ދަޢުވާގެ ދެފަރާތުން ހެކިން ހާޒިރުކޮށްދޭނެ ކަމުގެ ޔަޤީންކަންދޭ ޙާލަތުގައި، އެމައްސަލައެއްގައި މެދުނުކެނޑި ޝަރީޢަތްކުރުމަށް (ކޮންޓިނިއުސް ހިއަރިންގ ބޭއްވުމަށް) ކްރިމިނަލް ކޯޓުން ނިންމި ނިންމުމަށް ޕްރޮސިކިއުޓަރ ޖެނެރަލްގެ އޮފީހުން މަރުޙަބާ ކިޔައިފި އެވެ.
ޕީޖީ އޮފީހުން މިއަދު ކުރި ޓްވީޓެއްގައި ބުނެފައި ވަނީ ކްރިމިނަލް ކޯޓުގެ އެ ނިންމުމަށް މަރުޙަބާ ކިޔާ ކަމަށާއި، މުޅި ރާއްޖޭގެ ހުރިހާ ސަރަޙައްދެއްގައިވެސް އެގޮތަށް ޝަރީޢަތްތައް ގެންދިއުމަކީ އެ އޮފީހުން އެދޭ ކަމެއްް ކަމަށެވެ.
މި ނިންމުމަށް މިއޮފީހުން މަރްޙަބާ ކިޔަމެވެ. މުޅި ރާއްޖޭގެ ހުރިހާ ސަރަޙައްދެއްގައިވެސް މި ގޮތަށް ޝަރިޢަތްތައް ގެންދިއުމަކީ މިއޮފީހުން އެދޭ ކަމެކެވެ. ހަރުދަނާކޮށް މަސައްކަތް ކުރެވިއްޖެނަމަ، ޖިނާއީ ޢަދުލުގެ ނިޒާމާމެދު ރައްޔިތުންގެ އިތުބާރު އިތުރު ކުރެވޭނެއެވެ. https://t.co/tSgu2LFrlA
— PGOMV (@PGO_MV) February 6, 2020
“ހަރުދަނާކޮށް މަސައްކަތް ކުރެވިއްޖެނަމަ، ޖިނާއީ ޢަދުލުގެ ނިޒާމާމެދު ރައްޔިތުންގެ އިތުބާރު އިތުރު ކުރެވޭނެއެވެ.”، އެ ޓްވީޓްގައި ޕީޖީ އޮފީހުން ބުނެފައި ވެއެވެ.
ކްރިމިނަލް ކޯޓުން މިއަދު ނެރުނު ބަޔާނެއްގައި ބުނެފައި ވަނީ ދަޢުވާ ލިބޭ ކޮންމެ މީހެއްގެ މައްސަލައެއްވެސް އެކަށީގެންވާ އަވަސްމިނެއްގައި ޝަރީޢަތްކޮށް، މައްސަލަ ނިންމުމަށް ކެނޑިނޭޅި މަސައްކަތް ކުރަމުންދާ ކަމަށެވެ. އެގޮތުން ޖިނާޢީ އިޖުރާޢަތުގެ ޤާނޫނުގައި ބަޔާންކުރާ ‘މެދުނުކެނޑި ޝަރީޢަތްކޮށް ނިންމުން’، އެ މަފްހޫމްގެ ދަށުން މައްސަލަތައް އިތުރަށް އަވަސްކޮށް ކުރިއަށްގެންދިއުމަށް ކްރިމިނަލް ކޯޓުގެ ޤާޟީންގެ އާންމު މަޖިލީހުން މިއަދު ނިންމާފައިވާ ކަމަށްވެސް އެ ބަޔާނުގައި ވެއެވެ.
