ސ.މީދޫ ވެހި، ޝަކޫރު އަހްމަދަކީ އާދައިގެ ދިރިއުޅުމެއް އުޅެމުން އައި މީހެކެވެ. ރިސޯރޓް ޝެފް ވަޒީފާ އަށްފަހު ރަށަށް އާއިލާ ކައިރިއަށް ބަދަލްވީ ރަށުން ވަޒީފާ ހޯދުމަށެވެ. ޝަކޫރުގެ ކައިވެންޏަށް ލިބިފައިވާ ދެ އަންހެން ދަރީންނާ އަނބިމީހާ އާއެކު ރަށުގައި ދިިރިއުޅެމުން ދަނިކޮށް ޝަކޫރަށް 2014 ވަނަ އަހަރު ސިއްޙީ މައްސަލަތަކެއް ދިމާވާންފެށިއެވެ. ޝަކޫރުގެ ކަނާއަތުފައިގަ ކުއްލި ރިހުމަކާއެކު ފައި ތުރުތުރު އަޅަކަހަލަ ގޮތެއްވާންފެށިއެވެ. އަދި މިއާއެކު އާދަޔާ ހިލާފަށް ދާހިއްލާކަން ފާހަގަވިއެވެ. ފަޔަށް ވަމުން އައި އުނދަގޫ ތަކަށް ލުޔެއް ލިބެނީ ހަމައެކަނި ފައިގެ ކަސްރަތުންނެވެ. ޝަކޫރަށް ދިމާވަމުންއައި މި އުނދަގޫތަކަކީ މައިލްޑް ސްޓްރޯކަކުން ދިމާވި މައްސަލައެއްކަމަށް ޑޮކްޓަރުންގެ ތަހުލީލުން އެނގުނެވެ. މިމައްސަލައަށް ފަރުވާހޯދުމަށްފަހު ޝަކޫރު އައީ އަނެއްކާވެސް އާދައިގެ ސިއްޙަތެއްގައި ދިރިއުޅެމުންނެވެ.
ޝަކޫރުގެ އާއިލާ އެހެން މީހުންނެކޭ އެއްފަދައިން ދިރިއުޅެމުން ދަނިކޮށް ކަޅުވިލާގަނޑެއް ދައްކާލީ މި ހިނގާ 2024 ވަނަ އަހަރު ޖޫންމަހުގައެވެ. ޝަކޫރުގެ ލޮބުވެތި އަނބިމީހާ އާއި ދެދަރިންނަށް ޝަކޫރު އާދަޔާހިލާފަށް ބަސްމަދުކަމާއި އަނގަ ފަރާތަކަށް ދަމާފައި ހުރިކަން ފާހަގަވެ ރަނގަޅަށް ނުހިނގޭކަން ފާހަގަވިއެވެ. އަދި ޝަކޫރުގެ އިހްތިޔާރަކާ ނުލައި ކަންކަންދިމާވާކަން ފާހަނގަ ވާންފެށިއެވެ. މި މައްސަލަތަކުގެ އިތުރަށް ޝަކޫރު އެއްވެސް ކަމެއް ހަނދާން ނުހުންނަ ކަމާއި ވާހަކަދެއްކުމުގައި ހަމަޖެހޭ ގޮތެއް ނެތްކަން ފާހަގަވިއެވެ.
މިހާހިސާބުން ޝަކޫރަށް ފަރުވާ ދިނުމަށް ޑޮކްޓަރަށް ދައްކައި އައްޑޫ އެކުޓޯރިއަލް ހޮސްޕިޓަލުން ހެދި ޓެސްޓުތަކުން ދެއްކިނަތީޖާއިން އާއިލާ އެންމެންގެ ގޮތްހުސްވެ ހިތާމައިގެ ވަޅުގަނޑަކަށް ވެއްޓުނެވެ. ޝަކޫރުގެ ރިޕޯރޓު ތަކުން ދައްކަނީ އޭނައަށް މޭޖަރ ސްޓްރޯކެއް ޖެހި ސިކުނޑީގެ ނާރެއް ހިމަވެފައި ވާކަމެވެ. މި ސަބަބާ ހެދި ޝަކޫރުގެ ހާލަތު ދަށްވަމުން އައިސް ކަނާއަތު ފައިގެ ބާރު ގޮސް ބޮލުގެ ފަހަތުން ދެ އަރިމައްޗާ ހަމައަށް ވަނީ އައްސިވެފައެވެ.
