އާ އަހަރާއެކު ގއ. ކަނޑުހުޅުދޫގައި ޥީ.އައި.ޕީ ލައުންޖެއް ހިމެނޭ ގޮތައް ފެރީ ޓާރމިނަލެއް ހުޅުވުމަށް ތައްޔާރުވަމުން އަންނަ ކަމަށް ކަނޑުހުޅުދޫ ކައުންސިލްގެ ރައީސް އަހުމަދު ޝަހީމް ވިދާޅުވެއްޖެއެވެ.
ސަރުކާރުގެ ދަތުރުފަތުރު ކުރުމުގެ ސިޔާސަތުގެ ދަށުން އެ އަތޮޅުގައި ދަތުރުކުރާ ދެ ފެރީވެސް މަޑުކުރަނީ ކަނޑުހުޅަދޫގައި ކަމަށާއި، އަދި މާވާރުލު އެއާރޕޯޓް ހުޅުވުމުގެ ސަބަބުން އެރަށަށް އަރާ ފައިބާ މީހުންގެ އަދަދު އިތުރުވެފައިވާކަމަށްވެސް ޝަހީމް ވަނީ ފާހަގަ ކުރައްވާފައެވެ. އަދި އެ ޓާމިނަލް އަކީ ރަށަށް އަރާ މީހުންނަށް ފަސޭހައިން މަޑުކޮށްލަން ތިބެވޭގޮތަށް ވީ.އައީޕީ. ލައުންޖަކާއިއެކު ތައްޔާރުކުރާ ތަނެއްކަމުގައިވެސް ޝަހީމް ވިދާޅުވިއެވެ.
2 ލައްކަ ރުފިިޔާގެ ބަޖެޓަކާއެކު މިތަން ނިންމަން ހަވާލުކުރެވިފައިވަނީ ގދ، ތިނަދޫ ކުންފުންޏެއް ކަމުގައިވާ ޑީ.އެމް.އެން ކޮމްޕެނީ އާއެވެ،
ޓާމިނަލްގެ 90 އިންސައްތަ ނިމިފައިވާއިރު އަންނަ އަހަރު ޖެނުއަރީ މަހުގެ 1 ވަނަ ދުވަހުން ފެށިގެން ޓާމިނަލްގެ ހިދުމަތް ދޭން ފެށޭނެ ކަމަށް ކައުންސިލުން ބުނެއެވެ.
