މި ސަރުކާރުން އައްޑޫ ސިޓީގައި އަޅަން ނިންމާފައިވާ ބްރިޖުގެ މަސައްކަތް ނުހުއްޓޭކަމަށާ ޝްރޫއަށް ފައިސާ ހަމަޖެހުނުހާ އަވަހަކަށް އަމަލީ މަސައްކަތް ފެށިގެންދާނެ ކަމަށް ކޮންސްޓްރަކްޝަން އެންޑް އިންފްރާސްޓްރަކްޗާ މިނިސްޓަރު ޑރ. އަބްދުﷲ މުއްތަލިބް ވިދާޅުވެއްޖެއެވެ.
ރައްޔިތުންގެ މަޖިލިހުގެ މިއަދުގެ ޖަލްސާގައި އައްޑޫ ބްރިޖުގެ މަޝްރޫއާއި ގުޅޭގޮތުން ހިތަދޫ މެދު ދާއިރާގެ ޕީއެންސީގެ މެމްބަރު އަހުމަދު އަޒާންކުރެއްވި ސުވާލަށް ޖަވާބުދެމުން މިނިސްޓަރު ވިދާޅުވީ އައްޑޫ ބްރިޖް މަޝްރޫއަކީ ސަރުކާރުން އެންމެ އިސްކަންދޭ އެއް މަޝްރޫއު ކަމަށެވެ. އަދި އޭރު މި ބްރިޖު އެޅުމަށް ޝައުގުވެރިކަންފާޅުކޮށް ޕްރޮޕޯސަލް ހުށަހެޅި ފަރާތާއި ގުޅިގެން އެ މަޝްރޫއަށް ފައިސާ ހަމަޖެއްސުމުގެ މަސައްކަތް ކުރިޔަށްދާ ކަމަށް މުއްތަލިބް ވިދާޅުވިއެވެ.
މީގެ އިތުރުން މުއްތަލިބް ވިދާޅުވީ އެ މަޝްރޫއަށް ޕްރޮޕޯސްލަ ހުށަހެޅި ފަރާތުން ފައިނޭންސިން ލިބޭނެގޮތް ހަމަޖެއްސުމުން، ސަރުކާރުން އެ ފައިސާ ނަގައިދީ ކޮންޓްރެކްޓަރާ ހަވާލުކުރުމުން އެ މަސައްކަތް ފެށިގެންދާނެކަމަށެވެ. އަދި މިވަގުތު ކުރިޔަށް ދަނީ އެއްބަސްވުމުގައި ސޮއިކޮށްފަ އޮތް ފަރާތުން ހުށަހަޅާފައިވާ ފައިނޭންސިން ކަންތައްތައް ބަލައި އެ މަޝްރޫއަށް ބޭނުންވާ ފައިސާ ހަމަޖެއްސުންކަމަށް މުއްތަލިބް ވިދާޅުވިއެެވެ.
އިތުރަށް މުއްތަލިބް ވިދާޅުވީ މި މަޝްރޫއުގެ ފައިނޭންސް ހަމަނުޖެހިއްޖެނަމަ އެހެން ފަރާތަކާ އެއްކޮށް އެ މަޝްރޫއު ކުރިޔަށް ގެންދަން ނިންމާފައިވާކަމަށެވެ.
