ދުނިޔޭގެ އެކި ހިސާބުތަކުގައި ފެތުރެމުންދާ ނުރައްކާތެރި ކޮރޯނާ ވައިރަހުގެ ސަބަބުން ގިނަ ފަތުރުވެރިން ރާއްޖެ އަންނަން ހަދާފައި ވާ ބުކިންތައް ކެންސަލް ކުރަމުން ދާތީ ކެންސަލް ނުކޮށް ބުކިން ފަސްކޮށްދޭން ދިވެހި ސަރުކާރުން ނިންމައިފިއެވެ.
ރައީސް އޮފީހުގައި ބޭއްވި ބައްދަލުވުމެއްގައި ޓޫރިޒަމް މިނިސްޓަރ އަލީ ވަހީދު ވިދާޅުވީ މިދުވަސްވަރު ދިވެހިރާއްޖެ އައުމަށް ފަތުރުވެރިން ހައްދާ ބުކިން، އިތުރު ފީއަކާއި ނުލައި ފަސްކޮށްދެމުންދާކަމަށެވެ. އަދި އެއާލައިން ތަކުންނާއި ރިސޯޓް ތަކުންވެސް އެއްވެސް އިތުރު އަގަކާ ނުލައި، ފަތުރުވެރިންނަށް އެމީހުންގެ ބުކިންގެ ތާރީޚު ބަދަލު ކޮށްދެމުންދާ ކަމަށެވެ.
މިނިސްޓަރ އަލީ ވަހީދު ވިދާޅުވީ ކުރިޔަތް އޮތް ތާނގައި ލިބިދާނެ ގެއްލުމަކުން އަރައިގަންނަން މަސައްކަތް ކުރަމުން އަންނަ ކަމަށާއި ފަތުރުވެރިންގެ ބުކިން ފަސްކޮށްދިނުމުން ފަތުރުވެރިކަމުގެ ސިނާއަތަށް ބޮޑު ފައިދާއެއް ކުރާނެ ކަމަށެވެ.
ޗައިނާގެ ވުހާން އިން ފުރަތަމަ ފެނުނު ކޮރޯނާވައިރަސް ދުނިޔޭގެ 25 އަށްވުރެ ގިނަ ޤައުމުން ފެނިފައިވާއިރު އެއްތަނުން އަނެއް ތަނަށް ދަތުރުކުރުމުގައި ސަމާލުވުމަށް ޤައުމުތަކުން ވަނީ އިރުޝާދު ދީފައެވެ.
