ކާޑެއްދޫ އެއާޕޯޓަކީ ހުވަދުއަތޮޅުގައި އެންމެ ފުރަތަމަ ތަރައްޤީކޮށް އޮޕަރޭޓްކުރަން ފެށި އެއާޕޯޓެވެ. ހުވަދުއަތޮޅުގެ އެންމެހާ ރައްޔިތުންނާއި އަތޮޅަށް އަންނަ ފަތުރުވެރިންވެސް 2012 ވަނަ އަހަރާއި ހަމައަށް ވައިގެ މަގުން ދަތުރުކުރުމަށް މިއަތޮޅުގައި އޮތީ ހަމައެކަނި މި އެއާޕޯޓެވެ. ނަމަވެސް މި އެއާޕޯޓަކީ ކޮންފެންވަރެއްގައި އޮތް ތަނެއްކަން އެނގޭނީ މި އެއާޕޯޓުން ދަތުރުކުރި މީހުންނަށްތާއެވެ.
އޮޕަރޭޓްކުރަން ފެށިތާ 27 އަހަރުވެފައިވާ މި އެއާޕޯޓުގެ ރަނގަޅު ފެންވަރެއްގެ ރަންވޭއެއް، ޓާރމިނަލެއް ނެތްއިރު ވަންނަ ގޭޓެއް ނެތެވެ. ފްލައިޓުން ލަގޭޖްތައް ޓްރޮލީތަކުގައި ގެނެސް އަށްޓެއް މައްޗަށް އަތުރާލަނީ އެތަނުގެ މުވައްޒަފުންނެވެ. ފްލައިޓް ޑިލޭވެގެން ނުވަތަ ޗެކިންކޮށްލުމަށްފަހު އެއާޕޯޓުގައި މަޑުކޮށްލާ ވަގުތުކޮޅުގައި ޕަސެންޖަރުން ބޭނުންކޮށްލާނެ ރަނގަޅު ފެންވަރެއްގެ ކެފޭ ނުވަތަ ރެސްޓޯރެންޓެއް މި އެއާޕޯޓުގައި ނެތެވެ. ޕަސެންޖަރުންނާއި މުވައްޒަފުން ބޭނުންކޮށްލަން ހުންނަ ފާޚާނާ ބަރީގައި ފާޚާނައެއްގެ ހުންނަންޖެހޭ ސާމާނު ހަމައަށް ނުހުރެއެވެ.
2012 ވަނަ އަހަރު ކޫއްޑޫ އެއާޕޯޓް ހުޅުވައި ހުވަދުއަތޮޅުގައި 02 އެއާޕޯޓް އޮޕަރޭޓްކުރަން ފެއްޓިފަހުން، ދިވެހި ސަރުކާރުގެ ޑޮމެސްޓިކް ބަޖެޓުން 29.3 މިލިއަން ރުފިޔާ ހަރުދުކޮށްގެން ހުވަދުއަތޮޅުގައި 03 ވަނަ އެއާޕޯޓް މިއަހަރުގެ މާރޗް މަހު އޮޕަރޭޓްކުރަން ފެށީވެސް ކާޑެއްދޫ އެއާޕޯޓުގެ ހިދުމަތްތަކުގެ ފެންވަރު ރަނގަޅުކުރުމަށް އެއްވެސް މަސައްކަތެއް ނުކޮށޭ ބުނުން ދޮގަކަށް ނުވާނެއެވެ. އަދި ފަރެސްމާތޮޑާ އެއާޕޯޓު ތަރައްޤީ ކުރުމަށް 42.5 މިލިއަން ރުފިޔާ މިއަހަރުގެ ބަޖެޓުގައި ހިމަނާފައިވާއިރު ކާޑެއްދޫ އެއާޕޯޓް ތަރައްގީކުރުމާއިމެދު ސަރުކާރުން ދެކެވެނީ ވާހަކަތަކެވެ.
