ކޮވިޑް-19 ގެ ސަބަބުން ކަރަންޓީން ކުރަން ޖެހޭ މީހުންނަށް ހާއްސަ، ކަރަންޓީނު ފެސިލިޓީއެއްގެ ގޮތުގައި އައްޑޫސިޓީގެ ކެނަރީފް ރިސޯޓު (ކުރީގެ ހެރެތެރެ ރިސޯޓް) ހަމަޖައްސާފައިވާ ކަމަށް ޓޫރިޒަމް މިނިސްޓަރު އަލީ ވަހީދު މިރޭ ވިދާޅުވެއްޖެ އެވެ.
ރާއްޖޭގެ އެންމެ އުތުރާއި ދެކުނުން ދެ ރިސޯޓް ހަމަޖައްސާފައިވާ ކަމަށް ވިދާޅުވެ މިނިސްޓަރު އަލީވަހީދު މިރޭ ކުރެއްވި ޓްވީޓެއްގައި ވިދާޅުވީ އުތުރާއި ދެކުނުގައި ހަމަޖައްސާފައިވާ ފެސިލިޓީތައް މިރެ އާއި މާދަމާ އެކްޓިވްކުރަން ފަށާނެ ކަމަށެވެ. އަދި އެންމެން އެކުގައި މަސައްކަތްކޮށް ކޮވިޑް-19 އިން ސަލާމަތް ވެވޭނެ ކަމަށް ވެސް ޓްވީޓްގައި ވިދާޅުވެފައިވެ އެވެ.
Isolation/Quarantine facilities in the North & South of the country will be activated tonight & tomorrow. Stay home & Stay safe. InSha Allah we will battle this storm together as one nation ??
— Ali Waheed (@ali20waheed) April 29, 2020
މައުލޫމާތު ލިބިފައިވާ ގޮތުގައި ކަރަންޓީން ފެސިލިޓީގެ ގޮތުގައި އުތުރުން ހަމަޖައްސާފައިވަނީ ހއ. ދޮނަކުޅީގައި ހިންގާ ހައިޑަވޭ އައިލެންޑް ރިސޯޓެވެ. އެއީ 100 އެނދުގެ ރިސޯޓެކެވެ. ދެކުނުން ހަމަޖައްސާފައިވަނީ 270 ކޮޓަރީގެ ކެނަރީފް ރިސޯޓެވެ.
އައްޑޫސިޓީގެ ކެނަރީފް ރިސޯޓް ކޮވިޑް 19 އަށް ޚާއްޞަ ކަރަންޓީނު ފެސިލިޓީއެއްގެ ގޮތުގައި ބޭނުން ކުރަން ތައްޔާރުކޮށްފައިވާއިރު ގަމުގައި ހުންނަ ދޫގަހާއި މަރަދޫފޭދޫ ވޭވް ސައުންޑުވެސް ވަނީ ކަރަންޓީނު ފެސިލިޓީސް ގެ ގޮތުގައި ތައްޔާރުކޮށްފައެވެ. މީގެ އިތުރުން ހިތަދޫ ރީޖަނަލް ހޮސްޕިޓަލް (އެޗްއާރުއެޗް) ކޮވިޑަށް ޚާއްޞަ ހޮސްޕިޓަލެއްގެ ގޮތުގައި ދަނީ ތައްޔާރު ކުރަމުންނެވެ. މި ހޮސްޕިޓަލުގައި 20 އެނދުގެ އައިސީޔޫއެއް ހުންނާނެ ކަމަށް އައްޑޫ އިކުއަޓޯރިއަލް ހޮސްޕިޓަލްގެ މެނޭޖަރ ޝަރަފުއް ސާދާތު ވަނީ ވިދާޅުވެފައެވެ. އަދި މި ހޮސްޕިޓަލުގެ މަސައްކަތް މި ހަފްތާގެ ތެރޭގައި ނިމޭނެ ކަމަށް ވެސް ސާދާތު ވިދާޅުވިއެވެ.
ކޮވިޑް 19 އަށް މާލެއާއި ރާއްޖެތެރޭގެ ބައެއް ރަށްރަށުން މީހުން ޕޮޒިޓިވް ވަމުން އަންނަ އިރު އައްޑޫސިޓީން މިހާތަނަށް ނެގި ހުރިހާ ސާމްޕަލް ތަކެއްވެސް ނެގެޓިވް ކަމަށް ސާދާތު ވިދާޅުވިއެވެ.
