އަނިޔާވެރިގޮތަކަށް ހުޅުމާލޭގައި މަރާލާފައި އޮއްވާ ފެނުނު ގާސިމް ހަސަންގެ އާއިލާއަށް ލިބެންޖެހޭ އިންސާފު ފުލުހުންގެ މަސައްކަތުން ލިބޭނެ ކަމަށް ޖުމްހޫރީ ޕާޓީގެ ލީޑަރު އަދި މާމިގިލީ ދާއިރާގެ މެމްބަރު ގާސިމް އިބްރާހިމް ވިދާޅުވެއްޖެއެވެ.
ގާސިމް ކުރެއްވެވި ޓުވީޓެއްގައި ވިދާޅުވެފައިވަނީ ގާސިމް ހަސަންގެ މަރާ ގުޅުންހުރި މީހަކު ހައްޔަރުކުރި ޚަބަރު ރައްޔިތުންނާ ހިއްސާކުރެއްވީތީ ސީޕީ ހަމީދަށް ޝުކުރު ދަންނަވާ ކަމަށާއި އަދި ﷲގެ އިރާދަފުޅާއެކު ގާސިމް ހަސަންގެ އާއިލާއަށް ހައްގު އިންސާފު ލިބިގެންދާނެ ކަމަށެވެ.
ގާސިމް މިހެން ވިދާޅުވެފައިވަނީ ގާސިމް ހަސަން މަރާލުމުގެ ފަހަތުގައިވާ މީހަކު ފުލުހުންގެ ތަހުގީގަށް ހޯދިފައިވާކަމަށް ޕޮލިސް ކޮމިޝަނާ މުހައްމަދު ހަމިީދު ޓްވިޓާ މެދުވެރިކޮށް ހާމަކުރައްވުމާ ގުޅިގެންނެވެ.
ޓެކްސީ ޑްރައިވަރު ޤާސިމްހަސަން ގެ މަރާގުޅިގެން އެ ތުހުމަތުގައި ފުލުހުން މިރޭ މީހަކު ހައްޔަރު ކުރި ޚަބަރު ފުލުހުންގެ ހީވާގި ކަމިޝަނަރު ރައްޔިތުންނާ ހިއްސާކުރެއްވީތީ ޝުކުރުދަންނަވަން. އިންޝާ الله ޤާސިމް ހަސަންގެ ޢާއިލާއަށް ހައްޤު އިންސާފު ލިބިގެން ދާނެ. @PoliceMv @M_Hameedh
— Qasim Ibrahim (@qasimibrahim) December 19, 2019
އަނިޔާވެރި ގޮތަކަށް ގާސިމް މަރާލާފައިވަނީ، މިމަހު ހަތަރު ވަނަ ދުވަހުގެ ރޭގެ ވަގުތެއްގައި ހުޅުމާލެއިންނެވެ. އޭނާ ޒަހަމްތަކާއެކު ފެނިފައިވަނީ، އޭނާގެ ކާރާ މާ ދުރު ނޫން ހިސާބެއްގައި މަގުމައްޗަށް ވެއްޓިފައި އޮއްވައެވެ. އޭރު ގާސިމްގެ ކަރާއި އަތުގައި ފުން ޒަހަމްތަކެއް ހުއްޓެވެ. އޭނާ މަރުވީ، ހޮސްޕިޓަލަށް ގެންދިޔުމަށް ފަހުގައި ކަމެއް ނުވަތަ އޭގެ ކުރިން ކަމެއް ކަށަވަރެއް ނޫންނެވެ. މަރު ކަށަވަރުކޮށްފައިވަނީ ހޮސްޕިޓަލަށް ގެންދެވުނުތާ 30 މިނުޓެއްހާ ފަހުން ކަމަށް އޭރު ހުޅުމާލޭ ހޮސްޕިޓަލުން ބުނެފައިވެއެވެ.