މިއެއާޕޯޓު ވިލާ އެއަރ އަށް 2013 ގައި ދިނުމަށް ފަހު އެ ތަނުގެ އެއްބަސްވުން ބާތިލްކޮށް، ކުރީގެ ސަރުކާރުން 2017 ވަނަ އަހަރު ވަނީ އެ ތަން އަތުލާފައެވެ. އަދި އޭގެ ފަހުން އެއްބަސްވުން ބާތިލްކުރީ ގާނޫނާ ޚިލާފަށް ކަމަށްވާތީ އެތަން ވިލާ އެއަރއަށް އަނބުރާ ދިނުމަށް 2018 ވަނަ އަހަރު ސިވިލް ކޯޓުން އެންގިއެވެ. ނަމަވެސް، މި ހުކުމް އިސްތިއުނާފުކުރަން ދައުލަތުން ސުޕްރީމް ކޯޓަށް ހުށަހެޅި މައްސަލައިގެ އަޑުއެހުމެއް މިއަހަރުގެ އޮކްޓޯބަރު މަހު ބާއްވަން ތާވަލުކުރުމަށް ފަހު ވަނީ ކެންސަލް ކޮށްފައެވެ.
ކޮންމެއަކަސް ކާޑެއްދޫ އެއާޕޯޓް އިންޓަނޭޝަނަލް އެއާޕޯޓަކަށް ބަދަލުކޮށް، ގދ. ތިނަދޫއާއި ގުޅުވާލުމަށް ރައީސުލްޖުމްހޫރިއްޔާ އިބްރާހިމް މުޙައްމަދު ސޯލިޙު ނިންމެވިކަން، ތިނަދޫ އުތުރު ދާއިރާގެ މެމްބަރު އަބްދުލްމުޣުނީ އާއި ތިނަދޫ ދެކުނު ދާއިރާގެ މެމްބަރު އަބްދުﷲ ސަނީފުގެ އިތުރުން މަޑަވެލި ދާއިރާގެ މެމްބަރު ޙުސައިން ފިރުޝާން ވަނީ ސޯޝަލް މީޑިއާގައި ހާމަކޮށްފައެވެ.
މިއުއްމީދުގައި މިއަތޮޅުގެ ރައްޔިތުން މިތިބީ އިންޓަނޭޝަނަލް އެއާޕޯޓެއް އަތޮޅަށް އައުމުން އަތޮޅުގެ އިގްތިސާދަށް ހުޅުވިގެންދާނެ ދޮރުތައް ހުޅުވޭނެ ދުވަހެއްގެ އިންތިޒާރުގައެވެ.
މީހުން ދިރިއުޅޭ 18 ރަށާއި 9 ރިސޯޓާއި 199 ފަޅު ރަށުގެ މައްޗަށް އެކުލެވޭ ހުވަދުއަތޮޅުގެ އާބާދީއަކީ 34،433 މީހުންނެވެ. ހުވަދުއަތޮޅު އިދާރީ ގޮތުން ދެބައަކަށް ބަހާފައިވާއިރު، ގދ. އަތޮޅުގެ އާބާދީ 20 ހާހަށްވުރެ ގިނައެވެ.
ކާޑެއްދޫ އެއާޕޯޓް އިންޓަނޭޝަނަލް ކުރެވިއްޖެނަމަ މިހާރު ހުވަދުއަތޮޅުގައި އޮތް 05 ރިސޯޓުގެ އިތުރުން 199 ފަޅު ރަށަށް ރިސޯރޓް ވިޔަފާރީގެ ފުރުސަތުތައް ހުޅުވި، ލޯކަލް ޓުއަރިޒަމަށް މިއަތޮޅުގެ ހުރިހާ ރަށަކަށް ފުރުސަތު ހުޅުވިގެންދާނެއެވެ. ފެރީ ނިޒާމް މިހާރަށްވުރެ ފެންވަރު ރަނގަޅު ވެގެންދާނެއެވެ. ލޯކަލް ވިޔަފާރިތަކާއި ސުވެނިއަރޝޮޕްތަކުގެ އިތުރުން ކާޑެއްދޫ އެއާޕޯޓް އިންޓަނޭޝަނަލްވެގެން ދިއުންމީ، އެޖެންޑާ19 ގެ ވައުދެއްކަމަށްވާ އަމިއްލަ ގޭގެ ކޮޓަރި ގެސްޓުންނަށް ދޫކުރެވޭ ގޮތަށް “ހޯމް ސްޓޭ” އަށް ހުޅުވިގެންދާ މަގެއްކަން މިއަތޮޅުގެ ރައްޔިތުން ގަބޫލުކުރެއެވެ.
