ރައިސުލްޖުމްހޫރިއްޔާ ޑރ. މުހައްމަދު މުއިއްޒުގެ ދޮންމަންމާފުޅާ ގުޅުވައިގެން ދައްކާ ވާހަކަތަކަކީ ހަގީގަތާ ހިލާފު ވާހަކަތަކެއްކަމަށް އެމަނިކުފާނު ވިދާޅުވެއްޖެއެވެ.
“އަދަދު” ނޫހުން ގެނެސްދިން ރައީސްގެ ދޮންމަންމާފުޅު ސްކީލާންގެ ވީޑިއޯ ޑޮކިއުމެންޓްރީގައި އެމަނިކުފާނަށް ތުހުމަތު ކޮށްފައިވަނީ، ބައްޕާފުޅު ޝައިހް އަބްދުއްރަހްމާން އަވަހާރަވުމުން ދޮންމަންމާފުޅު ނުހައްގުން ޑީޕޯޓް ކޮށްލާފައިވާކަމަށެވެ. އަދި ދޮންމަންމާފުޅަށް ބައްޕާފުޅުގެ ވާރުތަ މުދަލުން އެއްވެސް އެއްޗެއް ނުދޭކަމަށެވެ. ރިޔާސީ އިންތިހާބުގެ ދުވަސްވަރު، ރައީސް މުއިއްޒަށް އަމާޒުކޮށް ނެރުނު މި ޑޮކިއުމެންޓްރީއާ ގުޅޭ ގޮތުން ފުރަތަމަ ފަހަރަށް ވާހަކަފުޅު ދައްކަވަމުން ރައީސް ވިދާޅުވީ އެއީ ސިޔާސީ ވިސްނުމެއްގައި އެމަނިކުފާނުގެ އަގުވައްޓަލުމަށް ދައްކާ ވާހަކަތަކެއްކަމަށެވެ.
ރާއްޖޭގެ ތަރައްގީއާ ގުޅޭ މާސްޓަ ޕްލޭން އިފްތިތާހް ކުރެއްވުމަށް ފަހު، ސޯޝަލް ސެންޓަރުން ނުކުމެވަޑައިގެން މިއަދު ނޫސްވެރިންނާ ބައްދަލުކުރެއްވުމުން ރައީސް ވިދާޅުވީ ބައްޕާފުޅުގެ ބައެއް ބިންތަކާއި ވިޔަފާރިތައް ސްރީލަންކާގައި އޮތްކަމަށް ރައީސް ވިދާޅުވިއެވެ. ރައީސް ވިދާޅުވީ ދޮންމަންމާފުޅާ ދޭތެރޭގައި ގޯހުން ކަމެއް ކުރައްވާފައެއް ނޯންނާނެ ކަމަށެވެ.
އެގޮތުން ބައްޕާފުޅުގެ ތިން ބިމާއި، އެ ބިންތަކުގައި އިމާރާތްކޮށްފައިވާ އިމާރަތްތަކާއި ވިޔަފާރިތަކެއް ހުރިކަމަށެވެ. ކޮލޮމްބޯގައި ދެބިން އަދި ކެންޑީގައި އެއްބިން ހިމެނޭހެން ޖުމްލަ ތިން ބިމެއް އޮތްކަން ފަހަގަކުރައްވަމުން ރައީސް ވިދާޅުވީ އެތަނުން ދެތަނުގައި ގެސްޓުހައުސް ހަދައި ވިޔަފާރިވެސް ފަށާފައިވާއިރު އަނެއް ބިމަކީ ދިރިއުޅުމަށް ހަދާފައިވާ ތަނެއްކަމުގައެވެ. މީގެ އިތުރުން ރައީސް ވިދާޅުވީ އެހުރިހާ ބިންތަކާއި އިމާރާތްތަކާއި، ވިޔަފާރި އަދި ލަންކާގައި ބައްޕާފުޅުގެ އެކައުންޓުގައި ހުރި ހުރިހާ ފައިސާއެއް ހިމެނޭގޮތަށް ހުރިހާ އެއްޗެއް ދޮންމަންމާފުޅަށް ހިލޭ، އެއްވެސް ބަދަލަކާ ނުލައި ދީފައިވާނެކަމަށެވެ.
މީގެ އިތުރުން ރައީސް ވިދާޅުވީ މިކަން އޮޅުވާލައި ދައްކާ ވާހަކަތަކަކީ ސިޔާސީ ބޭނުމެއްގައި އެމަނިކުފާނުގެ އިސްތަށިފުޅުގައި އަޅުވާ ދޮގު ވާހަކަތަކެއްކަމަށެވެ. ބޮޑެތި އިލްޒާމު އަޅުވައި އާއްމުކުރި ޑޮކިއުމެންޓްރީއާ ގުޅޭ ގޮތުން މިހާތަނަށް އެއްޗެއް ވިދާޅުވާން ބޭނުންފުޅު ނުވީ އެ މަނިކުފާނަކީ މީހުންގެ ވާހަކަ ދައްކަވާ ބޭފުޅަކަށް ނުވާތީ ކަމަށެވެ.
