ރައީސުލްޖުމްހޫރިއްޔާގެ ނައިބުގެ މި ޒިޔާރަތުގައި ހޮސްޕިޓަލުގެ މުވައްޒަފުންނާ ބައްދަލުކުރައްވައި ހޮސްޕިޓަލުގެ ތަރައްޤީއާ ބެހޭގޮތުން ވާހަކަފުޅު ދެއްކެވިއެވެ.
އެގޮތުން ރައީސުލްޖުމްހޫރިއްޔާގެ ނައިބުގެ ވާހަކަފުޅުގައި، ސަރުކާރުގެ ސިޔާސަތަކީ އަތޮޅުތަކުގައި ވެސް ފެންވަރު ރަނގަޅު ޞިއްޙީ ޚިދުމަތްތައް ޤާޢިމުކުރުންކަން ފާހަގަކުރެއްވިއެވެ. އަދި އައްޑޫ ސިޓީގައި ޤާޢިމުކުރާ މި ހޮސްޕިޓަލަކީ އެންމެ ޒަމާނީ ވަޞީލަތްތަކާއެކު ޤާޢިމުކުރެވޭ ހޮސްޕިޓަލެއްކަމުން އެތަނަކީ ފެންވަރު ރަނގަޅު ޚިދުމަތްތަކެއް ފޯރުކޮށްދޭ ތަނަކަށްވުމަކީ ސަރުކާރުގެވެސް ވަރަށް ބޮޑު އުންމީދެއްކަން އެމަނިކުފާނު ފާހަގަކުރެއްވިއެވެ. މީގެ އިތުރުން ރައީސުލްޖުމްހޫރިއްޔާގެ ނައިބުވަނީ މިތަނުން ޚިދުމަތްދޭ އިރު ބަލިމީހުންނާމެދު އޯގާތެރިކަމާ ހިތްހެޔޮކަމާއެކު ޚިދުމަތް ދެއްވުމަށް އެދިވަޑައިގެންފައެވެ
އައްޑޫގައި ހަދާފައިވާ 100 އެނދުގެ ޓާޝަރީ ހޮސްޕިޓަލް އަންނަ ހަފުތާގައި ހުޅުވުމުގެ ތައްޔާރީތައް ވަމުންދާއިރު އަދިވެސް ބައެއް މަސައްކަތްތައް ނުނިމި ހުރުމުގެ ސަބަބުން ކަނޑައެޅިފައިވާ ދުވަހަށް މަސައްކަތް ނިއްމުމަށްޓަކައި ދަނީ ވަރަށް ބާރަށް މަސައްކަތް ކުރަމުންނެވެ.
މިހާރު ކުރިއަށްދަނީ ހިތަދޫ ރީޖަނަލް ހޮސްޕިޓަލުން ދެމުން އަންނަ ހުރިހާ ޚިދުމަތެއް އައު ހޮސްޕިޓަލަށް ބަދަލުކުރުމުގެ މަރްޙަލާއެވެ. އެގޮތުން މިއަދުވަނީ އައު ހޮސްޕިޓަލުގައި އިދާރީ ،މަސައްކަތާއި ފައިސާއާއި ބެހޭ މަސައްކަތުގެ އިތުރުން މެޑިކަލް ސެކްޝަން ފަށާފައެވެ.
އަންނަ އާދީއްތަ ދުވަހާއި ހަމައަށް އޯޕީޑީ، ލެބޯޓްރީ، އެކްސްރޭ، އަދި ފިޒިއޮތެރަޕީގެ އިތުރަށް އައްޑުއިން މިހާތަނަށް ލިބެންނެތް މުޅިން އާ ޚިދުމަތްތަކާއެކު ހޮސްޕިޓަލް ގެ މަސައްކަތް ފަށައިގަތުމަށް ޓަކައި ގިނަގުނަ ތައްޔާރީތައް ކުރަމުން އަންނަ ކަމަށް ހޮސްޕިޓަލުން މަޢުލޫމާތު ދެއްވައެވެ.
