ބައިނަލްއަގުވާމީ ޔޯގާ ދުވަސް ފާހަގަކުރުމަށް މިއަދު ހެނދުނު ގަލޮޅު ރަސްމީ ދަނޑުގައި ކުރިއަށް ދިޔަ ހަރަކާތް، ބަޔަކު ނިކުމެ ހުއްޓުވި މައްސަލަ ބައްލަވާނެކަމަށް ރައީސް އިބްރާހީމް މުހައްމަދު ސޯލިހް ވިދާޅުވެއްޖެއެވެ.
ޔޫތު މިނިސްޓްރީ އާއި އިންޑިއާ ހައި ކޮމިޝަނާއި އިންޑިއަން ކަލްޗަރަލް ސެންޓަރު ގުޅިގެން ޔޯގާ ގެ ހަރަކާތްތައް ކުރިއަށް ދަނިކޮށް ގިނަ އަދަދެއްގެ ބަޔަކު ވަނީ ގަލޮޅު ދަނޑަށް ވަދެފައެވެ.އިސްލާމްދީނުގެ ދިފާއުގައި ހަދާފައި ހުރި ދިދަތަކެއް ހިފައިގެން މި މީހުން ދަނޑަށް ވަނުމާއެކު ޔޯގާ ކަސްރަތު ކުރަން ތިބި މީހުން ވަނީ ޔޯގާ ހުއްޓާލުމަށް ފަހު ދަނޑުން ނިކުމެފައެވެ.
މިކަމާއި ގުޅިގެން ރައީސް ކުރެއްވި ޓްވީޓެއްގައި ވިދާޅުވީ، ގަލޮޅު ދަނޑުގައި ހިނގައިދިޔަ ހަމަނުޖެހުންތައް ފުލުހުން ތަހުގީގުކުރަން ފަށާފައިވާ ކަމަށެވެ. އަދި އެއީ ވަރަށް ސީރިއަސް މައްސަލައެއް ކަން ފާހަގަކުރައްވަމުން ރައީސް ވިދާޅުވީ އެ މައްސަލަ ތަހުގީގު ކުރަމުން ދަނީ ވަރަށް ސީރިއަސް މައްސަލައެއްގެ ގޮތުގައި ކަމަށެވެ. އަދި އެކަމުގައި ޝާމިލުވާ މީހުން ގާނޫނުގެ ކުރިމައްޗަށް ގެންނާނެކަމަށް ރައީސް ސޯލިހް ވިދާޅުވިއެވެ.
An investigation has been launched by @PoliceMv into the incident that happened this morning at Galolhu stadium.
This is being treated as a matter of serious concern and those responsible will be swiftly brought before the law.
— Ibrahim Mohamed Solih (@ibusolih) June 21, 2022
ކަމާއި ގުޅިގެން ރާއްޖެ ޓީވީއަށް ދިން އިންޓަވިއުއެއްގައި މަހްލޫފް ވަނީ މިކަމަކީ އިންޓަނޭޝަނަލީ ބޮޑު ކޮންސިކުއެންސްތަކާ ކުރިމަތިވެދާނެ ފަދަ ކަމެއް ކަމަށް ވިދާޅުވެފައެވެ. ޔޯގާއަކީ އަޅުކަމެއް ނޫންކަމަށާއި އެއީ ކަސްރަތެއްކަން ފާހަގަކުރައްވަމުން މަހްލޫފް ވިދާޅުވީ ޔޯގާ ދުވަހަކީ 2014 އިން ފެށިގެން ރާއްޖޭގައި ފާހަގަކުރަމުން އަންނަ ދުވަހެއް ކަމަށެވެ.
އިތުރަށް މަހްލޫފް ވިދާޅުވީ ރައީސް ޔާމީންގެ ސަރުކާރުގައިވެސް ޔޯގާ ދުވަސް ހާމަކަން ބޮޑު ގޮތެއްގައި ފާހަގަކޮށްފައިވާކަމަށެވެ.
