ކުރީގެ ރައީސް މައުމޫން އަބްދުލް ޤައްޔޫމް އިސްކޮށް ހުންނަވައިގެން އުފެއްދެވި މޯލްޑިވްސް ރިފޯމް މޫވްމަންޓް (އެމްއާރްއެމް)، ސިޔާސީ ޕާޓީއެއްގެ ގޮތުގައި ރަޖިސްޓްރީކޮށްދިނުމަށް އިލެކްޝަންސް ކޮމިޝަން (އީސީ) އިން ނިންމައިފި އެވެ.
Maldives Reform Movement siyaasee party ehge gothugai registry kurumah commission in ninmavai, registry certificate havaalu kurun 25 November 2019 gai baahvan nimmavaifi. @MRM_Office
— Elections Commission (@ElectionsMv) November 20, 2019
އީސީ އިން މިއަދު ކުރި ޓްވީޓެއްގައި ބުނެފައި ވަނީ އެމްއާރުއެމް ސިޔާސީ ޕާޓީއެއްގެ ގޮތުގައި ރަޖިސްޓްރީ ކުރުމަށާއި، އެ ޕާޓީގެ ރަޖިސްޓްރީ ސެޓުފިކެޓު ހަވާލުކުރުން މި ހިނގާ ނޮވެމްބަރު މަހުގެ 25 ވަނަ ދުވަހު ބާއްވަން އެކޮމިޝަނުން ނިންމާފައިވާ ކަމަށެވެ.
އެމްއާރުއެމް އުފެއްދުމުގެ ހުއްދަ އިލެކްޝަންސް ކޮމިޝަން (އީސީ) އިން ދީފައި ވަނީ އޮކްޓޯބަރު މަހުގެ ދެވަނަ ދުވަހު އެވެ. ޕާޓީ އުފެއްދުމުގެ ހުއްދައާއި ހަވާލުވެ ވަޑައިގެންފައިވަނީ ރައީސް މައުމޫންގެ ދަރިކަނބަލުން އަދި މިހާރުގެ މިނިސްޓަރ އޮފް އާޓްސް، ކަލްޗަރ އެންޑް ހެރިޓޭޖް ޔުމްނާ މައުމޫންއެވެ. އަދި އެ ލިޔުން ޔުމްނާ އާއި ހަވާލުކޮށްދެއްވީ އީސީގެ ރައީސް އަހްމަދު ޝަރީފް އެވެ. މިއީ ރާއްޖޭގައި ސިޔާސީ ޕާޓީއެއް އުފެއްދުމުގެ ހުއްދަ އަންހެން ބޭފުޅަކަށް ދިން ފުރަތަމަ ފަހަރެވެ.
