އިކޮނޮމިކް މިނިސްޓަރު ފައްޔާޒު އިސްމާއީލްގެ މައިފުނަ ގެ މއ. ބޯގަންވިލާގައި އަލިފާނުގެ ހާދިސާއެއް ހިނގައިފި އެވެ.
ރަށްދެބައި މަގުގައި ހުންނަ ބޯގަންވިލާގޭގެ 2 ވަނަ ފަންގިފިލާގައި ރޯވި އަލިފާންގަނޑު އެމްއެންޑީއެފް އިން މިހާރު ވަނީ ކޮންޓްރޯލް ކޮށްފަ އެވެ.
މަޢުލޫމާތު ލިބޭ ގޮތުގައި އަލިފާން ރޯވީ އެގޭގެ ކޮޓަރިއެއްގައެވެ. ކޮޓަރީގައި ވަރަށް ބޮޑަށް ހުޅުހިފައި ބޭރަށްވެސް އަލިފާންގަނޑު ފެތުރުނެވެ. މިޙާދިސާގައި އެ ކޮޓަރީގައި ހުރި ހުރިހާ ސާމާނެއް ވަނީ އަނދާފައެވެ.
މިހާދިސާ ހިނގަން ދިމާވި ސަބަބެއް އަދި ސާފުވާ ގޮތެއް ނުވެ އެވެ.
މި ހާދިސާގައި މ. ބޯގަންވިލާ ގޭގެ އެއް ކޮޓަރި ބޭނުން ނުކުރެވޭ ވަރަށް އަނދާފައިވީނަމަވެސް އެއްވެސް މީހަކަށް އަނިޔާއެއް ލިބިފައި ނުވޭ. pic.twitter.com/GIHAU4aYPg
— Maldives National Defence Force (@MNDF_Official) May 6, 2023
އެމްއެންޑީއެފަށް މި ހާދިސާގެ ރިޕޯޓް ލިބިފައިވަނީ ހޮނިހިރު ދުވަހުގެ ރޭ 23.29 ގައެވެ.
އަލިފާނުގެ މިހާދިސާގައި އެއްވެސް މީހަކަށް އަނިޔާއެއް ލިބިފައި ނުވާ ކަމަށް އެމްއެންޑީއެފް އިން މައުލޫމާތު ދެއެވެ.
ބޯގަންވިލާ އަކީ މިނިސްޓަރު ފައްޔާޒުގެ އާއިލީ ގެކޮޅު ކަމަށްވީ ނަމަވެސް މިނިސްޓަރު ދިރިއުޅުއްވަނީ އެހެން ގެއެއްގަ އެވެ. އެކަމަކު ފައްޔާޒުގެ ބޭބެ އަދި މާލޭގެ ކުރީގެ މަޖިލިސް މެންބަރު އަދި އެމްޑީޕީގެ ކުރީގެ ރައީސް އިބްރާހީމް އިސްމާއީލް (އިބްރާ) ދިރިއުޅުއްވަނީ ބޯގަންވިލާގަ އެވެ.
