މަލާއިކަތުންނަށް އީމާންވުމަކީ އީމާންކަމުގެ ރުކުނެއް ކަމުގައި މިއަދުގެ ހުކުރު ހުތުބާގައި ބުނެދީ، ހަނދާންކޮށްދީފިއެވެ.
މިއަދުގެ ހުކުރުު ޚުތުބާ ހާއްސަ ކުރެވިފައިވަނީ މަލާއިކަތުންނަށް އީމާންވުމުގެ މައްޗަށެވެ.
ހުތުބާގައި ބުނީ އެއީ ﷲ ތަޢާލާ މާތްކުރައްވާފައިވާ މަޚްލޫޤުންތަކެއް ކަމަށާއި މުސްލިމުން މަލާއިކަތުންނަށް އީމާންވާންޖެހޭނީ ކީރިތި ޤުރްއާނާއި ރަސޫލާގެ ސުންނަތުން ސާބިތުވާ ގޮތަށް ކަމަށެވެ. އަދޗި މަލާއިކަތުންނަކީ ފިރިހެން ނުވަތަ އަންހެން ޖިންސަކަށް ނިސްބަތްވާ ބަޔަކު ނޫން ކަމަށް ވެސް ހުތުބާގައި ބުނެފައި ވެއެވެ.
މީގެ އިތުރުން ކާފިރުންގެ ތެރޭގައި މަލާއިކަތުންނާމެދު ނުބައި ޤަބޫލުކުރުންތަކެއް ފެތުރިފައިވާ ކަމަށާއި އޭގެތެރޭގައި މަލާއިކަތުންނަކީ އަންހެން ޖިންސުގެ ބައެއްކަމަށާއި ﷲ ގެ އަންހެން ދަރިންކަމަށް ޔަހޫދީންނާއި މުޝްރިކުން ދެކޭކަމަށް ވެސް ހުތުބާގައި ބުނެފައި ވެއެވެ. އަދި މަލާއިކަތުންނަށް ކެއުންބުއިމާއި، ނިދުމާއި އަރާމުކުރުން ފަދަ ކަންކަމަށް ބޭނުމެއް ނުވާނެ ކަމަށް ވެސް ބުނެފައި ވެއެވެ. އަދި އެބައިމީހުން ﷲ އަށް ނުއުރެދޭނެކަމަށް ޚުތުބާގައި ބުންޏެވެ.
މާތްﷲ އެންގެވި ކަމެއް މަލާއިކަތުން ކުރައްވާނެކަމަށްވެސް ވަނީ ބުނެފައެވެ.
