މާލޭ، އަލިކިލެގެފާނު މަގުން ސައިކަލެއްގައި ދިޔަ އަންހެނެއްގެ އަތުން ފޭރެން މަސައްކަތްކުރި މައްސަލާގައި ފިރިހެނަކު ހައްޔަރުކޮށް އޭނަގެ ވަނަވަރު ފުލުހުން އާއްމުކޮށްފިއެވެ.
އެ މައްސަލާގައި ހައްޔަރުކޮށްފައި ވަނީ އުމުރުން 30 އަހަރުގެ ވ. ފިޔަބަރި، މާލެ، ހަސަން އިސާމެވެ.
ސޯޝަލް މީޑިއާގައި ދައުރުވަމުންދާ ވީޑިއޯގައި ފެންނަ ގޮތުގައި ސައިކަލްގައި އަންހެނަކު ދުއްވާފައި ދަނިކޮށް އޭނާގެ ކަރުގައި އޮތް ފަށް ޖަހައިގަނެފައިވަނީ ފަހަތުން ސައިކަލެއްގައި ދިޔަ ފިރިހެނެކެވެ.
ވީޑިއޯއިން ފެންނަ ގޮތުގައި ފަށް ފޭރުމަށް ފަހު ފިރިހެން މީހާ ސައިކަލް މަޑުކުރުމަށް ފަހު، ދެ ވަނަ ފަހަރަށް އަންހެން މީހާއާ ދިމާލަށް ދުއްވައިގަނެ އެވެ. ދެ ވަނަ ފަހަރަށް އޭނާ ހަމަލާދީ މަސައްކަތްކުރީ އަންހެން މީހާގެ އަތުގައި އޮތް އަތްދަބަސް ޖަހައިގަތުމަށް ކަމަށް ބެލެވެ އެވެ.
އެ އަންހެންމީހާ ލިބުނު ޝޮކާއެކު އަވަސް އަވަހަށް ސައިކަލް ވެސް ވައްޓާލާފައި ދުއްވައި ގަންނަ ތަން ވީޑިއޯ އިން ފެނެ އެވެ.
އަދި ހެލްމެޓެއް އަޅައިގެން ހުރި ފިރިހެން މީހާ ވަނީ ފަހުނ އޭނާ ދުއްވަން އިން ސައިކަލަށް އަރައިގެން ގޮސްފައެވެ.
މި ހާދިސާ ހިނގި އިރު އެ ސަރަހައްދުގައި މީހުންވެސް ތިއްބެވެ.
މި މައްސަލައާ ގުޅިގެން ފުލުހުންގެ ތަރުޖަމާން އަހްމަދު ޝިފާން ވިދާޅުވީ، ފޭރުނު މައްސަލައާ ގުޅުން ހުރި މީހާ ހައްޔަރުކޮށްފައިވާ ކަމަށެވެ. އަދި ތަހުގީގަށް އޭނާ ދުއްވަން އިން ސައިކަލުވެސް ފުލުހުންގެ ބެލުމުގެ ދަށަށް ގެނެސްފައިވާ ކަމަށްވެސް ޝިފާން ވިދާޅުވިއެވެ.
މި މައްސަލަ ފުލުހުން ގެންދަނީ އިތުރަށް ތަހުގީގު ކުރަމުންނެވެ.