ކުރީގެ ރައީސް މުހައްމަދު ނަޝީދުގެ ވެރިކަމުގައި އައްޑޫ ގައި ބޭއްވި ސާކް ސަމިޓަށް ތައްޔާރުކުރި ދަރުބާރުގެ ހޮސްޕިޓަލަކަށް ބަދަލުކޮށް އެންމެ ޒަމާނީ ވަސީލަތްތަކާއެކު އެތަން ފެށުމުގެ ހުރިހާ ތައްޔާރީތަކެއް ނިމި މެޝިންތައް އިންސްޓޯލް ކޮށް އޮޕަރޭޓް ކުރުމުގެ މަސައްކަތް ދަނީ ކުރިއަށެވެ.
“މެޝިންތައް އިންސްޓޯލްކޮށް، ކޮމިޝަން ކުރުމުގެ މަސައްކަތް ކުރަމުން މިހާރު އަންނަނީ. ތިއޭޓަރުގައި ވެސް ހިދުމަތް ދޭނީ އެންމެ ފަހުގެ ވަސީލަތްތަކާ އެކު،” ހިތަދޫ ރީޖަނަލް ހޮސްޕިޓަލް ހިންގެވުމާއި ޙަވާލުވެހުންނެވި ޝަރަފް ސާދާތުވިދާޅުވެފައެވެ.
އައްޑޫ އިކުއަޓޯރިއަލް ހޮސްޕިޓަލުގައިވަނީ ،ރާއްޖޭގެ އެހެން ހޮސްޕިޓަލްތަކާ ހިލާފަށް އޮކްސިޖަން ޕްލާންޓެއް ގާއިމްކޮށް ފުޅި ބޭނުންކުރުމުގެ ބަދަލުގައި ހޮސްޕިޓަލުގެ އެނދުތަކަށް އޮކްސިޖަން ގުޅައިފައިވެ އެވެ.
މާލެ އާއި ހުޅުމާލެ ފިޔަވައި ރާއްޖޭ އަތޮޅެއްގައި ގާއިމްކުރާ ފުރަތަމަ ޓާޝަރީ ހޮސްޕިޓަލުގައި ޤާއިމް ކުރެވިފައިވާ ވަސީލަތްތަކުގެ ތެރޭގައި ބޮޑު އޮޕަރޭޝަން ތިއޭޓާ ކޮމްޕްލެކްސް އަކާއި އިމަޖެންސީ ތިއޭޓަރެއްގެ އިތުރުން ހޮސްޕިޓަލެއްގައި ހިމެނޭ ޒަމާނީ ސިއްޙީ ހުރިހާ ވަސީލަތެއް ހިމެނިފައިވެއެވެ.. އޭގެ ތެރޭގައި ކާޑިއޮލޮޖީ ޑިޕާޓްމަންޓަކާއި ރޭޑިއޮލޮޖީ އާއި ޑަޔަލިސިސް ޔުނިޓަކާއި އެންޑޯސްކޯޕީ އާއި ސައިކޭޓްރިކް ޑިޕާޓްމަންޓެއްގެ އިތުރުން،ގައިނީ ޑިޕާރޓްމަންޓެއް، ޒަމާނީ ފެންވަރަށް ހަދާފައިވާ އައިސީޔޫއަކާއި އަދި ސައިކޭޓްރިކް މީހުންނަށް ޚާއްސަ ވޯޑެއް ވަނީ ހަދާފަ އެވެ. މީގެ އިތުރުން، ކުޑަކުދިންނަށް ޚާއްސަ އެންއައިސީޔޫ އަކާއި އައިސޮލޭޝަން ހަތަރު ވޯޑާއި މޯޗަރީއެއް ވެސް ވަނީ އައްޑޫ އާ ހޮސްޕިޓަލްގައި ހަދާފަ އެވެ. ސްޕީޗް ތެރަޕީ އާއި ދަތުގެ ސާޖަރީ އާއި ލޮލަށް ލޭޒާގެ ފަރުވާ ދިނުމުގެ ޚިދުމަތާއި ލެބޯޓްރީ ޚިދުމަތްވެސް ހިތަދޫގައި ހުރި ހޮސްޕިޓަލުން ލިބޭނެ އެވެ.
