ހުޅުމާލެ ބުރިޖު ނިމުނު ވަރަށްވުރެ އަވަހަށް ތިލަމާލެ ބުރިޖު ނިމޭނެކަމަށް ބެލެވޭކަމަށް ޔޫތު މިނިސްޓަރު އަހުމަދު މަހްލޫފު ވިދާޅުވެއްޖެއެވެ.
މި ސަރުކާރުން އަޅަމުންދާ ތިލަމާލެ ބުރިޖުގެ މަސައްކަތްތައް އެކަށީގެންވާ މިންވަރަކަށް ކުރިއަށް ނުދާކަމަށް ބުނެ ގިނަ ބައެއްގެ ފަޑުކިޔުންތައް އަމާޒުވެފައިވާއިރު މަހްލޫފު ވިދާޅުވީ ތިލަމާލެ ބުރިޖުގެ ތަނބެއް ނުފެންނަކަމަށް ބުނެ ހަޖޫޖަހާ ނަމަވެސް އެކަމުގެ ހަގީގަތް ތަފާތުކަމަށެވެ. ހަގީގަތުގައި ބުރިޖުގެ މުހިންމު ބައިވަރު އެތައް މަސައްތަކެއް ކުރެމުންދާކަން ފާހަގަކޮށް މަހްލޫފު ވިދާޅުވީ ތަނބުގެ މަސައްކަތްތައް ނިމޭއިރު، ކަންކަން ހުންނާނީ ބުރިޖު ރާވާލެވޭ ވަރަށް ތައްޔާރަށް ކަމަށެވެ.
މީގެ އިތުރުން މަހްލޫފު ވިދާޅުވީ މި މަޝްރޫއުގެ ދުވެލި ހުރި ގޮތަކަށް ބަލާއިރު، ހުޅުމާލެ ބުރިޖުގެ މަސައްކަތް ކުރެވުނު ވަރަށް ވުރެ ކުރު މުއްދަތެއްގައި ތިލަމާލެ ބުރިޖުގެ މަސައްކަތް ނިންމޭނެކަމަށް ބެލެވޭކަމަށެވެ.
މާލެ އާއި ވިލިމާލެ އާއި ތިލަފުއްޓާއި ގުޅީފަޅު ގުޅުވައިލާ ބްރިޖު މަޝްރޫއުގެ އެއްބަސްވުމުގައި ސޮއިކޮށްފައިވަނީ 26 އޮގަސްޓް 2021 ވަނަ އަހަރުގައެވެ.
