ކޮވިޑް-19 އަށް ޓެސްޓްކުރެވޭ މެޝިނެއް، ނ. މާފަރު އިންޓަނޭޝަނަލް އެއާޕޯޓަށް ގެނެސްފި އެވެ. އެ މެޝިން މިއަދު ރާއްޖެ ގެނައީ އޭޑީކޭ ޓްރޭޑް އެންޑް ޝިޕިންގ އިންނެވެ.
އެ ކުންފުނިން މިއަދު ކުރި ޓްވީޓެއްގައި ބުނެފައި ވަނީ މާފަރު އެއާޕޯޓުގައި ބޭނުންކުރުމަށް ގެނެސްފައި ވަނީ ޕީސީއާރު ލައިޓް ސައިކްލަރ 96 މަރުކާގެ މެޝިނެއް ކަމަށެވެ.
As technical consultants for the project we are proud of the new, modern PCR lab being established at Maafaru Airport by Soneva Group. We will continue to provide technical, logistic and supply chain support to the venture. #StrongerTogether #BeatCovid19 pic.twitter.com/4MAXAbksBc
— ADK Trade and Shipping (@ADKTrades) June 19, 2020
މާފަރު އެއާޕޯޓްގައި ކޮވިޑް-19 އަށް ޓެސްޓްކުރެވޭ ލެބޯޓްރީއެއް ޤާއިމްކުރަނީ އެ ސަރަޙައްދުގައި ރިސޯޓެއް ހިންގާ ސޮނެވާ ގްރޫޕުންނެވެ. އަދި އެ ލެބޯޓްރީ އަށް ބޭނުންވާ ސާމާނު އެތެރެކުރަނީ އޭޑީކޭ ޓްރޭޑިންގ މެދުވެރިކޮށެވެ. އެ ލެބޯޓްރީގެ މަސައްކަތް މި މަހުގެ ފަހުކޮޅު ނިމޭނެ ކަމަށް ލަފާކުރެވެއެވެ.
ކޮވިޑް-19 އާއި ގުޅިގެން ރާއްޖެ ފުރަބަންދުކޮށްފައިވާއިރު، އަންނަ ޖުލައި މަހު ރާއްޖޭގެ ބޯޑަރު ފަތުރުވެރިންނަށް ހުޅުވާލުމަށް ދަނީ ތައްޔާރުވަމުންނެވެ. އަދި މާފަރު އެއާޕޯޓުވެސް ބައިނަލްއަޤްވާމީ ދަތުރުތަކަށް ހުޅުވާލުމަށް ތައްޔާރުވަމުންދާއިރު، އެކަމަށްޓަކައި އެއާޕޯޓަށް ގެންނަންޖެހޭ ބަދަލުތައް ގެނައުމުގެ މަސައްކަތް ދަނީ ކުރަމުންނެވެ.
ރާއްޖޭގައި މިވަގުތު ކޮވިޑް-19 އަށް ޓެސްޓްކުރެވެނީ މާލެ އާއި އައްޑޫ ސިޓީގައެވެ. މާފަރު އެއާޕޯޓެ ލެބޯޓްރީ ޤާއިމްވުމާއެކު، މާފަރު ވެގެންދާނީ ރާއްޖޭގައި ކޮވިޑް-19 އަށް ޓެސްޓްކުރެވޭ ތިންވަނަ ސަރަޙައްދަށެވެ.
