މި އަހަރު ބާއްވާ ރިޔާސީ އިންތިހާބުގައި ރައީސް އިބްރާހީމް މުހައްމަދު ސޯލިހްގެ ރަނިންމޭޓަކަށް ވުމުގެ އެއްވެސް ޝައުގެއް ނެތްކަމަށް އެމްޑީޕީގެ ޗެއާޕާސަން ފައްޔާޒު އިސްމާއީލް ވިދާޅުވެއްޖެއެވެ.
މި އަހަރު ބާއްވާ އިންތިހަބުގައި ރައީސް ސޯލިހްގެ ރެނިންމޭޓަކަށް ހަމަޖައްސަވާނެ ބޭފުޅަކާ މެދު ހިޔާލު ތަފާތުވުންތައް އުފެދިފައިވާއިރު ފައްޔާޒު ކުރެއްވި ޓުވިޓެއްގައި ވިދާޅުވީ ރަނިންމޭޓްކަމަށް ފައްޔާޒު ޝައުގުވެރިވާ ކަމުގެ ވާހަކަ ކޮންމެވެސް ސަބަބަކާ ހެދި ދައްކަވަމުން ދަނީ ރީކޯ މޫސާ މަނިކުކަމަށެވެ. އަދި ރަނިންމޭޓަކަށް ވުމުގެ އެއްވެސް ޝައުގެއް ނެތްކަމަށް ފައްޔާޒު ވިދާޅުވިއެވެ.
އެމްޑީޕީ އިން އަދި ރަނިންމޭޓަކު ކަނޑައަޅާފައި ނުވާއިރު ފައްޔާޒުގެ އިތުރުން ފޮރިން މިނިސްޓަރު އަބްދުﷲ ޝާހިދާއި، އެމްޑީޕީގެ ޕާލިމަންޓް ގުރޫޕުގެ ލީޑަރު މުހައްމަދު އަސްލަމްއަކީ ރަނިންމޭޓްކަމަށް ވާދަކުރާނެކަމަށް ގިނަ ބަޔަކު ގަބޫލުކުރާ ބޭފުޅުންނެވެ.
