އައްޑޫ ސިޓީ މީދޫ ޒޯނިޔާ އައިޝަތު ހަމްދާ އާއި ޏ،ފުވައްމުލަކު ލޫނާ އަހްމަދު އަބްދުﷲ ، އެމީހުންނަށް ލިބެން އުޅޭ އެއްމާބަނޑު ދެ ކުދިންނަށް އިންތިޒާރުކުރަމުން ދިޔައީ ފޮނި އުއްމީދުތަކާއެކުގައެވެ.
ކައިވެންޏަށްފަހު ފުވައްމުލައް ސިޓީގައި ދިރިއުޅެމުން ދިޔަ ހަމްދާގެ ބަނޑަށް އެންމެ 6 މަހުގައި ދެ ކުދިން ވިހެއީ ފުވައްމުލައް ސިޓީ ހޮސްޕިޓަލަށެވެ. މި ދެކުދިން، ދުވަސްނުފުރާ ވިހެމުގެ ސަަބަބުން އެމަރޖެންސީކޮށް އައްޑޫ އިކުޓޯރިއަލް ހޮސްޕިޓަލަށް ޓްރާންސްފާކޮށް އެން.އައި.ސީ.ޔޫގައި ފަރުވާދޭން ފެށުނެވެ.
04 ޖެނުއަރީ 2022 ގައި ދުވަސް ނުފުރާ ވިހެއި އެ ދެކުދިންނަށްޓަކައި އެ ދެމަފިރިންނާއި އާއިލާގެ ހުރިހާ ވަގުތެއް ހުސްކުރިއެވެ. އައްޑޫ އިކުޓޯރިއަލް ހޮސްޕިޓަލްގެ އެން.އައި.ސީޔޫ ގައި މި ތުއްތު ކުދިންނަށް ފަރުވާދެމުން ދިޔަ ޑޮކްޓަރު، އެ ދެކުދިންގެ ތެރެއިން. އަކްމަލް ބިން އަހްމަދު އަބްދުﷲ(4 މަސް)ގެ މައްސަލައެއް އުޅޭކަމަށާއި ހިތުގެ ސްކޭންތައް ހަދަން ރިފަރ ކުރިއެވެ.
އިކުޓޯރިއަލް ހޮސްޕިޓަލް ގައި 2 މަހާއި 10 ދުވަސް ހޭދަކުރުމަށްފަހު އެން.އައި.ސީ.ޔޫ އިން ދެ ކުދިން ޑިސްޗާރޖް ކުރުމާއެކު އެ ދެމަފރިން އަވަސްވެގަތީ މާލެ ގޮސް ހިތުގެ ހާއްސަ ޑޮކްޓަރަށް ދަރިފުޅު ދެއްކުމަށެވެ. މި ގޮތުން މާލެއިން އަކްމަލް ބެއްލެވި ޑޮކްޓަރު ވަނީ އެ ކުއްޖާގެ ގެ ހިތުގައި ބޮޑެތި މައްސަލަތަކެއް ހުރިކަން ފާހަގަކުރައްވާފައެވެ.
“އަކްމަލް ގެ އޯޕަންހާރޓް ބޮޑު ސާރޖަރީ އެއްކުރަން ޖެހޭނެކަމަށް މާލެއިން ދަރިފުޅު ބެއްލެވި ހިތުގެ ޑޮކްޓަރުން ބުނެފައިވަނީ” އަހްމަދު އިބްރާހީމް ބުންޏެވެ. “ދަރިފުޅުގެ ބޮޑު ސާރޖަރީއެއް ކުރަން ޖެހޭނެކަމަށް ޑޮކްޓަރު ބުނެފައިވާތީ، ޑޮކްޓަރުގެ ލަފައާއި އެކު ދެ ކުދިން ގޮވައިގެން ހިތުގެ ޑޮކްޓަރަށް ދެއްކުމަށް އިންޑިއާއަށް އައީ” އަހްމަދު ބުންޏެވެ.
މި އޮޕަރޭޝަން މިވަގުތު ރާއްޖޭގައި ކުރެވޭ އޮޕަރޭޝަނަކަށް ނުވާއިރު ދަރިފުޅު ގޮވައިގެން އިންޑިއާ ކޮޗިންގެ ލިސީ ހޮސްޕިޓަލް ހިތުގެ ޑޮކްޓަރުންނަށް ދެއްކުމުން ބުނެފައިވަނީ ކުއްޖާއަށް 06 މަސް ފުރުމުން އޮޕަރޭޝަން ކުރަންޖެހޭކަމަށެވެ. “ލިސީ ހޮސްޕިޓަލުން ދަރިފުޅު ބެއްލެވި ޑޮކްޓަރުވަނީ އޯޕަންހާރޓް ސާރޖަރީ އެއްކޮށް ދަރިފުޅު އުފެދުމުގައި ހިތުގައި ހުރި 4 ކަމެއް ރަނގަޅު ކުރަން ޖެހޭކަމަށް ބުނެފައި” އަހްމަދު ބުންޏެވެ،
ބޭނުން ޖެހިފައިވާ މީސްތަކުންގެ ބޭނުންތައް ފުއްދައިދިނުމަކީ ކުރެވޭ ޞަދަޤާތެކެވެ. އިބްނު ޢައްބާސް رضي الله عنهما ވިދާޅުވިއެވެ.
“އެމީހެއްގެ އަޚާގެ ޙައްޤުގައި، އޭނާއަށް އެހީތެރިވެދިނުމަށް މަސައްކަތްކޮށްފިމީހާ ދަންނައެވެ. ފަހެ އޭނާ އަޅާ ކޮންމެ ފިޔަވަޅަކަށްމެ ޞަދަޤާތެއްވެއެވެ.”
