ހުޅުމާލެ ހިޔާ ފްލެޓުގެ އެޕާޓްމަންޓެއްގައި މީހަކު ރަހީނުކުރި މައްސަލައިގައި ހައްޔަރުކުރި 12 މީހުންގެ ބަންދުގެ މުއްދަތު ޖަހައިިފިއެވެ.
މި މައްސަލައިގައި ހައްޔަރުކުރި 12 މީހުންގެ ތެރެއިން 5 މީހަކު ފަސް ދުވަހަށް އަދި 7 މީހަކު ހަތް ދުވަހަށް ބަންދު ކުރުމަށް ކޯޓުން ވަނީ އަމުރުކޮށްފައެވެ.
މި މައްސަލަ އާއި ގުޅިގެން ފުލުހުން ބުނީ ގޭންގްއަކުން މީހަކު ރަހީނުކޮށް ހިޔާ ސަރަހައްދުގެ ޓަވަރަކަށް ގެންގޮސްފައިވާ ކަމުގެ މައުލޫމާތު މި މަހުގެ 8 ވަނަ ދުވަހުގެ ރޭ 20:00 ހާއިރު ފުލުހުންގެ އިންޓެލިޖެންސްއަށް ލިބުނު ކަމަށާއި، އެއާއެކު އެ މީހާ ހޯދުމުގެ މަސައްކަތް ފުލުހުން ފަށާފައިވާ ކަމަށެވެ.
ފުލުހުން ބުނީ ރަހީނުކޮށްފައި ހުރީ H9 ޓަވަރުގެ 20 ވަނަ ފަންގިފިލާގެ 11 ވަނަ އެޕާޓްމެންޓުގައި ކަމަށެވެ، ފުލުހުން އެ އެޕާޓްމެންޓަށް ވަނީ އެ ތަނުގެ ދޮރު ވައްޓާލައިގެންނެވެ. އަދި ފުލުހުން ވަން އިރު، ރަހީނުކުރި މީހާގެ ބޯ ބާލުވާފައިވާ ކަމަށާއި، އޭރު އެމީހާގެ އިނގިލި ބުރިކޮށްލަން މަސައްކަތް ކުރަމުންދިޔަ ކަމަށް ފުލުހުން ބުނެއެވެ.
އިތުރަށް ފުލުހުން ބުނީ މައްސަލައާ ގުޅިގެން 12 މީހުން ފުލުހުންގެ ބެލުމުގެ ދަށަށް ގެންގޮސްފައި ވާއިރު، އެ 12 މީހުންގެ ބައިވެރިވުން މިކަމުގައި އޮތް ކަމަށް ބެލެވޭކަމަށެވެ.
