މަތީ ތައުލީމު ހާސިލުކުރާ ކޮންމެ ދަރިވަރަކީ އެދަރިވަރެއްގެ ކުޅަދާނަކަމާއި ގާބިލްކަމާއި މެދު ޝައްކު ނުއުފެދޭ ފަދަ ދަރިވަރަކަށްވުމަށް މިނިސްޓްރީ އޮފް ހަޔަރ އެޑިޔުކޭޝަން، ލޭބަރ އެންޑް ސްކިލްސް ޑިވެލޮޕްމަންޓް، ޑރ. މަރްޔަމް މާރިޔާ އިލްތިމާސްކުރައްވައިފައެވެ.
ވިލާ ކޮލެޖްގެ ހިތަދޫ ކެމްޕަސް އިފްތިތާހްކުރުމަށް މިއަދު ހެނދުނު ބޭއްވި ރަސްމިއްޔާތުގައި މިނިސްޓަރު ވިދާޅުވީ ވިލާ ކޮލެޖަކީ އައްޑޫ ސިޓީއަށް އެތަށް ހިދުމަތްތަކެއް ފޯރުކޮއްދެއްވާފައިވާ ކޮލެޖެއް ކަމަށާއި، މިއަދު ހުޅުވިގެންދާ ހިތަދޫ ކެމްޕަހަކީ އެންމެ ޒަމާނީ ވަސީލަތްތަކާއިއެކު ހުޅުވިގެންދާ ކެމްޕަހެއްކަމަށެވެ.
މީގެ އިތުރުން މިނިސްޓަރު ވިދާޅުވީ މަތީ ތައުލީމުގެ ދާއިރާގެ ކުރިއެރުމަށް މަސައްކަތްކުރާ ފަރާތްތަކުގެ އެންމެ ކުރީ ސަފުން ވިލާ ކޮލެޖް ޖާގަ ހޯއްދަވާފައިވާކަމަށެވެ. ކޮލެޖްގެ އިތުރުން ވެސް އެހެނިހެން އަމިއްލަ ފަރާތްތަކުން މަތީ ތައުލީމު ކުރިއެރުވުމަށް އެތަށް އަގުހުރި މަސައްކަތްތަކެއް ކުރައްވަމުންދާކަން އެކަމަނާ ވަނީ ފާހަގަކުރައްވައި ޝުކުރު އަދާކުރައްވާފައެވެ.
މި ރަސްމިއްޔާތުގައި، މިނިސްޓަރ ޑރ. މަރްޔަމް މާރިޔާގެ އިތުރުން އައްޑޫ ސިޓީގެ މޭޔަރު އަލީ ނިޒާރު، ވިލާ ކޮލެޖްގެ ރެކްޓަރ، ޑރ.އަހްމަދު އަންވަރު އަދި އެހެނިހެން އިސްބޭފުޅުން ވަނީ ބައިވެރިވެވަޑައިގަންނަވާފައެވެ.
