ތައިލެންޑަށް ރާއްޖެއިން ކަނޑައަޅާ ސަފީރަށް ކުރީގެ އިލެކްޝަން ކޮމިޝަނގެ ކުރީގެ ރައީސް ފުއާދު ތައުފީގު އައްޔަން ކުރުމަށް ރައްޔިތުންގެ މަޖިލީހަށް ފޮނުވައިފިއެވެ.
މިއަދުގެ ރައްޔިތުންގެ މަޖިލީހުގެ ޖަލްސާގައި ރައީސްގެ މޭޒުން ހުށަހަޅާ ކަމެއްގެ ގޮތުގައި އޮތީ ކިންގްޑަން އޮފް ތައިލެންޑްގެ ސަފީރުކަމަށް ރައީސުލްޖުމްޙޫރިއްޔާ ފޮނުއްވާފައިވާ ނަން ދާއިމީ ކޮމިޓީއަށް ފޮނުވުމެވެ. އެގޮތުން، ރައީސް ހުށަހަޅުއްވާފައިވަނީ ފުއާދުގެ ނަމެވެ.
މަޖިލީހުގެ ރިޔާސަތުން ވަނީ އެ މައްސަލަ ދިރާސާ ކުރުމަށް ހާރިޖީ ގުޅުންތަކުގެ ކޮމިޓީއަށް ފޮނުވާފައެވެ.
އީސީގެ ގަވާއިދު ބުނާގޮތުން ދެ ދައުރަށް ވުރެ އިތުރަށް އެ ކޮމިޝަންގެ މެންބަރު ކަމުގައި ނުހުންނެވޭނެއެވެ. އެހެންކަމުން ދައުރު ހަމަވުމާ އެކު ފުއާދު ޖެހިވަޑައިގަތީ އެ ކޮމިޝަންގެ ވަޒީފާއިން ވަކިވެވަޑައިގަންނަވާށެވެ.
