މަގާމަށް މުހައްމަދު މައުރޫފް ޖަމީލު އައްޔަންކޮށްފިއެވެ.
އޭނާ އެ މަގާމަަށް އައްޔަންކުރިކަން ޕްރައިވެޓައިޒޭޝަން އެންޑް ކޯޕަރައިޓައިޒޭޝަން ބޯޑު (ޕީސީބީ)އިން ހާމަކޮށްފައިވާއިރު މައުރޫފް ޖަމީލަކީ ހުޅުމާލެ ހިއްކި ދުވަސްވަރުން ފެށިގެން ވަރަށް ގިނަ ދުވަސް ވަންދެން، އެ ތަން ތަރައްގީ ކުރުމުގައި އެންމެ އިސްކޮށް ހަރަކާތްތެރިވި ބޭފުޅެކެވެ.
މީގެ ކުރުން މައުރޫފް ވަނީ އެޗްޑީސީ އުފެއްދުމާ އެކު، އެ ކުންފުނީގެ ސީއީއޯގެ މަގާމުވެސް ދުވަސްކޮޅަކަށް ފުރުއްވާފައެވެ. އަދި ކުރީގެ ރައީސް މައުމޫނު އަބްދުލްގައްޔޫމުގެ ވެރިކަމުގައި މިނިސްޓާ އޮފް ކޮންސްޓްރަކްޝަން އެންޑް ޕަބްލިކް އިންފްރާސްޓްރަކްޗާގެ މަގާމުވެސް މައުރޫފުވަނީ ފުރުއްވާފައެވެ.
އެޗްޑީސީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު ރޭ އެ މަގާމުން އިސްތިއުފާ ދެއްވާފައިވާއިރު، އެޗްޑީސީގެ ކޮރަޕްޝަނާއި ގުޅޭ މައްސަލައެއް ފުލުހުން ގެންދަނީ ތަހުގީގުކުރަމުންނެވެ.
