ކޮވިޑް-19 އާއި ގުޅިގެން މާލޭގެ ފުރަބަންދު އަންނަ އާދިއްތަ ދުވަހުގެ ނިޔަލަށް ދަމަހައްޓަން ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ނިންމައިފި އެވެ.
ޑިރެކްޓަރ ޖެނެރަލް އޮފް ޕަބްލިކް ހެލްތު، މައިމޫނާ އަބޫބަކުރު ސޮއިކުރައްވައި ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ނެރުނު އެންގުމެއްގައި ބުނެފައި ވަނީ މެއި 28 ވަނަ ދުވަހުން ފެށިގެން ފުރަބަންދަށް ލިބިފައިވާ ލުއިތަކުގެ ސަބަބުން ބަލި ފެތުރުމުގެ ޙާލަތަށް އައިސްފައިވާ ބަދަލުތަކަށް ބަލައި، ޖޫން 15 ވަނަ ދުވަހުން ފެށިގެން ލުއިތައް ދިނުމަށް ރާވާފައިވުމާއެކު، މިއަދުން ފެށިގެން ޖޫން 14 ވަނަ ދުވަހުގެ ނިޔަލަށް ފުރަބަންދުގެ މުއްދަތު އިތުރުކުރުމަށް ނިންމާފައިވާ ކަމަށެވެ.
މި ޙާލަތުގައި މާލެ، ހުޅުމާލެ އަދި ވިލިމާލޭގައި އެއްގަމު އުޅަނދުފަހަރު ދުއްވުމާއި، މަގުމައްޗާއި އާންމު ތަންތަނަށް ނުކުތުމާއި، ޕަބްލިކް ޓްރާންސްޕޯޓްގެ ޚިދުމަތް ދިނުމުގެ އިތުރުން މާލެ، ހުޅުމާލެ، ވިލިމާލެ، ތިލަފުށި އަދި ގުޅީފަޅާށް މީހުން އަރައި ފޭބުން މަނާވާނެ އެވެ.
ނަމަވެސް މި ޙާލަތުގައި ބައެއް ލުއިތައް ދިނުމަށްވެސް ވަނީ ނިންމައިފަ އެވެ. އޭގެ ތެރޭގައި:
ފުރަބަންދުގެ ޙާލަތަށް މާލެ ގެނެވުނީ މާލެއިން އޭޕްރީލް 15 ވަނަ ދުވަހު ކޮވިޑް-19 އަށް މީހަކު ފުރަތަމަ ފަހަރަށް ޕޮޒިޓިވް ވި ހިސާބުންނެވެ.
މުޅި ރާއްޖެ އިން މިހާތަނަށް ކޮވިޑް-19 އަށް ޕޮޒިޓިވް ވެފައިވާ މީހުންގެ އަދަދަކީ 1976 ކަމަށްވާއިރު، އެ ބަލިން ރާއްޖެއިން 1153 މީހަކު ވަނީ ރަނގަޅުވެފަ އެވެ. އަދި ކޮވިޑް-19 ޖެހިގެން ރާއްޖެއިން މިހާތަނަށް އަށް މީހަކު ވަނީ މަރުވެފަ އެވެ.
