އައްޑޫ އިންޓަރނެޝަނަލް އެއާޕޯޓް (އޭއައިއޭ) ގައި ހިމެނޭ ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ)ގެ ހިއްސާ ދޫކޮށްލުމަށް އެކުންފުނިން ނިންމައިފި އެވެ.
އެސްޓީއޯ އިން މިއަދު ކުރި އިއުލާނެއްގައި ބުނެފައ ވަނީ އޭއައިއޭގައި ހިމެނޭ އެކުންފުނީގެ އެންމެހައި ހިއްސާ ވަނީ، އެ ކުންފުނީގެ މައި ޙިއްޞާދާރު ކަމުގައިވާ ދިވެހި ސަރުކާރުގެ ނަމަށް ބަދަލުކުރުމަށް ނިންމާފައި ކަމަށެވެ. އެގޮތުން، އޭއައިއޭގައި ހިމެނޭ އެސްޓީއޯގެ އެންމެހައި ހިއްސާ ދިވެހި ސަރުކާރުގެ ނަމަށް ބަދަލުކުރެވެނީ، އެ ކުންފުނީގެ ހިސާބުތަކުގައި ހުރި ހިއްސާތައް އަގުކުރެވިފައިވާ އަގަށް ކަމަށްވެސް އެ އިއުލާނުގައި ބުނެފައި ވެއެވެ.
އައްޑޫ އިންޓަރނޭޝަނަލް އެއަރޕޯޓް ޕްރައިވެޓް ލިމިޓެޑަކީ ދިވެހި ދަޢުލަތާއި، މޯލްޑިވްސް އެއަރޕޯޓް ކޮމްޕެނީ ލިމިޓެޑާއި އެސްޓީއޯގެ ހިއްސާ ހިމެނޭގޮތަށް، 2011 ވަނަ އަހަރު ރަޖިސްޓަރީ ކޮށްފައިވާ ލިމިޓެޑު ލަޔަބިލިޓީ ކުންފުންޏެކެވެ. އޭއައިއޭގައި އެސްޓީއޯގެ ހިއްސާ އެކުލެވިގެންވާ ނިސްބަތަކީ މޫނުމަތީ އަގުގެ 1,000.00ރ. ގެ 40,000.00 އާންމު ހިއްސާއެވެ.
އައްޑޫ އިންޓަނޭޝަނަލް އެއާޕޯޓް ޕްރައިވެޓް ލިމިޑެޓަކީ ގަން އިންޓަނޭޝަނަލް އެއާޕޯޓް ހިންގާ ކުންފުންޏެވެ.
