ދައުލަތުގެ ޓެކްސް އިދާރާ، މޯލްޑިވްސް އިންލަންޑް ރެވެނިއު އޮތޯރިޓީ (މީރާ)ގެ ކޮމިޝަނަރ ޖެނެރަލް އޮފް ޓެކްސޭޝަނަށް ޑިރެކްޓަރުންގެ ބޯޑުގެ މުސާރަ ދިނުމަށް ނުފެންނަ ކަމަށް ރައްޔިތުންގެ މަޖިލީހުން ފާސްކޮށްފި އެވެ.
އެގޮތުން މީރާގެ ބޯޑުގެ މެންބަރުންނަށް މުސާރަ ދިނުމުގައި ޢަމަލުކުރާނެ އުސޫލަކާގުޅޭ ގޮތުން ލަފައަކަށް އެދި ހުށަހަޅާފައިވާ މައްސަލައިގައި މާލިއްޔަތު ކޮމިޓީން ދިރާސާކޮށް ނިންމިގޮތުގެ ރިޕޯޓު ފާސްކޮށްފައި ވަނީ ވޯޓުގައި ބައިވެރިވެވަޑައިގެންނެވި 63 މެންބަރުންގެ އިއްތިފާޤުންނެވެ.
މާލިއްޔަތު ކޮމިޓީގެ ރިޕޯޓުގައި ބުނެފައިވަނީ ކޮމިޝަނަރ ޖެނެރަލަށް ޑިރެކްޓަރުންގެ ބޯޑުގެ މުސާރަދޭން ނުފެންނަކީ ޓެކްސް ނެގުމާބެހޭ އިދާރީ ޤާނޫނަށް ދެވަނަ އިޞްލާޙު ގެނައުމުގެ ޤާނޫނަށް ޢަމަލުކުރަން ފެށުމާ ގުޅިގެން އަލަށް އެކުލަވައިލެވުނު މީރާގެ ބޯޑުގައި، ކޮމިޝަނަރ ޖެނެރަލް އޮފް ޓެކްސޭޝަން ހިމެނިވަޑައިގަންނަވަނީ ވޯޓު ނުދެވޭ މެންބަރެއްގެ ގޮތުގައި، މަޤާމުގެ ހައިޞިއްޔަތުގެ ގޮތުން ކަމަށްވާތީ ކަމަށެވެ.
މީގެ އިތުރުން ކޮމިޓީން ނިންމާފައި ވަނީ ދައުލަތުގެ މާލިއްޔަތުގެ ކަންކަން ބެލެހެއްޓުމުގެ މަސްއޫލިއްޔަތު ޙަވާލުކޮށްފައިވާ ވުޒާރާގައި ޓެކުހާބެހޭ ސިޔާސަތުތަކާ ގުޅޭ ކަންކަން ބެލެހެއްޓުމަށް މިނިސްޓަރު ކަނޑައަޅުއްވާ ފަރާތެެއްގެ ގޮތުން ބޯޑުގެ ޗެއާޕާސަންގެ ގޮތުގައި ޢައްޔަންކުރުމާއެކު، މިހާރުގެ ޗެއާޕާސަންއަށް ޑިރެކްޓަރުންގެ ބޯޑުގެ ޗެއާޕާސަންގެ މުސާރަ ދިނުމަށް ފެންނަ ކަމަށެވެ.
މާލިއްޔަތު ކޮމިޓީގެ ރިޕޯޓުގައި ބުނެފައިވަނީ 2015 ވަނަ އަހަރު މީރާގެ ޑިރެކްޓަރުންގެ ބޯޑުގައި ހިމެނޭ 5 މެންބަރެއްގެ މަޤާމުގެ މުއްދަތު 2 އޮގަސްޓު 2015 ގައި ހަމަވުމާ ގުޅިގެން، 10 އޮގަސްޓު 2015 ވަނަ ދުވަހު ޢައްޔަން ކުރައްވާފައިވާ އައު ބޯޑުގެ މެންބަރުންނާއެކު ބޭއްވި ޑިރެކްޓަރުންގެ ބޯޑުގެ ބައްދަލުވުމުގައި، ބޯޑުގެ ޗެއަރޕަރސަން ކަމަށް ކޮމިޝަނަރ ޖެނެރަލް އޮފް ޓެކްސޭޝަން ޔަޒީދު މުޙައްމަދު އަދި ޑެޕިއުޓީ ޗެއަރޕަރސަން ކަމަށް ޑެޕިއުޓީ ކޮމިޝަނަރ ޖެނެރަލް އޮފް ޓެކްސޭޝަން ހަސަން ޒަރީރު ބޯޑުގެ މެންބަރުންގެ އަޢްލަބިއްޔަތުން ޢައްޔަންކުރެއްވުމާއެކު، އެބޯޑުގެ ޗެއަރޕަރސަން އަދި ވައިސް ޗެއަރޕަރސަންއަށް ދެމުން ގެންދާ މުސާރަ އެފަރާތްތަކަށް ދިނުމާ މެދު މާލިއްޔަތު ކޮމިޓީގެ ލަފައަކަށް ފޮނުއްވާފައިވާ ކަމަށެވެ.
