ތަރައްގީގެ މަސައްކަތްތައް ކުރިއަށްގެންދާނީ، ރާއްޖޭގެ އިގްތިސާދު މިހާރު ބިނާކުރި ބިންގަލުގެ މަތީގައި އާރާސްތުކުރަމުންކަމުގައި ރައީސް ޑރ މުހައްމަދު މުއިއްޒު ވިދާޅުވެއްޖެއެވެ.
އަރިއަތޮޅު އުތުރުބުރީ މަތިވެރީގެ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައި ރައީސް ވިދާޅުވީ އިގްތިސާދު އާރާސްތުކުރަމުންދާއިރު، ރައްޔިތުންގެ ހައްގުތަކާއި މިނިވަންކަން ޔަގީންކޮށްދީ، ރާއްޖޭގެ މިނިވަންކަން ކަށަވަރުކޮށްދީ، ރާއްޖޭގެ ޚާރިޖީ ސިޔާސަތުގައި އަބަދުވެސް ރައްޔިތުން އިސްކޮށްގެން، ކުރިއަށްދާ ސިޔާސަތުގެ މަތީގައި، ރާއްޖޭގެ ކަންކަން ބައްޓަންކުރައްވަމުން ގެންދަވާނޭކަމަށެވެ.
އިޤްތިޞާދު ހަރުދަނާ ކުރެއްވުމަށް ކުރެވިފައިވާ މަސައްކަތްތަކަށް އިޝާރާތްކުރައްވަމުން ރައީސް ވިދާޅުވީ، ފައިސާ ޗާޕުކުރުން ހުއްޓާލުމަށްފަހު، ގައުމު ބަނގުރޫޓުވުމުން ސަލާމަތްވުމަކީ، އަތުން ނުހިފޭ އަދި ލޮލަށް ނުފެންނަ ކަމެއް ކަމުގައިވީނަމަވެސް، ތަރައްގީއަށް ކުރިއަށްހުރި ރޭވުންތައް އޭގެ މަތީ ބިނާކުރެވޭނެ ހަރުދަނާ ބިންގަލެއްކަމަށެވެ. އަދި ކުރިއަށްއޮތް ތަނުގައިވެސް، ފުދުންތެރިކަން އިތުރުކުރައްވައި ތަރައްގީ ބައްޓަންކުރައްވާނީ، އެއްވެސް ރައްޔިތަކަށް ލިބެމުންދާ ސަބްސިޑީއެއްވެސް، އާސަންދައެއްވެސް، ރިޓަޔަމަންޓް ޕެންޝަނެއްވެސް ނުކަނޑާކަން އެމަނިކުފާނު ފާހަގަކުރެއްވިއެވެ.
އިގްތިސާދު ހަމައަކަށް އެޅުވުމަށްފަހު ސަރުކާރުން ދެން އަމާޒު ހިފީ، ދުވަހަކުވެސް ރާއްޖޭގައި ހައްލުނުކޮށް ދޫކޮށްލާފައި ހުރި ބޮޑެތި މައްސަލަތައް ހައްލުކުރެއްވުމަށް ކަމަށް ރައީސް ވިދާޅުވިއެވެ. އެގޮތުން، ވޭޕް މަނާކޮށް، ނުޤަވާއިދުން ރާއްޖޭގައި އުޅޭ ބިދޭސީން ރެގިއުލަރައިޒްކުރުމުގެ މަސައްކަތް ފައްޓަވާފައިވާކަން އެމަނިކުފާނު ފާހަގަކުރެއްވިއެވެ. އެގޮތުން، މޯލްޑިވްސް އިމިގްރޭޝަނުން ހިންގާ އޮޕަރޭޝަން ކުރަނގީގެ ކާމިޔާބީ އާއި ތަފާސްހިސާބުތައް އެމަނިކުފާނުގެ ވާހަކަފުޅުގައި ހިއްސާކުރެއްވިއެވެ. ތަރައްގީގެ މަސައްކަތްތައް ތަރުތީބުކުރައްވާފައިވާގޮތަށް އަލިއަޅުއްވާލައްވަމުން، އެންމެ އިސްކަން ދެއްވާފައިވަނީ ބޯހިޔާވަހިކަމަށްކަމުގައި އެމަނިކުފާނު ވިދާޅުވިއެވެ. އަދި އެއަށްފަހު ތަޢުލީމީ ދާއިރާގެ ބިނާރާއި، ސިއްހީ ދާއިރާ ފުޅާކުރުމަށް އިސްކަންދެއްވާފައިވާކަމަށްވެސް ރައީސް ވިދާޅުވިއެވެ. އެއަށްފަހު، ފެ
ނާއި ނަރުދަމާގެ މަސައްކަތްތައް ކުރެއްވުމަށްކަމަށާއި، އެމަސައްކަތްތައް ނިމިފައިވާ ރަށްރަށުގައި މަގުހެދުމުގެ މަސައްކަތް ކުރެއްވުމަށް ރާއްވަވާފައިވާކަން އެމަނިކުފާނު ފާހަގަކުރެއްވިއެވެ. އަދި ކުޅިވަރު ފެސިލިޓީތަކާއި އިޖުތިމާޢީ ކަންކަން ތަރުތީބު ކުރައްވާފައިވަނީ އޭގެ ފަހަށެވެ. 2025 ވަނަ އަހަރުގެ ޖަނަވަރީން ފެށިގެން އެ ތަރުތީބުން ތަރައްޤީގެ މަޝްރޫޢުތައް ތަންފީޒުވަމުންދާއިރު އޭގެ ފައްސި ނަތީޖާ ފެނިގެންދާނީ، ކޮންސްޓްރަކްޝަން އިންޑަސްޓްރީ ފުޅާވެ، ކުދި އަދި މެދު ފަންތީގެ ވިޔަފާރުތަކަށް ލިބޭ ކުރިއެކުމުންކަންވެސް ރައީސް ފާހަގަކުރެއްވިއެވެ.
