ޕޯޗުގަލްގެ އެންމެ ފުރަތަމަ ޔޫރޯ މުބާރާތަކީ 1984 ވަނަ އަހަރުގެ މުބާރާތެވެ. އެ އަހަރުގެ މުބާރާތުގެ ސެމީގައި ޕޯޗުގަލް ކުޅުނެވެ. އަދި މުބާރާތުގެ ތިންވަނަ ހޯދިއެވެ. އޭގެފަހުން ޖެހިގެން އައި 1988 އަދި 1992 ވަނަ އަހަރު މި މުބާރާތަށް އެ ގައުމު ކޮލިފައިވެފައި ނުވި ނަމަވެސް އެ ޓީމުން ވަނީ 1996 ވަނަ އަހަރު މުބާރާތުގައި ވާދަކޮށް މުބާރާތުގެ ކުއާޓާ އަށް ދަތުރުކޮށްފައެވެ. ޖެހިގެން އައި 2000 ވަނަ އަހަރުގެ މުބާރާތުގެ ސެމީގައި ވާދަ ކުރިއިރު 2004 ވަނަ އަހަރު ވަނީ މުބާރާތުގެ ފައިނަލުގައި ކުޅެފައެވެ. އަދި 2008 ވަނަ އަހަރު ކުއާޓާ ފައިނަލުގައި ކުޅެ 2012 ވަނަ އަހަރު މުބާރާތުގެ ސެމީ ފައިނަލަށް ދަތުރުކޮށްފައެވެ. 2016 ވަނަ އަހަރުގެ މުބާރާތް އެ ގައުމުން ކާމިޔާބުކުރި އިރު އެންމެ ފަހުގެ މުބާރާތުގައި އެ ޓިމު ކަޓާފައި ވަނީ މުބާރާތުގެ ގަދަ 16 ވަނަ ބުރުންނެވެ.
ކޮލިފައިވީ ގޮތް
ޔޫރޯ ކޮލިފައިން ބުރުގައި ޕޯޗުގަލް ހިމެނުނީ ސްލޮވާކިއާ، ލަގްޒެމްބާގް، އައިސްލެންޑް، ބޮސްނިއާ ހެޒްގޮވީނާ އަދި ލެއިސްޓެންޓެއިން އާއި އެކު ގުރޫޕް ޖޭގައެވެ. މިއީ ޕޯޗުގަލްއަށް ވަރަށް ފަސޭހަ ގުރޫޕަކަށް ވެގެންދިއައެވެ. އެހެނީ ކޮލިފައިން ގައި ޕޯޗުގަލް ކުޅުނު 10 މެޗު ވެސް ވަރަށް ފަސޭހަކަމާއި އެކު ވަނީ ކާމިޔާބުކޮށްފައެވެ. ކުޅުނު 10 މެޗުންވެސް މޮޅުވެ، 30 ޕޮއިންޓު ހޯދައިގެން ގުރޫޕުގެ އެއްވަނަ ޓީމުގެ ގޮތުގައި ޕޯޗުގަލް އިން ޔޫރޯ މުބާރާތުން ޖާގައެއް ޔަގީން ކުރީ ސައްތައިންސައްތަ ރެކޯޑަކާއި އެކުގައެވެ.
މުހިންމު ކުޅުންތެރިން
ޕޯޗުގަލް އަކީ ތަރިންގެ ޓީމެކެވެ. ޓީމުގެ ކޮންމެ ޑިޕާޓްމަންޓަކަށް ނަޒަރުހިންގާލިއަސް އެކަން ޔަގީންވެގެންދެއެވެ. ޚާއްސަކޮށް ދުނިޔޭގައި އުފެދުނު އެންމެ މޮޅު އެއް ފުޓްބޯޅަ ކުޅުންތެރިޔާ ކްރިސްޓިއާނޯ ރޮނާލްޑޯ ވެސް ހުރީ ޕޯޗުގަލްގައެވެ. މީގެ އިތުރުން ބަނާޑޯ ސިލްވާ، ބުރޫނޯ ފެނާންޑޭސް، ރުބެން ޑިއާސް، ޔާއޯ ފެލިކްސް އަދި ރަފައެލް ލެއާއޯ އަކީ ފާހަގަކޮށްލެވޭ ތަރިންނެވެ. މިފަހަރު މުބާރާތުގައި ފެނިގެންދާނޭ އެންމެ ވަރުގަދަ ސްކޮޑެއް އޮތީ ޕޯޗުގަލްގައެވެ.
ކޯޗު
ޕޯޗުގަލްގެ ކޯޗަކީ ރޮބާޓޯ މާޓިނޭޒްއެވެ. ބެލްޖިއަމްގެ ގައުމީ ޓީމަށް ވެސް ކުރިން އިރުޝާދު ދިން މާޓިނޭޒް ޕޯޗުގަލްއާ ހަވާލުވީ 2023 ވަނަ އަހަރުގެ ޖެނުއަރީގައެވެ.
ޕޯޗުގަލް ޓީމާއި މާޓިނޭޒް ހަވާލުވިފަހުން މިހާތަނަށް ކުޅުނު ވާދަވެރި އެއްވެސް މެޗަކުން ޕޯޗުގަލް ބަލިވެފައެއް ނުވެއެވެ. އޭނާގެ އިރުޝާދުގެ ދަށުން ޕޯޗުގަލް 15 މެޗެއް ކުޅެފައިވާއިރު، އޭގެ ތެރެއިން ބަލިވެފައިވަނީ އެކުވެރިކަމުގެ ދެ މެޗަކުންނެވެ. މާޓިނޭޒްގެ އިރުޝާދުގެ ދަށުން މިފަހަރުގެ ޔޫރޯ މުބާރާތައް ޕޯޗުގަލް ކޮލިފައިވީ ސައްތައިންސައްތަ ރެކޯޑަކާއި ވެސް އެކުގައެވެ.
ގުރޫޕުގައި އޮތް ފުރުސަތު
ޕޯޗުގަލް ހިމެނެނީ، ޗެކް ރިޕަބްލިކާއި ޖޯޖިއާ އަދި ތުރުކީ އާއި އެކު ގުރޫޕް އެފްގައެވެ. މި ގުރޫޕުގެ ފޭވަރިޓަކީ ޕޯޗުގަލްއެވެ. މިއީ އެޓީމަށް ފަސޭހަ ގުރޫޕަކަށް ވާނެއެވެ. އެހެންކަމުން ފަސޭހަކަމާއި އެކު ޕޯޗުގަލް ދެވަނަ ބުރުޔަގީން ކުރާނެކަމަށް ބެލެވެއެވެ.