މާލެ ގޮސް ޑޮކްޓަރ ނިއާފް އަށް ދެއްކުމުން ބުނެފައިވަނީ ޝަކޫރުގެ ސިކުންޑީގެ ނާރު ހިމަވުމުގެ ސަބަބުން ބޮލުގެ ފަހަތުން އައްސިވެ ހަށިގަނޑުގެ އެއްފަޅި ވަނީ ބާރުދޫވެފައެެވެ.
ޑޮކްޓަރ ނިޔާފް އަންގަނީ ބޯ އައްސި ވަމުން އައިސް ނިތްކުރިޔާ ހަމައަށް ފޯރައިފިނަމަ މުޅިމީހާ އެއްކޮށް ޕެރަލައިޒް ވުމުގެ ފުރުސަތު ބޮޑުކަމަށެވެ. އެހެން ކަމުން މިވަގުތު އައިޖީއެމް.ހޮސްޕިޓަލުން މިސާޖަރީ ކުރެވޭނަމަވެސް ސިކުނޑިއަށް ލައްވަން ޖެހޭ “ސްޓެންޓް” އައި.ޖީ.އެމް ހޮސްޕިޓަލުން ލިބެން ނެތީމަ އޮޕްރޭޝަން އޭ.ޑީ.ކޭ އިން ކުރުމަށް ވަނީ އިލްތިމާސް ކޮށްފައެވެ. އެހެން ނަމަވެސް އެސާޖަރީ އޭ.ޑީ.ކޭ އިން ކުރުމަށް ހޭދަވާ ހަރަދަށް ވުރެ ކުޑަހަރަދެއްގައި އިންޑިޔާއިން ކުރެވެން އޮތުމުން އާއިލާއިން ބޭނުންވަނީ ވީހާ އަވަހަކަށް ޝަކޫރު ގޮވައިގެން އިންޑިއާ އަށް ފުރުމަށެވެ.
އިންޑިއާ އިން މި އޮޕަރޭޝަން ކުރުވަން ފުރަން ތައްޔާރަށް އާއިލާއިން ތިބިނަމަވެސް މިކަަމަށް އޮތް ހުރަހަކީ ސާރޖަރީ އަށް ހިނގާނެ ހަރަދާއި ގޮސް ތިބުމަށް ހިގާނެ ހަރަދެވެ.
ރާއްޖެއިން ކުރެވޭ ސާޖަރީ އަކަށް ވުމުން ބަލިމީހާ އަށް އާސަންދަ ހަމަޖެހިފައި ނުވެއެވެ. އެހެން ކަމުން ޝަކޫރު ގޮވައިގެން އެކީގައި އިންޑިއާއަށް ފުރާ ޝަކޫރުގެ ދަރިފުޅު ޝަމްސުއްނިސާ އާއި އާއިލާގެ އެހެން މެންބަރުންގެ މާލީހާލަތު ދަށްވުމުގެ ސަބަބުން ވަނީ ވަރަށް ބޮޑަށް ތިއެންމެހާ ބޭފުޅުންގެ ދީލަތި އެހީއަކަށް ބޭނުންވެފައެވެ. ޝަކޫރުގެ ފިރިހެން ދަރިޔަކު ނެތި ހަމަ އެކަނި ތިބި ދެ އަންހެން ކުދިންގެ އަމިއްލަ ދިރިއުޅުމުގެ ކަންތައްތައް ބަލަހައްޓަމުން ބައްޕަގެ ހުރިހާ ހަރަދަކާއި އެކީގައިދާ މީހާއަށް ހޭދަވާނެ ހަރަދު ޖުމއލަކޮށް ނޭންގޭތީ އެކުދީންނަށްވަނީ ވަރަށް ބޮޑަށް އެހީއަކަށް ބޭނުންވެއެވެ. އަދި ބޭސްފަރުވާއަށް އިންޑިއާގައި ހުރުމާއި ކެއުމުގެ ހަރަދުހިނގާނެ މުއްދަތެއް ނޭގޭ ކަމަށް ޝަމްސު ބުނެއެވެ. އެއާއިލާގެ މާލީ ހާލަތު،އިންޑިއާއަށް ގޮސްހުރުމަކަށް ތަނެއް ނުދެއެވެ.
