އައްޑޫ އިކުއެޓޯރިއަލް ހޮސްޕިޓަލް (އޭއީއެޗް) ސަރަހައްދުގައި އިންޓަރނޭޝަނަލް ފެންވަރަށް ސިއްހީ ޚިދުމަތް ދެވޭ ގޮތަށް ތަންތަން ގާއިމުކުރަން ބޭނުންވާކަމަށް އައްޑޫ ސިޓީ މޭޔަރު އަލީ ނިޒާރު ވިދާޅުވެއްޖެއެވެ،
އަލީ ނިޒާރު މިހެން ވިދާޅުވީ ރޭ ރާއްޖެޓީވީގެ ފަލަސުރުޚީ ޕްރޮގްރާމްގައި އައްޑޫ އިކުއަޓޯރިއަލް ހޮސްޕިޓަލުގެ އިރުމަތީ ފަރާތުން ދޫކުރި ގޯތިތައް އެހެން ސަރަހައްދަކަށް ބަދަލުކުރަން ނިންމާފައިވާ ނިންމުމާއި ގުޅޭ ގޮތުން ވާހަކަދައްކަމުންނެވެ.
މި ގޮތުން އަލީ ނިޒާރު ވިދާޅުވީ އެސަރަހައްދުގައި އިންޓަރނޭޝަނަލް ފެންވަރަށް ސިއްހީ ޚިދުމަތް ދެވޭ ގޮތަށް ތަންތަން ގާއިމުކުރަން ބޭނުންވާ ކަމަށެވެ. އެގޮތުން ދަތުގެ ޚިދުމަތާއި ލޮލުގެ ޚިދުމަތަކީ ރައްޔިތުން ވަރަށް ބޭނުންވާނެ ޚިދުމަތްތަކެއްކަން ނިޒާރު ވަނީ ފާހަގަކުރެއްވިއެވެ. އަދި ފުޑް ކޯޓުތައް ވެސް އެސަރައްހަދުގައި ހެދި، އިޤްތިޞާދީ ގޮތުން ފައިދާ ބޮޑު ސަރަހައްދަކަށް އެ ސަރަހައްދު ހެދޭނެކަމަށް ނިޒާރު ވިދާޅުވިއެވެ.
މީގެ އިތުރުން ނިޒާރު ވިދާޅުވީ އޭއީއެޗް ސަރަހައްދަކީ އިޤްތިޞާދީ، އަދި އިޖްތިމާއީ ގޮތުން މުހިންމު ސަރަހައްދެއް ކަމަށެވެ، އަދި އެ ސަރަހައްދު ތަރައްގީ ކުރާނެ ޚާއްސަ ޕްލޭނެއް އެބައޮތް ކަމަށާއި އަދި އެ ޕްލޭނާއޮ އެއްގޮތަށް އެސަރަހައްދު ތަރައްގީ ކުރެވިއްޖެނަމަ އެކަމުގެ މަންފާ އައްޑޫ ސިޓީގެ އިތުރުން، މުޅި ރާއްޖެއަށް ކުރާނެ ކަމަށެވެ.
ޕްލޭންތައް ކުރުމަށް ކައުންސިލުތަކަށް ފުރުސަތުދޭން ޖެހޭކަން ފާހަގަކުރައްވައި ނިޒާރު ވިދާޅުވީ އައްޑޫ ޕްލޭން ކުރުމުގެ ފުރުސަތު އައްޑޫ ކައުންސިލަށް ދޭން ޖެހޭ ކަމަށެވެ
