ޕްރޮސެކިއުޓަރ ޖެނެރަލް ހުސައިން ޝަމީމް މަގާމުން ވަކިކުރަން ހުށަހެޅި މައްސަލައިގައި ޖަވާބުދާރީވުމުގެ ފުރުސަތު ޝަމީމްއަށް ދޭން ޖުޑިޝަރީ ކޮމެޓީން ފާސްކޮށްފިއެވެ.
ހުޅުދޫ ދާއިރާގެ ޕީއެންސީގެ މެމްބަރު މުހައްމަދު ޝާހިދު ވަނީ ޝަމީމް މަގާމުން ވަކިކުރަން އެދިވަޑައިގެން މަޖިލީހުގެ ޖުޑިޝަރީ ކޮމިޓީއަށް ސިޓީއެއް ފޮނުއްވާފައެވެ. ޝާހިދު ހުށަހެޅުއްވި މަައްސަލާގައި ވިދާޅުވީ ޕީޖީއަކީ އޭނާގެ މަސްއޫލިއްޔަތުތައް އަދާ ކުރުމުގައި އެއްވެސް ފަރާތަކުން އަންގާ ގޮތަކަށް މަސައްކަތް ކޮށްގެން ވާނެ ފަރާތެއް ނޫން ކަމަށެވެ. އަދި އެއްވެސް ނުފޫޒެއްގެ ދަށުގައިވާ މީހަކަށް ވެގެން ނުވާނެ ކަމަށް ޝާހިދު ވިދާޅުވިއެވެ. އިތުރަށް ޝާހިދު ވަނީ ޕީޖީގެ ބާރުތައް ބޭނުން ކުރަން ވާނީ ވެސް ވަކި ފަރާތަކަށް މަންފާއެއް ހޯދައި ނުދީ، ޒާތީ ތައައްސަބުން އެއްކިބާވެ ހުރެ ބަންޑާރަ ނައިބު ކަނޑައަޅާފައިވާ މައިގަނޑު ސިޔާސަތުތަކާ އެއްގޮތަށް ކަމަށް ވިދާޅުވެފައެވެ.
މިއަދު އޮތް ކޮމެޓީގެ ބައްދަލުވުމުގައި ޝާހިދު ވަނީ މައްސަލަ އިތުރަށް ދިރާސާ ކުރުމުގައި ޖަވާބުދާރީވުމަށް ފުރުސަތު ދީ، ޕީޖީ ޝަމީމް ކޮމެޓީއަށް ހާޒިރު ކުރުމަށް ހުށަހަޅުއްވާފައެވެ. އަދި މަޖިލީހުން ސިޓީއަކުން މިއަދު އެކަން ޕީީޖީއަށް އަންގަން ހުށަހަޅުއްވިއިރު ޝާހިދުގެ ހުށަހެޅި އެ ހުށަހެޅުން މިއަދު ކޮމެޓީގައި ބައިވެރިވި ހުރިހާ މެންބަރުންގެ އިއްތިފާގުން ވަނީ ފާސްކޮށްފައެވެ.
މީގެ އިތުރުން އެ ކޮމެޓީން މަޖިލީހަށް ފޮނުވި ސިޓީގައި ބުނެފައިވަނީ ޕީޖީ ޝަމީމް ޤާނޫނު އަސާސީ އާ ޚިލާފަށް އެތައް ކަމެއް ކޮށްފައިވާތީ އޭނާއަކީ ޕީޖީގެ މަޤާމުގައި ހުރުމަށް އެކަށީގެންވާ ބޭފުޅެއް ނޫން ކަމަަށެވެ.