ޝަކޫރުގެ ބަލީގެ ގޮތުން މިފަދަ މާލީ ޒިންމާތަކެއް ބޮލުގައި އަޅައިގެން އެކޮޅުގައި ތިބެން ޖެހޭނެ މުއްދަތެއް ނޭނގި ފުރައިގެން ގޮސް އިންޑިއާގައި ހުރުމަކީ އެންމެ އެދެވޭ ކަމެއް ކަމުގައި ނުވާ ކަމަށް ހަމަގައިމުވެސް އަޅުގަނޑުމެން އެންމެން އެއްބަސްވާނެއެވެ. ބައްޔަށް ފަރުވާދިނުމަށް އިންޑިއާއަށް ފުރަން ތައްޔާރު ވާއިރު ޝަކޫރުގެ އާއިލާއިން އެދެނީ އެހީގެ ކުޑަ މިންވަރެއްވެސް ދެވެން އޮތް ފަރާތެއްނަމަ އެހީވެދިނުމަށެވެ. އަދި އެހީވެވެން ނެތްނަމަ ޝަކޫރުގެ އޮޕްރޭޝަން ކާމިޔާބު ކޮށް ހެޔޮހާލުގައި ލެއްވުމަށް ހެޔޮދުއާ ކޮށްދިނުމަށް ކުދިން އެދެއެވެ.
ޝަކޫރުގެ ބަލިހާލަތާ ބެހޭގޮތުން އިތުރު މައުލޫމާތު އޮޅުން ފިލުވުމަށް 9132132 (ޝަމްސުއް ނިސާ) ނަންބަރަށް ގުޅުމަށާއި އަދި މާލީ އެހީތެރިކަން ފޯރުުކޮށްދިނުމަށް އެކައުންޓަށް ފައިސާގެ އެހީ ފޯރުކޮށްދިނުމަށް އާއިލާއިން އެދެއެވެ.
ފައިސާ އެކައުންޓް ނަންބަރު: 7730000105738
އެކައުންޓް ނަން: ޝަމްސުއް ނިސާ
ޑޮލަރ އެކައުންޓް ނަންބަރު: 7770000036365
އެކައުންޓް ނަން: ޝަމްސުއް ނިސާ
މާތް ނަބިއްޔާ މުޙައްމަދު ޞައްލަ ﷲ ޢަލައިހި ވަސައްލަމްގެ ޙަދީޘެއްގެ މާނައިގައިވެއެވެ.
“އަދި އެމީހެއްގެ އަޚާގެ ކިބައިން ދުނިޔެ މަތީގައި ދަތިކަމެއް ފިލުވައިދީފި މީހަކަށް، އެމީހަކަށް ޤިޔާމަތްދުވަހުން ޖެހޭ މުޞީބާތްތަކުގެ ތެރޭން މުޞީބާތެއް ﷲ ފިލުއްވައިދެއްވާހުއްޓެވެ. އަދި އުނދަގުލެއް ޖެހިފައިވާ މީހާއަށް ފަސޭހަކޮށްދީފިމީހަކަށް، ﷲ އެމީހަކަށް ދުނިޔެމަތީގަޔާއި އާޚިރަތުގައި ފަސޭހަކޮށްދެއްވާނެއެވެ. އަދި މުސްލިމެއްގެ (ޢައިބު ފޮރުވައިދީފިމީހާ)ގެ ޢައިބު، ދުނިޔެއާއި އާޚިރަތުގައި ﷲ އެމީހެއްގެ ޢައިބުފޮރުވައިދެއްވާ ހުއްޓެވެ. އަދި ހަމަކަށަވަރުން އެމީހެއްގެ އަޚާއަށް އެހީވުމުގެ މަތީގައި ހުންނަމީހާއަށް އެހީތެރިވޮޑިގަތުން މަތީގައި ﷲ ވޮޑިގެންވެއެވެ.”
މާތް ﷲ އަށްޓަކާ އެހީތެރިވެދެއްވާ! މާތް ﷲ އަށްޓަކާ ކުރާ އެއްވެސް ހޭދައަކީ ގެއްލިގެންދާނެ އެއްޗެއް ނޫން! ދެދުނިޔޭގަވެސް މަތިވެރި ވެގެންވާ ސަވާބާއި ދަރުމަ ލިބޭނެ، إن شاء الله!
