މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ އިސް މުވައްޒަފެއްގެ ޒާތީ މައުލޫމާތުތަކެއް ސޯޝަލް މީޑިޔާގައި ލީކުވި މައްސަލައެއް ބަލަމުން އަންނަ ކަމަށް އެތޯރިޓީ އިން ބުނެފިއެވެ.
އެމްއެމްއޭގެ އިސް މުވައްޒަފެއްގެ ވަޒީފާ އާ ބެހޭ ޒާތީ މައުލޫމާތުތަކެއް މި ހަފްތާގެ ތެރޭގައި ސޯޝަލް މީޑިޔާގައި ލީކުވުމާއި ގުޅިގެން އެމްއެމްއޭ އިން ބުނީ، އެ ބޭންކްގެ އިންޓާނަލް އޮޑިޓުން އެ މައްސަލަ ބަލަމުން އަންނަ ކަމަށެވެ.
އިތުރަށް އެމްއެމްއޭ އިން ބުނީ މިކަމާ ގުޅޭ ބައެއް ކަންކަމުގައި މޯލްޑިވްސް ޕޮލިސް ސާވިސްގެ ފަންނީ އެހީތެރިކަން ވެސް ހޯދާފައިވާ ކަމަށެވެ، އަދި މުވައްޒަފުންގެ ޒާތީ މައުލޫމާތަކީ އެ އޮތޯރިޓީން ރައްކާތެރިކުރަން ބޭނުންވާ މައުލޫމާތު ކަމަށް އެމްއެމްއޭ އިން ވަނީ ބުނެފައެވެ.
ސަރުކާރުގެ އިސް އޮފިޝަލުންނާއި ސަރުކާރު ކުންފުނިތަކުގެ އިސް މަގާމުތަކުގައި ތިބޭ ފަރާތްތަކުގެ ޒާތީ މައުލޫމާތު ސޯޝަލް މީޑިއާގައި އާންމުކުރުން ގިނަ ވަމުން އަންނައިރު، މި ފަދަ ބައެއް މައްސަލަތައް އިދާރާތަކުން އަމިއްލައަށް އިސްނަގައިގެން ބަލާފައިވާ ކަން ފާހަގަކުރެވެއެވެ.
