ރޭ ހުޅުމާލޭގައި ނިރޮޅު މަގުން، ބްރިޖަށް އަރާ ހިސާބުގައި ސައިކަލަކާއި ބަހެއް ޖެހި، ހިނގި ނުރައްކާތެރި އެކްސިޑެންޓްގައި ނިޔާވި ،13 އަހަރުގެ ފާތިމަތު އަންޖުން ޝަފީގު އަކީ ކިޔެވުމަށް މޮޅު ކުއްޖެއް ކަމަށާއި އަދި ވަކިން ޚާއްޞަކޮށް ގުރުއާން ކިޔެވުމަށް މޮޅު ކުއްޖެއް ކަމަށް އާއިލާއިން ބުނެފިއެވެ.
އަންޖުމް ގެ ނިޔާވި ޚަބަރާއެކު ސޯޝަލް މީޑިއާގައި އަންޖުމް އަށް ހެޔޮ ދުއާކޮށް ގާތް ރަޙުމަތްތެރިންނާއި އާއިލާ އިން ބުނެފައިވަނީ އަންޖުމް އަކީ އަޚުލާގު ރަނގަޅު ބަސް އަހާ، މަޑުމައިތިރި، ކިޔެވުމަށް ލޯބި ކުރާ މޮޅު ކުއްޖެއް ކަމަށެވެ. އަދި އަންޖުމްގެ ކުއްލި ވަކި ވުމަކީ ހިތާމައިން ފުރިގެންވާ ހިތްދަތި ހާދިސާއެއް ކަމަށެވެ.
މި ހާދިސާ ހިނގާފައިވަނީ އަންޖުމް އާއިލާގެ މެމްބަރުން ތަކަކަށް ޒިޔާރަތް ކުރުމަށް މަންމަ އާއި އެކު ހުޅުމާލެއަށް ދިއުމަށް ފަހު އެނބުރި މާލެ އައި މަގުމަތީގައި ފަހަތުން އައި އެމްޓީސީސީގެ ބަހެއް ސައިކަލުގައިޖެހިގެންނެވެ.
ރޭ 11 ޖަހަން އުޅެނިކޮށް ހިނގި މި ހާދިސާގައި ހޮސްޕިޓަލަށް ގެންދިޔަ އިރުވެސް އަންޖުމް އޮތީ މަރުވެފައެވެ. އެކްސިޑެންޓުގައި ސައިކަލް ދުއްވަން އިން އަންޖުމްގެ މަންމައަށް މާ ބޮޑު އަނިޔާއެއް ނުވާކަމަށް ހޮސްޕިޓަލުން ވަނީ ބުނެފައެވެ. . ހުޅުމާލެ ހޮސްޕިޓަލުން ބުނީ އޭނާގެ ހާލަތު ސްޓޭބަލް ކަމަށާއި ބޭރުފުށުން އެއްވެސް ކަހަލަ އަނިޔާއެއް ނެތްކަމަށެވެ.
މި ހާދިސާގައި އެކްސިޑެންޓުވުމުން، ބަސް މަޑުނުކޮށް ގޮސްފައިވާ ކަމަށާއި އެހެންނަމަވެސް ހައިވޭގެ ޔޫޓާން ނަގާ ސަރަހައްދުން ބަސް ހުއްޓުވާ، އެ ބަސް ދުއްވަން އިން ޑްރައިވަރު ހައްޔަރުކޮށްފައިވާ ކަމަށް ފުލުހުން ވަނީ ބުނެފައެވެ. މި ހާދިސާ ހިނގިވަގުތު ބަސް ދުއްވަން އިނީ އުމުރުން 54 އަހަރުގެ ދިވެހި ފިރިހެނެކެވެ.
