ޔޫތު މިނިސްޓަރު އަހްމަދު މަހްލޫފްގެ މައްޗަށް އުުފުލާފައިވާ ރިޝްވަތުގެ ކުށުގެ ދައުވާގެ އިސްތިއުނާފުގެ އަޑުއެހުމެއް މާދަމާއަށް ތާވަލުކޮށްފިއެވެ.
ހައި ކޯޓުގައި ބާއްވާ އެ މައްސަލައިގެ ފުރަތަމަ އަޑު އެހުން ތާވަލް ކޮށްފައިވަނީ މާދަމާ މެންދުރު 14:00 އަށެވެ.
މަހްލޫފުގެ މައްޗަށް ދައުލަތުން ކުރާ ދައުވާގައިވަނީ އޭނާ ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރަކަށް ހުންނެވިއިރު ސްޕެޝަލް އިކޮނޮމިކް ޒޯން (އެސްއީޒެޑް) ގެ ބިލަށް ވޯޓު ދިނުމުގެ މުގާބިލުގައި ކުރީގެ ނައިބު ރައީސް އަހްމަދު އަދީބު އަތުން 33،000 ޑޮލަރު ނެންގެވި ކަމަށް ބުނާ މައްސަލައިގައެވެ.
އެ ޚިޔާނާތުގެ މޭސްތެރިޔަކަށް ހުންނެވި ކުރީގެ ނައިބު ރައީސް އަދީބު ދައުލަތަށް ދީފައިވާ ބަޔާނުގައި ވެސް މަހްލޫފަށް ރިޝްވަތު ދިން ކަމަށް ބުނެފައިވާއިރު، ފައިސާއާއި ޗެކެއް އައްލާމް ލަތީފް މެދުވެރިކޮށް މަހްލޫފަށް ދީފައިވާ ކަމަށް ވެސް އަދީބު ވަނީ ވިދާޅުވެފައެވެ.
އެ މައްސަލަ ކްރިމިނަލް ކޯޓުން ބޭރުކޮށްލުމުން އިސްތިއުނާފަށް ހައިކޯޓަށް ހުށަހެޅުމުން އެ ކޯޓުން އެ މައްސަލަ ބަލައިގަތީ މިމަހުގެ 10 ވަނަ ދުވަހުއެވެ.
މަހްލޫފަށް ކުރާ ދައުވާ ކްރިމިނަލް ކޯޓުން ބޭރުކޮށްލީ އަދީބުގެ ވާހަކަތަކަށް ބާރު ލިބޭނެ ހެއްކާއި ގަރީނާ މަދުވުމުން ކަމަށް އެ ކޯޓުގައި އެ މައްސަލައާއި ހަވާލުވެ ހުންނެވި ގާޟީ މުހައްމަދު މިސްބާހް ވިދާޅުވެފައިވެއެވެ.
ގާޒީ މިސްބާހު ފާހަގަ ކުރެއްވި ކަމަކީ، ފައިސާ ދިނީ އައްލާމް ލަތީފް ކަމަށް އަދީބު ވިދާޅުވިޔަސް އެ ފައިސާ ދައުރު ކުރި ގޮތަކާއި، އެ މުއާމަލާތް ހިންގި ގޮތުގެ އެއްވެސް ތަފްސީލެއް އަދީބުގެ ބަޔާނުގައި ނެތް ކަމުގައެވެ.
އެމްއެމްޕީއާރުސީގެ ބޮޑު ޚިޔާނާތުގެ ފައިސާ ލިބުނު ކަމަށް ބެލެވޭ 283 މީހުންގެ ލިސްޓެއް ތަހުގީގީ އިދާރާތަކުން އެކުލަވާލާފައިވާއިރު، އެ ލިސްޓުގައި މަހްލޫފްގެ ނަން ވެސް އޮތެވެ. އޭގައިވާ ގޮތުން ވެސް މަހްލޫފަށް އެސްއޯއެފް މެދުވެރިކޮށް 33،000 ޑޮލަރު ވަނީ ލިބިފައެވެ.
