ކުޅިވަރުގެ ދާއިރާއިން ގައުމީ ފެންވަރުގައިދޭ ޝަރަފްވެރި އެވޯޑެއް ކަމަށްވާ، ސްޕެޝަލް ރިކޮގްނިޝަން އެވޯޑު، އައްޑޫސިޓީ ހޮރައިޒަން އެކަޑަމީގެ ބާނީ، ޙައްވާ ރާމިޒާ ހޯއްދަވައިފިއެވެ.
ރާއްޖޭގައި ކުޅިވަރު ކުރިއެރުވުމަށާއި ކުޅިވަރު މެދުވެރިކޮށް މުޖުތަމަޢަށް ހެޔޮބަދަލުތަކެއް ގެނެސްދިނުމަށް މަސައްކަތްކުރައްވާފައިވާ ފަރާތްތަކަށް ސަރުކާރުން ދެއްވާ ސްޕެޝަލް ރިކޮގްނިޝަން އެވޯޑު، ޙައްވާ ރާމިޒާ އުފުއްލެވިއިރު އޭނާއަކީ، 2005 ވަނަ އަހަރުންފެށިގެން ދަރުމަވެރިއެއްގެ ގޮތުގައި މުޖުތަމަޢު ބަލައިގަންނަފަދަ ގިނަ ޚިދުމަތްތަކެއް ފޯރުކޮށްދެއްވާފައިވާ އައްޑޫގެ ފަޚުރުވެރި ދަރިއެކެވެ. އަދި ހަމައެހެންމެ އައްޑޫގައި ބެޑްމިންޓަންގެ ކުޅިވަރު ދިރުވާ އާލާކޮށް މިކުޅިވަރުގެ ޓެކްނިކަލް އޮފިޝަލުން ބިނާކުރުމުގައި ރާމިޒާވަނީ ގިނަގުނަ މަސައްކަތްތަކެއް ކުރައްވާފައެވެ. ޙައްވާ ރާމިޒާގެ ޤައުމީ ޚިދުމަތުގެ އަގު ވަޒަންކޮށް އޭނާއަށް ވަނީ 2021 ވަނައަހަރު ރެހެންދި އެވޯޑު ވެސް ލިބިލައްވާފައެވެ.
ޙައްވާ ރާމިޒާވެފައިވަނީ ބެޑްމިންޓަންގެ ފޯރި މުޅި އައްޑޫގައި ދެމެހެއްޓުމަށް މާލީގޮތުންނާއި އެނޫންގޮތްގޮތުންވެސް ނުހަނު ބޮޑު ގުރުބާނީއެއް ވެފައިވާ ކަނބަލެއްގެ ގޮތުގައެވެ. އުވެމުން ނެތެމުންދިޔަ ބެޑްމިންޓަންގެ ކުޅިވަރަށް އަލުން އާރޯކަން ގެނެސް ޒުވާނުންގެ މެދުގައި ޖޯޝާއިފޯރި އުފެއްދުމުގައި ދެމިހުންނަވައި ދެޖިންސުގެ ޒުވާނުންގެ ލޯބި ހޯއްދަވާފައިވާ އެ އެންމެންގެ ” ހޮރައިޒަން ހައްވައްތަ” މިއަދާ ހަމަޔަށްވެސް ގެންދަވަނީ ދެގޮތެއްނުވެ މިދާއިރާއަށް ޚިދުމަތްކުރުމުގައި ފައިތިލަ ސާބިތު ކުރައްވަމުންނެވެ.
ރޭގެ ޙަފްލާގައި ސްޕެޝަލް ރިކޮގްނިޝަން އެވޯޑު،ރާއްޖޭގައި ކުޅިވަރު ކުރިއެރުވުމަށް މަސައްކަތްކުރައްވާ އައްޑޫގެ އިތުރުބޭފުޅަކަށްވެސް ލިބިވަޑައިގެންނެވިއެވެ. މިވަގުތު ވޮލީ ބޯލް އެސޯސިއޭޝަންގެ ނައިބް ރައީސްގެ ގޮތުގައި ހުންނެވި ޢަލީ ލަތީފް،މިއެވޯޑު ޙާސިލް ކުރެއްވިއިރު އޭނާއަކީ 1997 ވަނައަހަރުން ފެށިގެން އައްޑޫގައި ވޮލީ ކުރިއެރުވުމަށް ގިނަގުނަ މަސައްކަތްތަކެއް ކުރެއްވި ބޭފުޅެކެވެ. އޭނާ ހިންގެވި ހިޒްކްލަބާއި އައްޑޫ ސްޕޯޓްސް ކްލަބުން ޤައުމީ މުބާރާތުގައި ބޮޑެތި ކާމިޔާބީތައް ހޯއްދެވުމުގެ އިތުރުން ޤައުމީ ވޮލީބޯޅަ ޓީމްގެ މެނޭޖަރގެ މަޤާމްވެސް ގިނައަހަރުތަކެއްވަންދެން އޭނާ އަދާ ކުރައްވާފައިވެއެވެ.
ކުޅިވަރުގެ ދާއިރާއިން ދިވެހިރާއްޖެއަށް ޚިދުމަތްކޮށްދެއްވާފައިވާ އަދި ޚިދުމަތްކޮށްދެއްވަމުންދާ ފަރާތްތަކުގެ އަގުވަޒަންކުރުމަށް ޚާއްޞަކޮށްގެން ދިވެހިރާއްޖޭގައި ބާއްވަމުންދާ އެންމެ ޝަރަފްވެރި އިޙްތިފާލުކަމަށްވާ “މޯލްޑިވްސް ސްޕޯޓްސް އެވޯޑްސް’ ގާލާ ނައިޓް” ޙަފްލާ އޮތީ، ރޭ ޒުވާނުންގެ މަރުކަޒުގައެވެ.
މިޙަފްލާ ޝަރަފްވެރިކޮށްދެއްވީ ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުއެވެ. މިޙަފްލާގައި ‘މޯލްޑިވްސް ސްޕޯޓްސް އެވޯޑްސް 2024’ގެ އެންމެ ޝަރަފުވެރި އެވޯޑްތައް ހަވާލުކޮށްދެއްވީ ރައީސުލް ޖުމްހޫރިއްޔާ ޑޮކްޓަރ މުޙައްމަދު މުޢިއްޒުއެވެ.
‘އެގޮތުން ލައިފްޓައިމް އެޗީވްމަންޓް އެވޯޑް’ ލިބިވަޑައިގެންނެވި ދެ ބޭފުޅުންނަށް އިނާމު ހަވާލުކޮށްދެއްވާފައިވެއެވެ. މިއަހަރު ލައިފްޓައިމް އެވޯޑު ލިބިވަޑައިގެންފައިވަނީ އަލްމަރްޙޫމް އަޙްމަދު ޙާފިޒްގެ ހަނދާނަށާއި، ޢަބްދުއްސައްތާރު ޙަސަނަށެވެ. މީގެ އިތުރުން ‘ސްޕޯޓްސް ވުމަން އޮފް ދި އިޔަރ- ގޯލްޑް’ މިއަހަރު ޙާސިލުކުރެއްވީ ފާތިމަތު ދީމާ ޢަލީ އެވެ. އަދި ‘ސްޕޯޓްސްމަން އޮފް ދި އިޔަރ- ގޯލްޑް’ ޙާސިލުކުރެއްވި މުޙައްމަދު ޝައްފާން އިސްމާޢިލްއެވެ.
