އެމްއެމްޕީއާރުސީ މައްސަލާގައި ސަރުކާރުން ޔާމީނުގެ މައްސަލަތައް އެކަނި ބަލަނީ ކަނޑައެޅިގެން އެމަނިކުފާނަށް އަނިޔާކުރުމުގެ ބޭނުމުގައި ކަމަށް ޕީއެމް ޕީއެންސީ ކޯލިޝަން ހިންގެވުމުގައި މި ވަގުތު އެންމެ އިސްކޮށް ހުންނެވި އަބްދުއްރަހީމް (އަދުރޭ) ވިދާޅުވެއްޖެ އެވެ.
އޭނާ މިހެން ވިދާޅުވީ އެމްއެމްޕީއަރްސީގެ ހިޔާނާތުގައި ފައިސާ ލިބުނު ކަމަށް ތުހުމަތުކޮށް ޔޫތް މިނިސްޓަރ އަހްމަދު މަހްލޫފްގެ މައްޗަށް ދައުލަތުން އުފުލާފައިވާ ރިޝްވަތު ހިފުމުގެ ދައުވާ އަނބުރާ ގެންނަން ޕްރޮސިކިއުޓަރ ޖެނެރަލްގެ އޮފީސް (ޕީޖީ)ން ނިންމުމުން އެކަމަށް އިޝާރާތް ކުރައްވަ އެވެ.
ޕީޕީއެމް، ޕީއެންސީ އިން ބޭއްވި ނޫސްވެރިންގެ ބައްދަލުވުމެއްގައި އަދުރޭ ވިދާޅުވީ އެމްއެމްޕީއާރުސީ މައްސަލާގައި ސަރުކާރުން ޔާމީނުގެ މައްސަލަތައް އެކަނި ބަލަނީ ކަނޑައެޅިގެން އެމަނިކުފާނަށް އަނިޔާކުރުމުގެ ބޭނުމުގައި ކަމަށެވެ.
މިއީ މި މައްސަލާގައި އެކަކުގެ މައްޗަށް ކުރާ ދައުވާ ދައުލަތުން އަނބުރާ ގެންދާނަމަ، ހުރިހާ އެންމެންގެ މައްޗަށް ކުރާ ދައުވާތައް ވެސް ޕީޖީ އިން އަނބުރާ ގެންދަން ޖެހޭނެ ކަމަށް ވެސް އަދުރޭ ވިދާޅުވި އެވެ.
“ވަކި ބޭފުޅެއްގެ މައްސަލަ އަބުރާ އެހެން ގެންދެވޭ ކަމަށްވަނީނަމަ އެކަމާ ގުޅިގެން ދައުވާ ކުރާ ހުރިހާ އެންމެންގެ މައްސަލަ ގެންދަން ވާނެ. ހަމައެކަނި ރައީސް ޔާމީނަށް ދައުވާކޮށްފަ ދެން އެ މައްސަލައިގައި ހިމެނޭ އެހެން މީހުންގެ މައްސަލަތައް އަނބުރާ ގެންދިއުން އެއީ އެއްވެސް ވަރަކަށް ބަލައިގަނެވޭނެ ކަމެއް ނޫން.” އަދުރޭ ވިދާޅުވި އެވެ.
މީގެ އިތުރުން އޭނާ ވިދާޅުވީ ރައީސް ސާލިހްގެ އަމާޒު ހިފާފައި ހުރީ ރައީސް ޔާމީނަށް އަނިޔާކުރުމަށް ކަމަށާއި މިއީ މި ސަރުކާރުގެ އަނިޔާވެރިކަމުގައި ރައީސް ޔާމީން ޖަލުގައި ހޭދަކުރާ ތިންވަނަ ރޯދަ މަސް ކަމަށެވެ. އަދި ރައީސް ޔާމީން ޖަލަށް ގެންދެވި ހިސާބުން ފެށިގެން ތަކުރާރުކޮށް އެކި ގޮތްގޮތައް މަސައްކަތް ކުރަމުން ގެންދަނީ ރައީސް ޔާމީން ގޭ ބަންދަށް ބަދަލު ކުރުމަށް ކަމަށް ވެސް އޭނާ ވިދާޅުވި އެވެ.
އަދުރޭ ވިދާޅުވީ އެމްއެމްޕީއާރުސީގެ ހިޔާނާތުގައި މި ސަރުކާރުގެ އިސް ބޭފުޅުން ހިމެނޭހެން 250 އެއްހާ މީހުން ބައިވެރިވި ކަމަށް ބުނާއިރު ހަމައެކަނި ޔާމީނުގެ މައްޗަށް ދައުވާކޮށް ހުކުމްކުރަނީ ނުފޫޒު ބޭނުންކޮށްގެން އެމަނިކުފާނަށް އަނިޔާކުރުމަށް ކުރާ ކަމެއް ކަމަށެވެ. އަދި މިކަމުގެ މައިގަނޑު ބޭނުމަކީ މި ސެޕްޓެމްބަރު މަހު ބާއްވާ ރިޔާސީ އިންތިހާބުގައި ޔާމީނަށް ވާދަނުކުރެވޭގޮތް ހެދުން ކަމަށް ވެސް އޭނާ ވިދާޅުވި އެވެ.
ގާނޫނީ އަސާސީގައި ބަޔާންކޮށްފައިވާ ރައީސުލްޖުމްހޫރިއްޔާއަށް ވުމުގެ އެއް ޝަރުތަކީ، ޖިނާއީ ކުށެއްކުރިކަން ސާބިތުވެގެން 12 މަސް ދުވަހަށް ވުރެ ދިގު މުއްދަތެއްގެ ހުކުމެއް އޮތް ނަަމަ، އެ ހުކުމް ތަންފީޒުކޮށް ނިމުނުތާ ނުވަތަ ކަނޑައެޅުނު އަދަބު މައާފު ކުރެވުނުތާ ތިން އަހަރު ވެފައިވާ މީހަކަށް ވާން ޖެހެއެވެ.
މިއާއިއެކު ޔާމީނަށް ރިޔާސީ އިންތިހާބުގައި ވާދަކުރުމުގެ ފުރުސަތު މި ވަގުތަށް ވަނީ ބަންދުވެފައެވެ. އެމްއެމްޕީއާރުސީގެ ހިޔާނާތުގެ ތެރޭގައި ހިމެނޭ ވ. އާރަށް ކުއްޔަށް ދިން މައްސަލައިގައި ރިޝްވަތު ހިފުމާއި މަނީލޯންޑަރިންގެ ކުށް ސާބިތުވެ ޔާމީންގެ މައްޗަށް ކުރީ 11 އަހަރުގެ ޖަލު ހުކުމެކެވެ. އެ ހުކުމް ޔާމީންގެ މައްޗަށް އިއްވީ މިދިޔަ ޑިސެމްބަރު 25، 2022 ގައެވެ. މި މައްސަލަ މިހާރު ވަނީ ހައި ކޯޓުގައި އިސްތިއުނާފުކޮށްފައެވެ.