ތިނަދޫއަކީ މިއަތޮޅުގެ ވިޔަފާރީގެ މައި ހަބަށްވެފައި ތިނަދޫއާއި ކާޑެއްދޫއާއި ދެމެދު ރަނގަޅު ކަނެކްޝަނެއް އުފެދެން ޖެހެއެވެ. ހުވަދުއަތޮޅުގެ އެންމެ ގިނަ ރައްޔިތުން އެކި ކަންކަމުގައި އެންމެ ގިނައިން ދަތުރުކުރާ ރަށަކަށް ތިނަދޫ ވެފައިވާއިރު، ތިނަދޫއާއި ކާޑެއްދޫ ގުޅާލާނީ ބްރިޖަކުންކަމަށް ތިނަދޫ އުތުރު ދާއިރާގެ މެމްބަރު އަބްދުލްމުޣުނީ ވިދާޅުވިއެވެ.
މިއަތޮޅުގެ ރައްޔިތުން ދެކޭގޮތުގައި ތަރައްޤީއަކީ ކޮންކްރީޓް ބްރިޖްތަކަށްވުރެ ބޮޑަށް އާއްމު ރައްޔިތުންނަށް އާމްދަނީ ލިބޭނެ މަގުފަހިކޮށްދީގެން ގެނެވޭ އެއްޗެކެވެ. އެއާޕޯޓްގެ ޚިދުމަތްތައް ރަނގަޅުވެ، ބޭރުޤައުމުތަކާއި ހުވަދުއަތޮޅާއި ޑައިރެކްޓްކޮށް ގުޅާލެވި، ވިޔަފާރިތަކަށް މަގުފަހިވެގެން ދިއުން އެއީ ހުވަދުއަތޮޅުގެ ރައްޔިތުންނަށް އާމްދަނީ ހޯދައި ތަރައްގީވެވޭނެ ކަމެއްކަމަށް މިއަތޮޅުގެ ރައްޔިތުން ދެކެއެވެ.
ދައުލަތުން ހަރަދުކޮށްގެން ތަރައްގީ ކުރާނީތޯ ނުވަތަ އަމިއްލަ ބަޔަކަށް ދީގެން އިންޓަނޭޝަނަލް އެއާޕޯޓަކަށް ބަދަލު ކުރުމާމެދު ސަރުކާރުން ވިސްނަމުންދާއިރު، ޒަމާނީ ފެންވަރަކަށް މުޅި އެއާޕޯޓް ބަދަލުވެގެން ނުދިޔަޔަސް އެންމެ ކުޑަމިނުން ޕްރައިވެޓް ޖެޓުތަކަށް ކާޑެއްދޫ އެއާޕޯޓަށް ދަތުރުކޮށް ދެތިން ދުވަހު މަޑުކޮށްލެވޭވަރަށް އެތަނުގެ ފެންވަރު މިހާރަށްވުރެ ރަނގަޅު ވެގެން ދިއުންވެސް ވާނީ މި އަތޮޅަށް ލިބޭ ވަރަށް ބޮޑު ކުރިއެރުމެއްކަމަށް މިއަތޮޅުގެ ރައްޔިތުން ދެކެއެވެ. އުއްމީދަކީ މިއެވެ.