އެމްއެންޕީގެ ސަރުކާރެއްގައި އެމްބަސީތަކަށް ބޭކާރުގޮތުގައި ރައްޔިތުުންގެ ފައިސާ ޚަރަދެއް ނުކުރާނެ ކަމަށް ކުރީގެ ފޮރިން މިނިސްޓަރ ދުންޔާ މައުމޫން ވިދާޅުވެއްޖެއެވެ.
އެކަމަނާ މިހެން ވިދާޅުވީ އެމެރިކާގައި ގާއިމްކުރި ރާއްޖޭގެ އެމްބަސީ ހުޅުވަން ފޮރިން މިނިސްޓަރު އަބްދުﷲ ޝާހިދު އެ ގައުމަށް ވަޑައިގަތުމުން އެކަމަށް އިޝާރާތް ކުރައްވާ ކުރެއްވި ޓްވީޓެއްގައެވެ.
އެ ޓްވީޓުގައި ދުންޔާ ވިދާޅުވެފައިވަނީ ވޮޝިންޓަނުގަ 3 ވަނަ ފަހަރަށް ގާއިމުކުރި ދިވެހި އެމްބަސީ 1 އަހަރުކުރިން ހުޅުވައިފި ކަމަށެވެ. އަދި ބޮޑުޚަރަދުކޮށް ބޮޑުރަސްމިއްޔާތު މިހާރު ބޭއްވުމުގެ ބޭނުމެއް ނުފެންނަ ކަމަށެވެ.
މީގެ އިތުރުން އެމްއެންޕީގެ ރައީސް އަދި ރިޔާސީ ކެންޑިޑޭޓް މުހައްމަދު ނާޒިމްގެ ސަރުކާރެއްގައި ދިވެހި އެމްބަސީތަކަކީ ގައުމުގެ އިގުތިސޯދު ކުރިއަރުވައި އިންވެސްޓްމަންޓުތައް ގެނެސްދޭނެ ތަންތަނަށް ވާނެ ކަމަށެވެ.
“ވޮޝިންޓަނުގަ 3ވަނަ ފަހަރަށް ގާއިމުކުރި ދިވެހި އެމްބަސީ ހުޅުވައިފި 1 އަހަރުކުރިން. ބޮޑުޚަރަދުކޮށް ބޮޑުރަސްމިއްޔާތު މިހާރު ބޭއްވުމުގެ ބޭނުމެއް ނުފެނޭ. @nazim7878 ގެ ސަރުކާރެއްގައި ދިވެހި އެމްބަސީތަކަކީ ގައުމުގެ އިގުތިސޯދު ކުރިއަރުވައި އިންވެސްޓްމަންޓުތައް ގެނެސްދޭނެ ތަންތަނަށް ވާނެ.” ދުންޔާގެ ޓްވީޓުގައި ވިދާޅުވެފައި ވެއެވެ.
މި ދަތުރުފުޅާއި ގުޅިގެން ފޮރިން މިނިސްޓަރ އަބްދުﷲ ޝާހިދު ކުރައްވާފައިވާ ޓްވީޓެއްގައި ވިދާޅުވީ އެމެރިކާގައި ދިވެހި އެމްބަސީއެއް ހުޅުވަން ވޮޝިންޓަންއަށް ދެވުމަކީ ލިބުނު އުފަލެއް ކަމަށެވެ. އަދި އެ ދަތުރުފުޅުގައި ދެގައުމުގެ ދެމެދުގައި އޮތް އެކުވެރިކަން އިތުރަށް ބަދަހިކޮށް، ދެގައުމުގެ މަސްލަހަތު ހިމެނޭ ކަންކަމުގައި މަޝްވަރާ ކުރައްވާނެ ކަމަށެވެ.
