އެޕަލް ކުންފުނީގެ އާ ޕްރޮޑަކްޓްތައް ދައްކާލަން ކޮންމެ އަހަރަކު ވެސް ބާއްވާ ހާއްސަ އިވެންޓް ރޭ ބާއްވައި ރީތި، ޗާލު އައިފޯން 16 ގެ މޮޑެލްތައް މުޅިން އާ ފީޗާސްތަކާއެކު ދައްކާލައިފިއެވެ.
ކެލިފޯނިއާގެ ކޫޕަޓީނޯގައި ހުންނަ އެޕަލްގެ މައި އޮފީހުގައި ބޭއްވި އިވެންޓެއްގައި އައު އައިފޯނުގެ އިތުރުން އެހެނިހެން ޑިވައިސްތަކާއި އެޕްތަކަށް ގެނެވޭ އައު ބަދަލުތައް ވެސް ވަނީ ހާމަކޮށްފައެވެ.
އަލަށް ތައާރަފްކުރި ހުރިހާ އައިފޯނެއްގައި ވެސް އެޕަލް އިންޓެލިޖެންސާ ގުޅުވާފައިވާ އައިއޯއެސް 18 އިން ލިބޭ ފީޗާތައް ހުރެއެވެ. ފޯނުތަކުގެ ބެޓެރީ މިހާރު ގެންގުޅޭ ފޯނުތަކަށް ވުރެ ގިނައިރު ހިފަހައްޓާނެ ކަމަށް ބުންޏަސް ރޭގެ އިވެންޓްގައި އެކަމުގެ އެއްވެސް ތަފްސީލެއް ނުދެ އެވެ.
އައިފޯނު 16 އާއި 16 ޕްރޯގެ ފީޗާތަކާ ބެހޭ ގޮތުން ބޮޑަށް ދެއްކީ އެޕަލް އިންޓެލިޖެންސްގެ ސަބަބުން ފެންނާނެ ތަފާތުގެ ވާހަކަ އެވެ. އަދި ކެމެރާއަށް ގެނެސްފައިވާ ކުރިއެރުމާ އެކު ޕްރޮފެޝަނަލް ފޮޓޯ އާއި ވީޑިއޯއަށް އައިފޯނުގެ ހާއްސަކަން އިތުރުވާނެ ކަމަށް އިވެންޓްގައި ބުންޏެވެ.
އައިފޯން 16 ފަސް ކުލަޔަކުން ހުރެ އެވެ. އެއީ ކަޅު، ހުދު، ފިޔާތޮށި، ފެހި އަދި ނޫކުލައިންނެވެ.
އައިފޯން 16 ގެ އަގު 799 ޑޮލަރުން ފެށޭއިރު އައިފޯން 16 ޕްލަސްގެ ފެށޭ އަގަކީ 899 ޑޮލަރެވެ. އައިފޯން 16 ޕްރޯގެ އަގު 999 ޑޮލަރުން ފެށޭއިރު ޕްރޯ މެކްސްގެ ފެށޭ އަގަކީ 1،199 ޑޮލަރެވެ.