އަދި މަޤާމުގެ ހައިޞިއްޔަތުން ޑިރެކްޓަރުންގެ ބޯޑުގައި ހިމެނިވަޑައިގަންނަވާ މެންބަރުންނަށް އެބޭފުޅުންނަށް ކަނޑައެޅިފައިވާ މުސާރައާއި ޢިނާޔަތްތައް ފިޔަވައި އެހެން އެލަވަންސެއް ލިބިދިނުމަށް ނުފެންނަކަމަށް 18 ވަނަ މަޖިލީހުގެ މާލިއްޔަތު ކޮމިޓީގެ ބައެއް މެންބަރުން ފާހަގަކޮށްފައިވާ ކަމަށް ރިޕޯޓުގައި ބަޔާންކޮށްފައިވެއެވެ. އަދި މަޤާމުގެ ހައިސިއްޔަތުން އެ ބޯޑުގައި ހިމެނިވަޑައިގަންނަވާ ބޭފުޅުންނަށް، މުސާރަ އާއި ޢިނާޔަތްތަކުގެ އިތުރުން އެލަވަންސް ލިބިވަޑައިގަންނަވާ ކަމަށްވެސް 18 ވަނަ މަޖިލީހުގެ މާލިއްޔަތު ކޮމިޓީގެ ބައެއް މެންބަރުން ފާހަގަކުރެއްވިކަން ޔައުމިއްޔާއިން އެނގެން އޮތްކަމަށްވެސް ރިޕޯޓުގައި ބުނެފައި ވެއެވެ.
2015 ވަނަ އަހަރު، ކޮމިޝަނަރ ޖެނެރަލް އޮފް ޓެކްސޭޝަން ޑިރެކްޓަރުންގެ ބޯޑުގެ ޗެއަރޕަރސަން ކަމަށް އަދި ޑެޕިއުޓީ ކޮމިޝަނަރ ޖެނެރަލް އޮފް ޓެކްސޭޝަން އެ ބޯޑުގެ ވައިސް ޗެއަރޕަރސަން ކަމަށް ވަނީ އައްޔަންކޮށްފައެވެ. އަދި ޑިރެކްޓަރުންގެ ބޯޑަށް ކަނޑައަޅާފައިވާ މުސާރައާއި އިނާޔަތްތައް 2015 ވަނަ އަހަރު ޢައްޔަންކުރެވުނު ބޯޑުގެ މެމްބަރުންނަށް ދިނުމަށްވެސް ވަނީ ނިންމައިފައެވެ.
އެ ނިންމުމާއި ގުޅިގެން، ކޮމިޝަނަރ ޖެނެރަލް އޮފް ޓެކްސޭޝަނަށް ޑިރެކްޓަރުންގެ ބޯޑުގެ ޗެއަރޕަރސަންގެ މުސާރަ އަދި ޑެޕިއުޓީ ކޮމިޝަނަރ ޖެނެރަލް އޮފް ޓެކްސޭޝަނަށް ވައިސް ޗެއަރޕަރސަންގެ މުސާރަ ހަމަޖެހި، ބޯޑުގައި ހިމެނިވަޑައިގަންނަވާ ނޮން އެގްޒެކެޓިވް 5 މެންބަރުންނަށް، ބޯޑުގެ މެންބަރުންގެ މުސާރަ ހަމަޖެހި، އޭރުގެ މީރާ ބޯޑުގެ 7 މެންބަރުންނަށް މުސާރަ ހަމަޖެހިގެން ގޮސްފައިވާކަމަށް ކޮމިޓީ ރިޕޯޓްގައި ފާހަގަކޮށްފައި ވެއެވެ.
މީރާގެ ޑިރެކްޓަރުންގެ ބޯޑްގެ ޗެއާޕާސަނަށް މުސާރައިގެ ގޮތުގައި 12،000ރ. ލިބޭއިރު، ޑެޕިއުޓީ ޗެއާޕާސަނަށް 11،000ރ. އަދި ބޯޑުގެ އެހެނިހެން މެންބަރުންނަށް 10،000ރ. ލިބޭނެއެވެ.
