ދައުލަތުގެ ޓެކްސް އިދާރާ، މޯލްޑިވްސް އިންލެންޑް ރެވެނިއު އޮތޯރިޓީ (މީރާ)ގެ ކޮމިޝަނަރ ޖެނެރަލް އޮފް ޓެކްސޭޝަންގެ މަޤާމަށް، ފަތުޙުﷲ ޖަމީލް ޢައްޔަންކުރުމަށް ރައްޔިތުންގެ މަޖިލީހުން ފާސްކޮށްފި އެވެ.
ކޮމިޝަނަރ ޖެނެރަލް އޮފް ޓެކްސޭޝަންގެ މަޤާމަށް ޢައްޔަންކުރެއްވުމަށް ރައީސް އިބްރާހިމް މުހައްމަދު ސޯލިހު މަޖިލީހަށް ފޮނުއްވާފައި ވަނީ މީރާގެ ކުރީގެ ޑިރެކްޓަރު ފަތުޙުﷲ ޖަމީލް އާއި ކަސްޓަމްސްގެ އެސިސްޓެންޓް ކޮމިޝަނަރު ކަމުގައިވާ ޢިސްމާއީލް ނާޝިދުގެ ނަންފުޅެވެ. ނަމަވެސް އިންޓަވިއުކުރުމަށްފަހު މަޖިލީހުގެ އިޤްތިޞާދީ ކޮމިޓީ އިން ފާސްކުރީ އެމަޤާމަށް ފަތުހުﷲ އައްޔަން ކުރެއްވުމަށެވެ.
މީރާގެ ކޮމިޝަނަރ ޖެނެރަލް އޮފް ޓެކްސޭޝަންގެ މަޤާމަށް ފަތުހުﷲ އައްޔަންކުރުމަށް މިއަދު ރައްޔިތުންގެ މަޖިލީހުގެ ތަޅުމުން ފާސްވީ، ވޯޓުގައި ބައިވެރިވެވަޑައިގެންނެވި 82 މެމްބަރުންގެ އިއްތިފާޤުންނެވެ.
2003 ވަނަ އަހަރު ރެވެނިއު އޮފިސަރެއްގެ މަޤާމަށް މީރާ އާއި ގުޅިވަޑައިގެން ފަތުހުﷲ ވަނީ ފަހުން ސީނިއަރ ރެވެނިއު އޮފިސަރުގެ މަޤާމް އަދާކުރެއްވުމަށްފަހު، 2010 ވަނަ އަހަރު މީރާގެ ޑިރެކްޓަރ ޖެނެރަލްގެ މަޤާމަށް އައްޔަންކުރައްވައިފަ އެވެ. އަދި މީރާއިން ވަކިވެވަޑައިގަތުމަށްފަހު 2016 ވަނަ އަހަރު ދިރާގާ ގުޅިވަޑައިގެން މިއަދާއި ހަމައަށް ފަތުހުﷲ ހުންނެވީ ދިރާގުގެ ޓެކްސް، ރިސްކް އެންޑް ކޮމްޕްލެއަންސްގެ މެނޭޖަރުގެ މަޤާމުގައެވެ.
މީގެ އިތުރުން، މީރާގެ ޑެޕިއުޓީ ކޮމިޝަނަރ ޖެނެރަލްގެ މަޤާމަށް އަސްމާ ޝަފީއު، ވައިޖެހޭގެ/ ހއ. އިހަވަންދޫ އައްޔަންކުރަން ވެސް ރައްޔިތުންގެ މަޖިލީހުން ވަނީ މިއަދު ފާސްކޮށްފަ އެވެ. އަސްމާ އެމަޤާމަށް އައްޔަންކުރުމަށް ފާސްވީ، ވޯޓުގައި ބައިވެރިވެވަޑައިގެންނެވި 81 މެމްބަރުންގެ އަޣްލަބިއްޔަތުންނެވެ.
ޤާނޫނުގައި ބުނެފައިވާ ގޮތުން، ކޮމިޝަނަރ ޖެނެރަލް އޮފް ޓެކްސޭޝަން އަދި ޑެޕިއުޓީ ކޮމިޝަނަރ ޖެނެރަލް އޮފް ޓެކްސޭޝަން ހިމެނޭ ގޮތަށް މީރާގެ ބޯޑުގައި ތިއްބަވާނީ މަޖިލީހުން އައްޔަންކުރާ ޖުމްލަ ހަތް މެމްބަރުންނެވެ.
